19 Korrik 2018

Uzurpatorët barrikadojnë hyrjet për më shumë se 60 familje

Fushë Kosovë, 10 korrik - Një grup banorësh në lagjen “Dardania” në Fushë Kosovë ka më shumë se një vit qëkur ballafaqohen me disa uzurpatorë të hapësirës publike, të cilët me veprimet e tyre të paligjshme ua kanë pamundësuar qarkullimin e lirë dhe hyrjen nëpër banesat e tyre më shumë se 60 familjeve.
 
Janë dy lokale afariste, piceria “Love” dhe së fundi edhe kafeneja “Gala” ato që e kanë zënë krejtësisht, rreth e rrotull, hapësirën e rezervuar për parking të banorëve të banesës kolektive “Model Slovenia 2” në rrugën “Xhemajl Mustafa”.

Në këtë situatë pa autoritet shtetëror, banorët tashmë janë të shtrënguar për çdo ditë për konflikte fizike e verbale me uzurpatorët, për ta realizuar të drejtën e  tyre elementare: lëvizjen e lirë.

Autoritetet e komunës së Fushë Kosovës qysh prej vitit të kaluar janë në dijeni me hallin që kanë këta banorë, por ato, si duket, janë dorëzuar para uzurpatorëve.

Drejtori i Inspektoratit të komunës së Fushë Kosovës u ka thënë banorëve ankues se uzurpatorët nuk kanë leje për shfrytëzimin e këtyre hapësirave, por, siç është shprehur ai “Inspektorati është i pafuqishëm” për të ndërmarrë gjë në këtë drejtim, ati i janë marrë kompetencat Drejtorisë për Inspektorat, për të intervenuar në këso situatash.

 Sipas kryeinspektorit për këtë punë ekziston një komision komunal, por ai komision jo vetëm që nuk e kryen punën e vet, por i njëjti është krejtësisht jofunksional. Ky komision që zyrtarisht është emëruar “Komisioni Komunal për Lirimin e Hapësirave Publike”  ka këtë përbërje zyrtarësh të lartë  të Komunës: Adnan Bullatovci,  Milaim Shala, Abdullah Tërnava, Faton Berijani  dhe Feti Breznica.

Gjatë javës që shkoi, duke e parë mosndërhyrjen e autoritetit shtetëror, banorët janë ballafaquar verbalisht me pronarin e kafiterisë  “Gala” kur ai i hoqi kubëzat e trotuarit publik dhe brenda natës ndërtoi paligjshëm një platformë prej betoni si tavernë për kafietrinë e tij.

Në anën tjetër, piceria “Love” që ndodhet në pjesën këndore të objektit, tashmë prej më shumë se një viti e mbanë të barrikaduar hapësirën e rezervuar për parkim, me vazo të mëdha lulesh, biçikleta të vjetra, karroca marketi dhe rekuizita të ndryshme.

Banorët e shqetësuar me këtë situatë kanë dorëzuar tek autoritet e komunës së Fushë Kosovës edhe një peticion me kërkesën e largimit të këtyre pengesave, por situata nuk ka ndryshuar asnjëherë. 

Po ashtu, banorët disa herë kanë lajmëruar edhe policinë, por, si duket, edhe ata, duke e parë mosreagimin e pushtetit vendor, i kanë çuar duart dhe janë dorëzuar para uzurpatorëve. Ironia më e madhe e krejt kësaj pune qëndron në faktin se edhe disa nga zyrtarët e ekzekutivë të komunës së Fushë Kosovës janë banorë të kësaj lagjeje, por meqë ata kanë parking nëntokësor, për fqinjët e tyre hallegjinj nuk po çajnë kokën fare. 

Banorët e shqetësuar kanë thirrur një takim të përbashkët për t’i bashkërenduar veprimet e tyre, duke e shfrytëzuar të drejtën për t’u ankuar në nivele më të larta të shtetit, pasi që komuna e Fushë Kosovës vetëm ua merr taksat por nuk po ua mbron edhe të drejtat elementare.


 

Kalendari

Ngjarjet e datës 20 Korrik 2018  - Në Universitetin “Kadri Zeka ” në Gjilan mbahen provimet pranuese. (Universiteti “Kadri Zeka” në Gjilan, ora 9:00)

- Ministri i Kulturës, Rinisë dhe Sporti, Kujtim Gashi merr pjesë në vendosjen e gurthemelit të Pishinës Olimpike në në Prizren, investim i Ministrisë së Kulturës, Rinisë dhe Sportit. (Palestra Sportive “Sezai Surroi” Prizren, ora 10:30)

- Nisin punimet për ndërtimin e rrugës  në fshatin historik - turistik Belle. (Kilometri i-të  përgjatë rrugës në grykën e Deçanit  afër hotel Kalaja, ora 10:00)

- Grupi Parlamentar i Lidhjes Demokratike të Kosovës mban konferencën për media (Ndërtesa e Kuvendit, para sallës C301, ora 13:00)

- Ministri i Punëve të Jashtme i Republikës së Kosovës, Behgjet Pacolli do të pret në takim homologun e tij nga Republika e Maqedonisë, Ministrin e Punëve të Jashtme, Nikola Dimitrov. (Ndërtesa e MPJ-së, ora ora 13:15 - vetëm pamje)

- Ministri i Financave Bedri Hamza dhe menaxheri i Bankës Botërore për Kosovën Marco Mantovanelli nënshkruajn marrëveshje për financimin e projektit të Ekonomisë Digjitale në Kosovë në vlerë prej  20.7 milion euro. (Ndërtesa e Qeverisë, kati 11, ora 14:00)

- Ministri i Punëve të Jashtme i Republikës së Kosovës, z. Behgjet Pacolli do të pret në takim homologun e tij nga Republika e Maqedonisë, Ministrin e Punëve të Jashtme, Nikola Dimitrov mbajn konferencë për media do të mbahet. (Ndërtesa e MPJ-së, ora 14:00)

- Në përkujdesjen e Komunës së Deçanit Kryetarit, Bashkim Ramosaj në bashkëpunim më zyrën e diasporës organizohet hapja e  panairit - verorë  2018. (Qendra e qytetit të Deçanit, ora 16:00)

- Asociacioni i Agjencive për Zhvillim Rajonal organizon ceremoninë përmbyllëse të dhënies së Granteve. (Hotel Sirius, ora 17:00)

- Rritja e vetëdijës mbi migrimin, refugjatët dhe viktimat e konfliktit, si dhe eksplorimi i kulturës dhe identitetit përmes artit publik, bisedave dhe tregimeve, janë karakteristikat kryesore të ngjarjes 'Arti i Migrimit' që do të mbahet në Prishtinë. (Miqt Pub pranë Swiss Diamond Hotel, ora 17:00)