Prishtinë, 28 dhjetor - Deputeti i Lëvizjes Vetëvendosje, Sami Kurteshi ka parashtruar sot disa pyetje në Kuvend për Bordin e Zyrës së Rregullatorit të Eenergjisë Elektrike.

Kurteshi ka kërkuar të dijë se përse ai duhet të paguaj energjinë elektrike të shpenzuar nga një qytetar në veri që i ka vrarë shokun.

“Pse jam përgjegjës që të paguaj për një qytetar në veri që ka vrarë shokun tim? Cila marrëveshje ndërkombëtare më detyron ta paguajë rrymën e dikujt. Nuk ka asnjë marrëveshje ndërkombëtare që më detyron që si taksapagues të paguaj taksën dhe rrymën  e dikujt tjetër, çdo marrëveshje e tillë është e kundërligjshme dhe shkel të drejtat e njeriut”, është shprehur Kurteshi.

Ai ka kërkuar nga ZRrE të dijë se përse nuk e ka bërë publike faturimin e energjisë elektrike të shpenzuar në veri për pjesën tjetër të qytetarëve të Kosovës.

Sipas tij, duhet të bëhet kompensimi i qytetarëve për këto pagesa dhe i KEDS-it për humbjet nga mospagesa e energjisë elektrike në veri.