17 Shkurt 2019

Gjykata konfirmon aktakuzën për vjedhje të rrymës ndaj deputetit Ramiz Kelmendi

Prishtinë, 31 janar - Gjykata Themelore në Prishtinë, pas më shumë se pesë vjetësh, e ka konfirmuar aktakuzën ndaj deputetit të Kuvendit të Kosovës nga radhët e LDK-së dhe njëherësh pronarit të kompanisë “Elkos”, Ramiz Kelmendi, i akuzuar për vjedhje të energjisë elektrike.

“Betimi për Drejtësi”, e ka siguruar aktvendimin e kësaj gjykate, e cila më 29 janar të këtij viti, e ka refuzuar si të pabazuar kërkesën e ish-zëvendëskryeministrit të Kosovës, për hudhjen e aktakuzës dhe pushimin e kësaj procedure penale, që e kishte dërguar më 12 dhjetor të vitit 2012.

Në arsyetimin e këtij aktvendimi thuhet se pas analizimit dhe shqyrtimit të shkresave të lëndës, gjykata ka gjetur se kërkesa e të pandehurit Kelmendi në këtë fazë të procedurës penale për hudhje të aktakuzës, nuk mund të aprovohet, për arsye se gjendja faktike për ekzistimin ose jo të veprës penale, do të vërtetohet pas shqyrtimit gjyqësor.

Deputeti i LDK-së, Ramiz Kelmendi, njëherësh pronar i kompanisë “Elkos”, po akuzohet nga Prokuroria Themelore në Prishtinë, se gjatë vitit 2011, ka kryer veprën penale “vjedhje e rëndë”.

Konkretisht, ai akuzohet për vjedhje të energjisë elektrike, ku si pronar i kompanisë “Elkos”, sipas prokurorisë, ka dëmtuar Korporatën Energjetike të Kosovës (KEK), në shumën prej 22.801.19 euro.

Prokuroria pretendon se pasi punëtorët e KEK-ut, kanë shkuar në kompaninë e tij, kanë vërejtur se Kelmendi ka shfrytëzuar në mënyrë të paautorizuar energjinë elektrike, duke mos regjistruar dy të tretat e energjisë.

Lidhur me këtë akuzë, ish-zëvendëskryeministri i Kosovës, të hënën e kësaj jave ishte paraqitur në bankën e të akuzuarve në Gjykatën Themelore në Prishtinë.

Kelmendi, i cili nuk ka pasur avokat mbrojtës, e ka kundërshtuar aktakuzën e prokurorisë, duke u deklaruar se qëndron pranë kundërshtimeve të dorëzuara me shkrim.

“Mbetem në tërësi pranë kundërshtimit dhe nuk kam tjetër çka të shtoj”, kishte thënë shkurtimisht Kelmendi, në seancën e së hënës.

Në kundërshtimet e tij ndaj aktakuzës, Kelmendi kishte theksuar se në të gjitha njësitë punuese të kompanisë së tij që veprojnë në të gjithë territorit e Kosovës, secili përgjigjet për punën e vet.

Ai kishte thënë po ashtu që zyra ligjore e kompanisë së tij, pasi ishte ndarë e pakënaqur me raportin e KEK-ut, ka parashtruar ankesa në shkallën e parë dhe atë të dytë dhe pas refuzimit të parashtresave, sipas tij, ka përmbushur obligimin.

Kelmendi po ashtu kishte theksuar se e gjitha kjo është shkaktuar nga zyrtarët e KEK-ut, të Distriktit në Prishtinë, me qëllim që atij t’i shkaktohet dëm dhe të njolloset emri i tij.

Sipas arsyetimit që ka dhënë, Kelmendi kishte thënë se punëtorët e KEK-ut asnjëherë nuk e kanë kontrolluar transformatorin në prani të personave përgjegjës, por ata i kanë njoftuar personat përgjegjës pas kontrollimit.

Sipas Kelmendit, gjatë periudhës kohore për të cilën prokuroria atë e akuzon se ka keqpërdorur energjinë elektrike, ka theksuar se ka pasur ndërprerjeje të shpeshta të energjisë elektrike dhe pas kyçjeve dhe shkyçjeve të gjeneratorit, ka mundur ta dëmtojë ndonjë përçues, por që dëmtimi ka mundur të mos e ndërpresë energjinë elektrike.

