21 Shtator 2020

Gjilani përfitues i projekteve në efiçencë të energjisë për tetë shkolla

Gjilan, 10 shtator – Kryetari i Komunës së Gjilanit, Lutfi Haziri, së bashku me drejtoreshën e Zhvillimit Ekonomik, Valbona Tahiri, kanë nënshkruar marrëveshje bashkëpunimi me drejtorin ekzekutiv të Fondit të Kosovës për Efiçiencë të Enershisë, Admir Shala, për investime në efiçiencë të energjisë, ku përfitues janë shkolla “Rexhep Elmazi” dhe “Mehmet Isai”.

Kryetari i Komunës së Gjilanit, Lutfi Haziri në këtë takim ka potencuar se efiçienca e energjisë është kriter ndërkombëtar i angazhimit në sektorin publik, por edhe atë privat.

Ai më tej ka thënë se efiçienca mundëson kursim të mjeteve buxhetore, njëkohësisht zhvillim të projekteve publike me interes të përgjithshëm për mirëqenien qytetare, por edhe kushte më të mira në mësimdhënie e nxënie për nxënësit.

Nga ana e tij Admir Shala, drejtor ekzekutiv në Fondin e Kosovës për Efiçiencë të Energjisë, ka falënderuar kryetarin Haziri për bashkëpunimin duke bërë të ditur se në këtë fazë janë këto dy shkolla përfituese nga ky fond dhe punimet sipas tij do të fillojnë në pranëverën e vitit 2021.

Shala ka inkurajuar Komunën e Gjilanit, që të aplikoj edhe në thirrjet tjera që do të publikohen me projekte të kësaj natyre për objektet publike sin ë fushën e arsimit, shëndetësisë, apo të kulturës.

Ndërsa, drejtoresha Valbona Tahiri ka potencuar se ky fokus është orientuar në shkolla, me arsyen e krijimit të kushteve më të mira për nxënësit dhe personelin dhe njëkohësisht edhe modernizimin e hapësirave në bazë të normave evropiane.

“Shkollat përfituese në efiçiencë janë “Ibrahim Uruqi” në Bresalc, “Liria” në Pogragjë dhe “Dëshmorët e Kombit” në Livoç që financohen nga banka gjermane (KfW), pastaj me GIZ dhe Asociacionin e Komunave të Kosovës, kanë qenë përfituese shkolla “Vesel Muji” në Mihir të Bresalcit, ku ka përfunduar projekti. Me Ministrinë e Zhvillimit Ekonomik, përfitues kanë qenë shkolla “Thimi Mitko” dhe “Skenderbeu” në Përpelnicë dhe sot janë dy shkollat që nënshkruam marrëveshje me drejtorin Shala”, ka thënë ajo mes tjerash.

Për ndryshe, në kuadër të efiçiencës së energjisë, varësisht nga nevojat e shkollave është investuar në sistemin e ngrohjes, izolimin e kulmeve, termoizolimin e mureve, ndërrimin e poçave elektrik, të dyerve, dritareve dhe izolimin e dyshemeve.



 

Kalendari

Ngjarjet e datës 21 Shtator 2020

- Mbahet mbledhja e Qeverisë së Republikë së Kosovës. (Ndërtesa e Qeverisë, ora 8:30)

- Fillon Shkolla Verore e BE-së në të cilën do të shtjellohet temat për zhvillimin ekonomik, qëndrueshmërinë mjedisore dhe shfaqjen e pandemisë globale. (Zyra e Bashkimit Evropian në Kosovë, ora 9:00)

- Mbahet mbledhja e komisionit për të Drejtat e Njeriut, Barazi Gjinore, për Persona të Pagjetur dhe Peticione në të cilën do të votohet raporti i panelit përzgjedhës për shqyrtimin e aplikacioneve, intervistim dhe listën e ngushtë të kandidatëve për Avokat të Popullit. (Ndërtesa e Kuvendit, salla N302, ora 10:00)

- Ministrja e Punëve të Jashtme dhe Diasporës, Meliza Haradinaj Stublla takohet me Ambasadorin japonez, Mizutani Akira. (Kabineti i ministres Haradinaj Stublla, ora 10:00 - pa prezencen e mediave)

- Kryeministri i Republikës së Kosovës, Avdullah Hoti, pret në takim delegacionin e Qeverisë së SHBA-ve, të udhëhequr nga Kryeshefi Ekzekutiv i Korporatës Ndërkombëtare të Financave dhe Zhvillimit në SHBA Adam Boehler, të cilit do t’i bashkohet edhe i dërguari special i SHBA-së për dialogun Kosovë - Serbi, Richard Grenell, përfaqësues të USAID, Kryetarin e Bankës së Eksport-Importit të Shteteve të Bashkuara, si dhe zyrtarë të tjerë të lartë të qeverisë nga Departamentet e Energjisë dhe Tregtisë në SHBA. (Ndërtesa e Qeverisë, ora 10:00)
 
- Ministrja e Punëve të Jashtme dhe Diasporës, Meliza Haradinaj Stublla dhe Ambasadori japonez, Mizutani Akira, nënshkruajnë marrëveshjen për donacionin e radhës të Japonisë për Kosovën. (Ministria e Punëve të Jashtme dhe Diasporës, ora 10:30)

-  Komisioni Hetimor Parlamentar lidhur me procesin e privatizimit në Kosovë shqyrton listen e dëshmitarëve, përzgjedh ekspertët e jashtëm si dhe publikon adresën për dorëzimin e dëshmive nga qytetarët. (Ndërtesa e Kuvendit, salla N10, ora 11:00)

- Kryeministri Avdullah Hoti merr pjesë në përurimin e shtatores së Heroit Ahmet Krasniqi, si dhe në inaugurimin e sheshit, i cili do të mbajë emrin e tij. (Sheshi “Ahmet Krasniqi” në Vushtrri, ora 11:00)  

- Mbahet ceremonia e dorëzimit të pajisjeve mjekësore për Sallën e Operacionit dhe Sallën e Lindjes për gratë e infektuara me COVID-19, pajisje këto të financuara nga partneri jonë Raiffeisen Bank në Kosovë dhe AMC. (QKUK, ora 11:00)

- Kryetari i Autoritetit Kosovar të Konkurrencës, Valon Prestreshi, do të takohet me U.D i Kryesuesit të Bordit të Zyrës së Rregullatorit për Energji Arsim Janova, ku do të  nënshkruajnë një Marrëveshje Mirëkuptimi dhe Bashkëpunimi mes dy institucioneve, pas nënshkrimit të marrëveshjes do të ketë konferencë për medie. (Ish-objekti i Bankës së Lubjanës, kati i IV, ora 11:15)

- Seanca plenare e Kuvendit, e ndërprerë të premten do të vazhdojë sot. (Ndërtesa e Kuvendit, ora 13:00) 

- Kryeministri Avdullah Hoti pret në takim delegacionin nga Shtetet e Bashkuara të Amerikës, i cili po qëndron për vizitë në Kosovë. (Ndërtesa e Qeverisë, ora 18:30)