23 Tetor 2019

Përurohet projekti prej 5.4 milionë euro për një energji stabile në Mitrovicë

Mitrovicë, 19 qershor - Sot në qytetin e Mitrovicës respektivisht në lagjen Ilirida është bërë përurimi i nënstacionit 110/10 (20)kV dhe linjës nëntokësore transmetuese 110 kV i financuar nga KOSTT-i dhe BERZH-i.

Në këtë ceremoni ishte i pranishëm kryetari i komunës, Agim Bahtiri, kryeministri i Republikës së Kosovës, Ramush Haradinaj, kryeshefi ekzekutiv i KOSTT-it, Ilir Shala, drejtori i zyrës së BERZH-it në Prishtinë, Neil Taylor, ambasadori i Shqipërisë, Qemaj Minxhozi, përfaqësues nga Ambasada Amerikane, përfaqësues nga Ambasada Gjermane, të KOSTT-it si dhe të BERZH-it.

Në fjalën e tij kryetari i komunës, Agim Bahtiri, tha se tani Mitrovica është ndër qytetet më stabile në Kosovë, falë punës dhe angazhimit tij të palodhshëm dhe të qytetarëve për një qytet me stabilitet dhe paqe.

“Mitrovica ka pasur nevojë për paqe dhe stabilitet, të cilën e kemi ndërtuar së bashku me qytetarët dhe për këtë gjë jemi krenar. Falë stabilitetit kemi bërë që investitorët të kthehen të investojnë në Mitrovicë për arsye se puna e tyre tashmë është e sigurt dhe këtë e dëshmojnë projektet e shumta që janë realizuar në Mitrovicë”, tha kryetari Bahtiri.

Po ashtu kryetari Bahtiri tha se ky trafostacion është shumë i rëndësishëm për qytetarët e Mitrovicës, të cilët do furnizohen mjaftueshëm me energji elektrike, dhe projektet e tilla për qytetin e Mitrovicës po vazhdojnë edhe në këtë vit, ku  do të kemi investime qindra milionëshe në sektorin e prodhimit të energjisë elektrike.

“Në qytetin e Mitrovicës do të ndërtohet parku energjetik ku do të prodhohen 105 MW energji elektrike përmes 30 turbinave me erë. Ky investim nga kompania "Sowi Kosovo LLC" planifikohet të bëhet në shifrën prej 169 milionë euro dhe do të jetë më i madhi i bërë që nga pas lufta në fushën e investimeve në energji alternative”, tha ndër të tjerash kryetari Bahtiri.

Ndërsa kryeministri i Kosovës, Ramush Haradinaj, tha se është mirë kur bashkohemi në Mitrovicë për një vepër të tillë ekonomike në energji, kur dihet rëndësia e energjisë jo vetëm për jetën ekonomike por edhe për sigurinë.

“Kjo vepër që i dedikohet shërbimit me energji për konsumatorin, e rregullon gjendjen me energji për 50 vjetët që vijnë. Për të pasur stabilitet një vend duhet të investohet në energji”, tha ndër të tjerash kryeministri Haradinaj.

Vlera totale e këtij projekti arrin shumën 5.4 milionë euro. 

Kalendari

Ngjarjet e datës 24 tetor 2019 - Mbahet konferenca më e madhe në rajon në fushën e Teknologjisë së Informacionit dhe të Komunikimit Tech Festivalitn KosICT8. (Ambientet e “Kino Armatës” dhe në amfiteatrin e sheshit “Zahir Pajaziti”, ora 9:30)

- Komuna e Prizrenit mban mbledhjen e radhës te Këshillit Komunal për Siguri në Bashkësi, e thirrur nga kryetari, Mytaher Haskuka. (Ndërtesa e Kuvendit të Komunës, Shtëpia e Bardhë, ora 10:00) 

- Zëvendësshefi i Zyrës së BE/PSBE, Riccardo Serri, do të vizitojë Qendrën Mësimore në Fushe Kosove, që është pjesë e projektit të financuar nga BE i cili synon të sigurojë prospekte më të mira për arsim për fëmijët dhe të rinjtë rom, ashkali dhe egjiptian. (Qendra Mësimore në Lagjen 29 në Fushë Kosovë, afër stacionit të trenave, qendra Fidan Lahi, ora 10:00) 

- Për nder të jubileut të 10-vjetorit të punës së Gjykatës Kushtetuese do të mbahet konferenca ndërkombëtare në temën “Sigurimi i sundimit të ligjit dhe i të drejtave të njeriut përmes mekanizmave të drejtësisë kushtetuese: Sfidat e shekullit 21”. (Hotel Emerald, ora 10:00)

- Instituti Kërkimor për Çështje Evropiane dhe të Zhvillimit bnë prezantimin e studimit të radhës brenda serisë së studimeve rreth fazes finale të dialogut Kosovë - Serbi për Pretendimet e Serbisë mbi ‘Investimet’ në Kosovë nga Ndërmarrjet Shoqërore Serbe pas Vitit 1999 në Kontekstin e Marrëveshjes Eventuale Ndërmjet Kosovës dhe Serbisë. (Hotel Sirius, ora 10:15)

- KEDS organizon aktivitetin me rastin e Javës Evropiane për Siguri dhe Shëndet në Punë. (Qendra e Trajnimit ngjitur me Parkun e Biznesit në Drenas, ora 10:30)

- Agjencia për Arsim dhe Aftësim Profesional dhe Arsim për të Rritur organizon aktivitetin e shënimit të themelimit të qendrës për karrierë në Shkollën e Mesme të Lartë Profesionale “Shtjefën Gjeçovi”. (Objekti i SH.M.L.P “Shtjefën Gjeçovi” në Prishtinë, ora 10:30)

- Koordinatori Nacional për Kulturë, Rini dhe Sport në Qeverinë e Republikës së Kosovës, Rexhep Hoti, do të vizitojë Shkollën Fillore të Mesme të Ulët "Fehmi Agani" në Gjakovë Prizren ku do të takoj drejtorin e kësaj shkolle, për të parë procesin e zhvillimit të Garës Nacionale në Sport dhe Kreativitet Kulturor e Mendim Kritik. (Objekti i shkollës në Gjakovë, ora 11:00)

- SOS Fshatrat e Fëmijëve Kosovë organizojnë ceremoninë e hapjes zyrtare të projektit “Fuqizimi dhe aftësimi i të rinjëve përmes mundësive të reja – YEEP!”. (Hotel Emerald, ora 11:00)

- Koordinatori Nacional për Kulturë, Rini dhe Sport në Qeverinë e Republikës së Kosovës, Rexhep Hoti, do të vizitojë Shkollën e Mesme të Lartë "Gjon Buzuku" në Prizren ku do të takoj drejtorin e kësaj shkolle, për të parë procesin e zhvillimit të Garës Nacionale në Sport dhe Kreativitet Kulturor e Mendim Kritik. (Objekti i shkollës në Prizren, ora 13:00)

- Rrjeti i Grave të Kosovës organizon konferencë për media për të shpallur zyrtarisht përfituesit e granteve të Fondit të Grave të Kosovës me shumën prej 66,429.50 euro. (Hotel Sirius, ora 14:00)

- Në kuadër të panairit ndërkombëtar të Agrobiznesit dhe Ushqimit mbahen takimet B2B me bizneset e Malit te Zi. (Salla 1 Tetori, ora 14:00)