Kundërshtimet e Kelmendit, prokurori Menduhi Kastrati, i kishte vlerësuar të paqëndrueshme dhe kërkoi nga gjykatësi Rrustem Begolli, që të merr aktvendim për refuzimin e tyre.

“Prokuroria Themelore në Prishtinë, ka pranuar parashtresën e të akuzuarit që ka të bëj me kundërshtimin e provave dhe kërkesën për hudhjen e aktakuzës. Ne kemi analizuar parashtresën e të akuzuarit dhe në seancën e sotme gojarisht deklarohemi duke e kundërshtuar të njëjtën parashtresë. I akuzuari në parashtresën e tij i ka bashkangjitur disa prova që nuk janë në relevancë, si p.sh ka paraqitur listë me cilën dëshmohet se ka qenë deputet i legjislaturës së 4, pastaj, një kopje të numrit të biznesit, një informacion mbi regjistrimin e biznesit, transaksionet e konsumatorit, të lëshuar nga pala e dëmtuar dhe po ashtu një kontratë pune të një punëtori që punon në kuadër të biznesit të tij”, kishte thënë prokurori Kastrati.

Ai kishte shtuar se nga këto prova konsideron se nuk ka bazë të mjaftueshme që gjykata të veprojë në aprovimin e kërkesës së parashtruar nga i akuzuari.

Prokurori kishte deklaruar se aktakuza ka prova të mjaftueshme të bashkëngjitura që vërtetojnë dyshimin e bazuar, me ç’rast i ka kërkuar gjykatës që të vendos me aktvendim për refuzimin e kërkesës për kundërshtim të provave dh hedhjen e aktakuzës.

Ndryshe, në seancën fillestare të mbajtur më 21 dhjetor 2017, i akuzuari Ramiz Kelmendi ishte deklaruar i pafajshëm.

Sipas aktakuzës së 12 dhjetorit 2012, të cilën e ka siguruar “Betimi për Drejtësi”, Kelmendi akuzohet për veprën penale “vjedhje e rëndë”, për shkak të dyshimit se prej datës së pavërtetuar e deri më 30 qershor 2011, kompania “Elkos”, në Fushë Kosovë, pronë e Kelmendit ka bërë keqpërdorim të energjinë elektrike.

Prokuroria pretendon se kur punëtorët e KEK-ut kanë shkuar për të bërë kontrolle në atë kompani kanë hasur se i pandehuri me qëllim të vjedhjes ka shfrytëzuar në mënyrë të paautorizuar energjinë elektrike, pasi aty janë gjetur dy transformator të rrymës që kanë qenë jashtë matjes, ndërsa një përçues ishte shkëputur nga lidhja.

Në bazë të aktakuzës, me këto veprime, dy të tretat e energjisë elektrike nuk ishte regjistruar, me ç’rast KEK-ut i është shkaktuar dëm në vlerë prej 22.801.19 euro.

Kalendari

Ngjarjet e datës 17 shkurt 2019 - Qeveria e Kosovës mban mbledhje festive për nder të 11-vjetorit të Pavarësisë. (Ndërtesa e Qeverisë, ora 8:00)

- Ngritja solemne e Flamurit të Republikës së Kosovës për nder të 11-vjetorit të Pavarësisë në të cilën marrin pjesë presidenti Hashim Thaçi, kreu i Kuvendit, Kadri Veseli dhe kryeministri Ramush Haradinaj. (Hapësira mes ndërtesës së Kuvendit dhe Qeverisë, ora 8:30) 

- Presidenti Thaçi, kryeparlamentari Veseli dhe kryeministri Haradinaj vendosin kurora lulesh te shtatorja e ish-presidentit Ibrahim Rugova. (Sheshi “Ibrahim Rugova”, para Kuvendit, ora 8:45) 

- Presidenti Thaçi, kryeparlamentari Veseli dhe kryeministri Haradinaj vendosin kurora lulesh në Kompleksin Memorial “Adem Jashari” në Prekaz. (Prekaz, ora 9:40)

