21 Mars 2019

JICA identifikon zonat e ndotura dhe kontribuuesit e ndotjes së ajrit në Kosovë

Prishtinë, 29 tetor - Ministri i Mjedisit dhe Planifikimit Hapësinor, Fatmir Matoshi, sot është takuar me ekspertët e Agjencisë Japoneze për Bashkëpunim Ndërkombëtar (JICA), i kryesuar nga eksperti, këshilltari kryesor për matjen në terren të gazit nga oxhaku, Shimizu Masuta dhe ekipi i tij.

Gjatë këtij takimi është diskutuar për “Projektin e Zhvillimit të Kapaciteteve për Kontrollin e Ndotjes së Ajrit në Republikën e Kosovës”.

Në këtë takim, ministri Matoshi, tha se çështja e ajrit është problem i kamotshëm në Kosovë dhe sipas tij projekti me JICA-n japoneze ka për qëllim evidentimin e ndotësve kryesor të ajrit në Kosovë.

“Problemi i ajrit të ndotur në Kosovës nuk është problem i dy apo tri viteve të fundit, është problem që e ka përcjellë këtë shoqëri çdo vit në periudha të ndryshme. E vetmja gjë e re është vullneti dhe angazhimi ynë për tu ballafaquar me këtë problem. Është kënaqësi të kemi një projekt të tillë dhe ekspert të tillë nga JICA japoneze, që është një investim për ndryshimin e gjendjes së ajrit për të mirë”, tha Matoshi.

I pari i MMPH-së, Matoshi ofroi mbështetje për ekspertët e JICA-së japoneze për finalizimin e projektit që do të identifikojë ndotësit kryesor të ajrit në vendin tonë.

“ Më e rëndësishme se koha e publikimit të rezultateve, është të kemi një raport dhe një rezultat të saktë nga ju si ekspertë dhe në bazë të tyre të ndërmarrim veprime konkrete për përmirësimin e ajrit në Kosovë”, deklaroi ministri Matoshi.

Ndërsa ekspertët nga Agjencia Japoneze për Bashkëpunim Ndërkombëtar (JICA), prezantuan punën e tyre për hulumtimin e emisioneve në ajër.

Gjatë këtij takim, ekspertët e JICA-s japoneze, kanë bërë të ditur se rezultatet përfundimtare që tregojnë zonat e ndotura dhe kontribuuesit e ndotjes së ajrit në Kosovë, do të jenë të gatshme në muajin prill, për shkak se sipas tyre duhet të grumbullohen të dhëna të shumta dhe të bëhet kalkulimi i tyre.

Në kuadër të “Projektit për Zhvillimin e Kapaciteteve për Kontrollin e Ndotjes së Ajrit në Republikën e Kosovës”, parashihet elaborimi i inventarit të emisioneve për impiantet e mëdha të djegies (LCP) dhe burime të tjera; zhvillimi i matjeve të emisioneve për LCP dhe burime të tjera; aktivitete e qëndrueshme të monitorimit të cilësisë së ajrit, analizat laboratorike përkatëse për matjen e emisioneve dhe monitorimin e cilësisë së ajrit;  zhvillimi i modelimit të simulimit të cilësisë së ajrit; marrjen e vendimeve në bazë të provave teknike për kontrollin e ndotjes së ajrit;  zhvillimi i masave të kontrollit të shkarkimeve për LCP-të dhe burime të tjera stacionare; dhe vlerësimi i masave të kontrollit të ndotjes së ajrit.

Kalendari

Ngjarjet e datës 21 mars 2019  
- Ministri i Punëve të Jashtme i Republikës së Kosovës, Behgjet Pacolli, do të jetë nikoqir i homologut të tij nga Mali i Zi, Srdjan Darmanoviq. (Ambientet e Ministrisë së Punëve të Jashtme, ora 8:50)

- Përurohem hapësirat e reja të Shoqatës Down Syndrome Kosova qendra në Prishtinë. (Qyteza Pejton Lokalet e NPB-së, ora 9:00)

- Institucioni i Avokatit të Popullit organizon tryezën me temë"Përgjegjësia juridike e shtetit për shkeljet e të drejtave të njeriut". (Institucioni i Avokatit të Popullit, ora 9:30)

- Instituti Demokraci për Zhvillim  organizon diskutim me rastin e publikimit të dokumentit të politikave “Matja dhe vlerësimi i politikave të riintegrimit”, (Hotel Sirius, ora 9:45)

- Ministri i Mjedisit dhe Planifikimit Hapësinor, Fatmir Matoshi do të takohet me kryetarin e Komunës së Prishtinës, Shpend Ahmeti ku do të diskutojë për hartat zonale, krijimin e zonave të gjelbra, veturat elektrike, policia mjedisore si dhe tema të tjera mes dy institucioneve. (Kabineti i Ministrit Matoshi, ora 10:00)

- Mbahet konferenca e përbashkët për media e Ministrit të Jashtëm, Behgjet Pacolli, dhe ministrit të jashtëm të Malit të Zi, Srdjan Darmanoviq. (Ambientet e Ministrisë së Punëve të Jashtme, ora 10:00)

Shoqata Down Syndrome Kosova organizon konferencen “Aftësia e Kufizuar Intelektuale në Kosovë”. (Hotel Sirius, ora 10:30)

- Qendra Mediale në Çagllavicë organizon debatin publik me temë "Platforma e Kosovës për dialog - realiteti apo fundi i dialogut?". (Qendra Mediale në Çagllavicë, ora 10:30)

- SHL-Kosova themelon Rjetin e Qendrave Rinore të Kosovës ku edhe mban Kuvendin për zgjedhjen e Bordeve të këtij Rjeti. (Zyra e KDI-së, ora 11:00)

- Lëvizja Vetëvendosje mban konferencë për media në të cilën flasin deputetët Glauk Konjufca dhe Arbërie Nagavci. (Holli i Kuvendit, ora 12:00)

- Ministri Mjedisit dhe Planifikimit Hapësinor, Fatmir Matoshi, do të vizitoi Termocentralin Kosova B lidhur me prezantimin e fillimit të investimeve madhore mjedisore në Termocentralin Kosova B, nga ana e menaxhmentit të KEK-ut. (Termocentrali Kosova B në Obiliq, ora 13:00)

- Partia Socialdemokrate mbanë koferencë për media. (Selia Qendrore e PSD-së, në lagjen Arbëria.  ora 14:00)