21 Shtator 2018

Gjermania i dhuron Kosovës mbi 5 milionë euro për menaxhimin e mbeturinave

Prishtinë, 15 maj - Qeveria e Kosovës e përfaqësuar nga Ministria e Financave dhe Qeveria e Republikës Federale të Gjermanisë, e përfaqësuar nga Banka Zhvillimore Gjermane (KfW), kanë nënshkruar sot dy Marrëveshje Grant për projektet “Programi i Menaxhimit të Mbeturinave të Ngurta”, në vlerë prej 4 milionë euro dhe ”Shërbime Profesionale të Pranuesit në Kuadrin e Programit II të Menaxhimit të Mbeturinave”, në vlerë prej 1.466 milionë euro.

Marrëveshja u nënshkrua nga ministri i Financave Bedri Hamza dhe drejtori i Departamentit të Infrastrukturës Komunale për Evropën Juglindore dhe Turqi në KfW Kirk Mildner, ndërsa pjesëmarrës ishte edhe zëvendësambasadori i Republikës Federale të Gjermanisë në Kosovë Jan Axel Voss.

Me këtë rast, ministri Bedri Hamza theksoi se bashkëpunimi me Qeverinë Gjermane ka prodhuar shumë projekte të cilat kanë përmirësuar ndjeshëm jetën e qytetarëve të Kosovës.

“Padyshim që sektori i ambientit është sektori i radhës ku do të investojmë pasi që nevojat janë jashtëzakonisht të mëdha në nivel lokal dhe qendror”, shtoi Ministri Hamza.

Ai bëri të ditur se Ministria, të cilën e drejton vazhdimisht është duke punuar së bashku me donatorë dhe Institucione Financiare Ndërkombëtare për të gjetur financim për realizimin e projekteve të rëndësishme për qytetarët e Kosovës.

“Këto investime, është e domosdoshme që ti bashkërendojmë edhe me rritjen e vetëdijes sonë si qytetarë për ruajtjen më të madhe të ambientit. Për mua sot është kënaqësi e veçantë, nënshkrimi i dy marrëveshjeve për sektorin e ambientit. Fjala është për dy projekte për Mbeturina të Ngurta, respektivisht: 1.46 milionë euro përdoren për studim fizibiliteti për identifikim të nevojave për investime shtesë në deponitë nacionale të mbeturinave dhe        4 milionë euro do të përdoren për masa investive për disa komuna të Kosovës të cilat përmes një konkursi nga GIZ-i kanë dalë fituese”, shtoi Ministri Hamza.

Ai gjithashtu bëri të ditur se “Komunat do të përfitojnë kontejnerë të llojeve të ndryshme për grumbullim dhe seleksionim, makineri dhe pajisje të tjera për ofrimin e shërbimeve të menaxhimit të mbetjeve të ngurta, pajisjet për pastrimin e rrugëve, materialet dhe pajisjet për përmirësimin e operimit dhe mirëmbajtjes, shërbime këshilluese të drejtuara kah planifikimi dhe zbatimi i masave të lartpërmendura”.

“Andaj, falënderoj shumë Qeverinë Gjermane, Bankën Gjermane për Zhvillim dhe GIZ-in, si dhe stafin e Ministrisë së Financave për mbështetjen në këtë projekt dhe projektet në sektorë tjerë. Pa ndihmën tuaj, shumë nga to nuk do të mund të realizoheshin”, shtoi Ministri Hamza.

Ministri Bedri Hamza gjithashtu bëri të ditur se që nga fillimi i mandatit të tij janë nënshkruar 72.4 milionë euro grante (para falë) dhe me marrëveshjet e sotme kjo mbërrin shumën prej 78 milionë eurove, për çka shprehi respektin dhe konsideratën më të madhe për partnerët dhe përkrahësit tanë.

Sekretarja e parë e Ambasadës së Republikës Federale të Gjermanisë në Kosovë Anja Becky, shprehi vlerësimin më të lartë me rastin e nënshkrimit të këtyre dy marrëveshjeve shumë të rëndësishme, ku sipas saj Qeveria Gjermane është krenare që i ofron këto grante sektorit të mbeturinave të ngurta në Kosovë.

“Javën e kaluar Republika Federale e Gjermanisë me disa aktivitete shënoi 10 vitet e  marrëdhënieve diplomatike me Republikën e Kosovës. Megjithatë, bashkëpunimi për zhvillim filloi shumë më herët dhe vitin e ardhshëm do të festojë 20 vitet e bashkëpunimit dhe nga pikëpamja jonë ky bashkëpunim ka qenë shumë i suksesshëm. Gjatë kësaj periudhe Gjermania me donatorë të tjerë kanë mbështetur shumë projekte në infrastrukturën komunale. Me një angazhim të fuqishëm është arritur një progres i madh në sektorin e Ujit dhe Ujërave të Zeza. Mbeturinat e ngurta janë sektori ku mungon një zhvillim përkatës dhe duhet të zhvillohen me tutje”, shtoi znj. Becky.

Ajo gjithashtu bëri të ditur se sot janë nënshkruar dy projekte me qëllim parandalimin e degradimit të mëtejshëm të mjedisit dhe përmirësimin e sektorit të mbeturinave.

“Një projekt i dedikohet studimit për deponitë. Studimi ka për qëllim të elaborojë pasuritë e Kompanisë së Menaxhimit të Deponive të Kosovës KLMC, kushtet aktuale dhe zgjidhjet potenciale të ardhshme. Me këtë studim ne jemi duke synuar për të identifikuar nevojat e menjëhershme për të investuar."