- Në 11 vjetorin e shpalljes së pavarësisë të Kosovës, anëtarë të kryesisë së LDK-së bashkë më struktura të saj, bëjnë homazhe te varri i Presidentit Historik të Kosovës, Dr. Ibrahim Rugova. (Velani, ora 10:00)

- Komuna e Gjilanit organizon homazhe  te varrezat e dëshmorëve. (Gjilan, ora 10:00)

- Federata e Ping-Pongut e Kosovës (FPPK) organizon turneun “Dita e Pavarësisë”.  (ShMU “Tefik Çanga”, Ferizaj, ora 10:00)

- “Star Kids” do të performojnë në sheshin “Skënderbeu” për nder të Pavarësisë. (Sheshi “Skënderbeu” në Prishtinë, ora 10:00)

- Kuvendi i Kosovës mban seancë solemne për nder të 11-vjetorit të Pavarësisë. (Kuvendi i Kosovës, ora 10:45) 

- Komuna e Gjilanit organizon akademi solemne dhe program artistik nga Shkolla e Muzikës në Gjilan. (Teatri i Qytetit, ora 11:00)

- Trupat e Forcës së Sigurisë së Kosovë parakalojnë me rastin e 11-vjetorit të Pavarësisë së Kosovës. (Prej Sheshit “Nënë Tereza” deri te Sheshi “Ibrahim Rugova”, ora 12:20)

- Me rastin e 11-vjetorit të Pavarësisë së Kosovës organizohet koktej për të gjithë të ftuarit në Parakalimin e Trupave të FSK-së. (Hotel “Swiss Diamond”, ora 13:00)

- Dega e Lidhjes Demokratike të Kosovë në Gjilan bën përurimin e bustit të ish-presidentit Ibrahim Rugova (Gjilan, ora 13:00)

- Përfaqësues të organizatave studentore organizojnë një “protestë artistike” në lidhje me vonesën e liberalizimit për qytetarët e Kosovës. (Sheshi “Zahir Pajaziti”, ora 13:00) 

- Komuna e Vushtrrisë organizon manifestimin qendror për shënimin e 11-vjetorit të Pavarësisë. (Kalaja e Qytetit, Vushtrri, ora 13:00)

- Kryeministri Ramush Haradinaj pret në takim deputetët nga Mbretëria e Bashkuar, John Grogan dhe Martin Vickers. (Ndërtesa e Qeverisë, ora 14:00)

- Shoqata e Gastronomëve të Prishtinës, në bashkëpunim me Qeverinë e Kosovës, organizon një event simbolik për Pavarësi. (Sheshi “Skënderbeu”, ora 14:00) 

- Kryetari i Kuvendit të Kosovës, Kadri Veseli, dhe ministri i Kulturë, Rinisë dhe Sportit, Kujtim Gashi, përurojnë Palestrën Sportive në Shtime. (Shtime, ora 15:00)

- Kryeministri Ramush Haradinaj pret në takim delegacionin 17-anëtarësh nga Shtetet  e Bashkuara të Amerikës, të kryesuar nga Senatori James Inhofe. (Ndërtesa e Qeverisë, ora 15:00) 

- Komuna e Lipjanit organizon koncert festiv për 11-Vjetorin e Pavarësisë. (Qendra e Kulturës “Tahir Sinani”, Lipjan, ora 15:00)

- Ansambli Kombëtar i Këngëve dhe Valleve “Shota” mban koncert festiv për Pavarësi. (Sheshi “Zahir Pajaziti”, Prishtinë, 18:00)

- Për 11-vjetorin e Pavarësisë së Kosovës bëhet ndezja e organizuar e fishekzjarrëve. (Sheshi “Zahir Pajaziti”, Prishtinë, ora 18:30)

- Me rastin e 11-vjetorit të Pavarësisë së Kosovës organizohet pritja shtetërore nën përkujdesjen kryeministrit Ramush Haradinaj. (Hotel “Venus”, magjistralja Prishtinë-Ferizaj, ora 19:30)

- Mbahet koncerti festiv për nder të 11-vjetorit të Pavarësisë së Kosovës. (Sheshi “Zahir Pajaziti”, Prishtinë, ora 20:00)