20 Gusht 2019

Taksa komunale për leje ndërtimore harmonizohet me nivelin qendror

Gjilan, 17 prill - Komiteti për Politikë dhe Financa (KPF) shqyrtoi dhe rekomandoi për Kuvend Komunal raportin financiar janar-mars 2019, raportin e panelit përzgjedhës të anëtarëve të Komitetin konsultativ për personat me aftësi të kufizuar si dhe të Komitetit konsultativ të ekspertëve të planifikimit hapësinor, propozim-vendimin për miratimin e taksës për leje ndërtimore dhe tarifës për rregullimin e infrastrukturës, për vitin 2019, propozim-vendimin për ndryshim dhe plotësimin e vendimit për themelimin e KKSB-së si dhe kërkesën e Teatrit të qytetit për mbështetje financiare në shumën prej mbi 75 mijë euro.
 
Komuna e Gjilanit administron një buxhet prej 25.544.786 euro, shumë kjo e cila sigurohet nga grandet e qeverisë - 20.862.476, nga të hyrat vetanake - 4.465.883 si dhe financime nga huamarrjet -  216.427 euro. Buxheti përfundimtar për vitin 2019, me mjetet nga grandi, mjetet vetanake të vitit 2019,  donacionet dhe participim i qytetarëve arrin shumën prej 25.944.406 euro. 

Nevzad Isufi (VV) ka bërë vërejtje sa i përket anës teknike të raportit, për çka sqarime ka dhënë Ilmi Limani, zyrtar i lartë financiar.  

Po ashtu, KPF ka rekomanduar për miratim në Kuvend vendimin për taksa administrative për leje ndërtimore në lartësi prej 1.40 euro për metër katror te kategorie e parë, përkatësisht 2.50 euro te kategoria e dytë, si dhe taksën administrative për leje rrënimi në lartësi prej 0.80€/m2.  Me këtë vendim miratohet dhe tarifa për rritjen e densitetit të infrastrukturës  në lartësi prej 194.86€/kokë banori.

Shpresa Kurteshi-Emini, kryesuese e Kuvendit Komunal, ka thënë se taksa komunale është e harmonizuar me nivelin qendror dhe është në harmoni me ligjin për ndërtim.

Komiteti ka mbështetur njëzëri edhe kërkesën e Teatrit të qytetit për ndarjen e mjeteve në lartësi prej mbi 75 mijë euro, që e ka arsyetuar drejtori Erson Zymberi, duke thënë se kjo shumë nevojitet për kompensimin e stafit artistik dhe teknik  si dhe për aktivitetet e teatrit për vitin 2019.

Përndryshe, sa i përket propozimit të Ibish Ibishit (AAK) për të diskutuar rreth kërkesës së një grupi të qytetarëve, të cilët kanë prona në zonën e ish-kampit “Montith”, në lidhje me zbatimin e planit rregullues të vitit 2013, përkatësisht procedurën e shpronësimit, të cilin e kanë mbështetur edhe Mimoza Kadriu (Nisma), Nevzad Isufi (VV), Riza Abdyli (PDK) dhe të tjerë, duke thënë se qytetarët kanë të drejtë të interesohen për pronën e tyre, KPF u dakordua që më parë të kërkojë një informatë nga Drejtoria e Urbanizmit, për të parë se si qëndron puna në këtë rast dhe deri ku kanë arrit procedurat, meqë siç tha Avdyl Aliu (LDK), Komuna është duke hartuar hartën zonale, me të cilën duhet të përshtaten të gjitha planet rregulluese.
    
 

Kalendari

Ngjarjet e datës 20 gusht 2019 - Ministri i Tregtisë dhe Industrisë, Endrit Shala do ta takojë ministrin e Ekonomisë së Maqedonisë së Veriut, Kreshnik Bekteshi. (Holli i Ministrisë së Tregtisë dhe Industrisë, ora 9:30)

- Oda Ekonomike Amerikane në Kosovë organizon tryezën për gjendjen e prodhimit në Kosovë ku do të diskutohen rekomandimet ndaj Qeverisë së re rreth zhvillimit të mëtutjeshëm të sektorit të prodhimit, me panelistë përfaqësues të bizneseve prodhuese në vend. (Hotel Sirius, ora 9:55)

- Në Gjilan fillon implementimi i programit “Shkollat e Shekullit 21”, i cili mbështetet nga Qeveria e Britanisë, i dizajnuar nga British Council. (Salla e Kuvendit Komunal, ora 11:00)

- Instituti Demokratik I Kosovës / Transparency International Kosova organizon konferencën për media gjatë të cilës do të shpalosën të gjeturat e hulumtimit pilot mbi transparencën e kryeqyteteve evropiane, ku mes 27 kryeqyteteve evropiane është vlerësuar edhe Prishtina. (Salla e konferencave të KDI, ora 12:00)

- Kryetari i Komunës së Prizrenit Mytaher Haskuka do të pret në takim anëtarin e Parlamentit Britanik, John Grogan ku pas takimit do të ketë edhe një konferencë të përbashkët për media. (Shtëpia e Bardhë, ora 13:00)

- Mbahet ceremonia e hapjes se festivalit të edicionit të 9-të të Festivalit të Arteve dhe Kulturës Tradicionale Etnofest. (Etnokompleksi i fshatit Kukaj, ora 18:00)

- Komuna e Prizrenit në kuadër të hartimit të buxhetit për vitin 2020 do të organizojë dëgjime publike me me banorët e rajonit të Zhurit, Vërrinit dhe Vërmicës me qëllim të angazhimit të tyre në procesin e hartimit të buxhetit, transparencës, gjithëpërfshirjes dhe llogaridhënies ndaj qytetarëve. (Shkolla fillore në Zhur, ora 19:00)

- Aleanca Franceze e Prishtinës, Kino Armata dhe Termokiss organizojnë së bashku edicionin e parë të festivalit "Kino nshehër". (Kino Armata te Sheshi, ora 20:00)