"Gjermania tashmë ka ndarë fonde të zotuara për të investuar në deponitë pasi të përfundojë studimi. Projekti i dytë është një shembull i mirë i bashkëpunimit financiar dhe teknik nga Qeveria Gjermane. Ky projekt do të sigurojë pajisje për të përmirësuar shërbimet në sektorin e mbeturinave për 16 komuna dhe 5 ndërmarrjeve të mbeturinave të ngurta” shtoi znj.Becky.

Ndërsa, drejtori i Departamentit të Infrastrukturës Komunale për Evropën Juglindore dhe Turqi në KfW Kirk Mildner, duke falënderuar Ministrin Hamza për angazhimin dhe bashkëpunimin e tij tha se ka nderin për të nënshkruar këto dy marrëveshje shumë të rëndësishme.

“Këto Marrëveshje janë dëshmi të një bashkëpunimi të shkëlqyeshëm të cilën e gëzojmë me miqtë tanë nga Qeveria e Kosovës. Në të kaluarën kemi arritur shumë, në veçanti në sektorin e ujit dhe të ujërave të zeza ku kemi investuar më shumë se 150 milionë euro në përmirësimin e furnizimit me ujë dhe ujërave të zeza. Dëshmi për këtë është furnizimi tanimë me ujë për 24 orë në Prishtinë gjë e cila ka munguar në të kaluarën, dhe kjo dëshmon punën e mundimshme të Qeverisë, Kompanive të Ujit dhe qytetarëve të Prishtinës” shtoi z. Mildner. 

Kalendari

Ngajrjet e datës 21 shtator 2018  - Kolegji “Tempulli” i mbeshtetur nga Oda Ekonomike Gjermane dhe Asociacioni Kosovar i Motorizimit organizojnë tryezë diskutimi për të shënuar Ditën Evropiane pa Viktima në Rrugë. (Ndërtesa e OEGJK, në Zonën Industriale në Fushë Kosovë, ora 9:00)

- Let’s Do It Kosova organizon aksioni i radhës në kuadër të fushatës “Ta Pastrojmë Kosovën”. (Pranë stadiumit “Fadil Vokrri”, ora 9:00)

- Kryeministri Ramush Haradinaj merr pjesë në aksionin e pastrimit në kuadër të Task Forcës “Ta pastrojmë Kosovën”. (Deponia pranë Stadium “Fadil Vokrri”, ora 9:00)

- Universiteti “Kadri Zeka” në Gjilan organizon provimin pranues për studentë të rinj. (Universiteti i Gjilanit, ora 9:00)

-  Oda Ekonomike Amerikane në Kosovë organizon tryezën e titulluar “Disponueshmëria e Fuqisë Punëtore në Kosovë”. (Salla e Konferencave Orion, ora 10:00)

- Projekti rajonal "Rrjeti i Veprimit për Ndërtimin e Ripërtritjes Urbane në Evropën Juglindore" organizon një ceremoni nënshkrimi të Marrëveshjes Ndër - Komunale për themelimin e rrjetit "Ripërtëritja nga Fatkeqësitë për komunat e Istogut, Klinës, Malishevës dhe Pejës”. (Hotel Swiss Diamond, ora 10:00)

- Kryeparlamentari Kadri Veseli bënë homazhe me rastin e rivarrimit të dëshmorit Ahmet Krasniqi. (Holli i Kuvendit, ora 10:00)

- Kryeministri Ramush Haradinaj bënë homazhe pranë arkivolit të Dëshmorëve të Kombit, Kolonel Ahmet Krasniqi dhe Qazim Jakupi. (Holli i Kuvendit të Kosovës, ora 10:00)

- Ushtrues i Detyrës së Ministrit të Mjedisit dhe Planifikimit Hapësinor, Fatmir Matoshi  do të vizitojë Komunën e Prizrenit, ku së bashku me kryetarin e kësaj komune, Mytaher Haskuka do të nënshkruajnë një memorandum bashkëpunimi për ndërtimin e deponisë së mbeturinave inerte. (Ndërtesa e komunës se Prizrenit, ora 10:15)  

-  Promovohet raporti 'Stafi Akademik i UP-së - studimet, angazhimet tjera, plagjiaturat, vlerësimet e profesorëve dhe përpjesa staf-studentë e studentë-hapësirë', mes tjerash, do të publikohen rastet e 16 profesorëve të Universitetit të Prishtinës që ndër vite kanë kryer plagjiaturë. (Qendra Informative Kulturore e BE-së, ora 11:00)

- Kryeparlamentari Kadri Veseli merr pjesë në manifestimin për 20 vjetorin e rënies së Dr. Lec Gradica. (Fshati Gradicë në Drenas, ora 12:00)

- Kryeministri Ramush Haradinaj merr pjesë në Akademinë Përkujtimore për Dëshmorët e Kombit, Kolonel Ahmet Krasniqi dhe Qazim Jakupi. (Teatri Kombëtar, ora 12:30)

- Kryeministri Ramush Haradinaj merr pjesë në Rivarrimin e Dëshmorëve të Kombit, Kolonel Ahmet Krasniqi dhe Qazim Jakupi. (Varrezat e Dëshmorëve, ora 14:00)

- Academic English Center KS  organizon ngjarjen e promovimit të librit të parë me thënje në gjuhën angleze, botim i parë i këtij lloji me autor kosovar i lindur në Libi. (Ambientin e qendrës Academic English Center KS, afër sheshit “Zahir Pajaziti” , mbrapa bankës TEB, ora 19:00)