22 Shtator 2021

Qeveria miraton kandidatët për drejtorë të Bordit të AKP-së

Prishtinë, 3 gusht - Qeveria e Republikës së Kosovës, e drejtuar nga Kryeministri i Republikës së Kosovës, Albin Kurti, ka zhvilluar mbledhjen e saj të rregullt, të 22-tën me radhë, në të cilën ka miratuar vendimin për t’i propozuar Kuvendit të Republikës së Kosovës kandidatët për drejtorë të Bordit të Agjencisë Kosovare të Privatizimit.

Propozimi mbështetet në përgjegjësitë dhe obligimet kushtetuese të Qeverisë së Republikës së Kosovës dhe në Ligjin për Agjencinë Kosovare të Privatizimit.

Kryeministri Kurti gjatë propozimit të këtij vendimi ka thënë se në Programin qeverisës është paraqitur edhe ndryshim rrënjësor i statusit të Agjencisë Kosovare të Privatizimit.

“Është tashmë fakt i njohur se jo vetëm procesi i privatizimit ka paraqitur problem në shumë nivele: Së pari në qasje e në koncept, së dyti, në mënyrën se si është vepruar e manipuluar me jo pak raste, që janë vërejtur nga vendimet ndër vite të Agjencisë dhe të cilat janë paraqitur gjatë punës së komisioneve hetimore parlamentare.

Gjithashtu, në qershorin e vitit 2012, edhe kreu i kësaj agjencie, siç e dimë të gjithë, pati përjetuar një vdekje të dhunshme dhe duke marrë lëndime të shumta me thikë.

Në përputhje me përgjegjësitë tona kushtetuese e ligjore, po i propozojmë sot, Kuvendit të Republikës së Kosovës Bordin e Agjencisë Kosovare të Privatizimit. Presim që bordi i ri të marrë masat për të ndaluar proceset, që tashmë ne si Qeveri i kemi paraprirë, duke kërkuar ndaljen e tyre”, tha kryeministri Kurti.

Në këtë mbledhje të qeverisë u propozua për shqyrtim dhe miratim propozim- vendimi për t’i propozuar Kuvendit të Republikës së Kosovës kandidatët për drejtorë të Bordit të Agjencisë Kosovare të Privatizimit si në vijim:

1.      Nazmi Mikullovci;

2.      Syzana Dautaj-Surdulli;

3.      Mentor Hyseni;

4.      Vjollca Jashari;

5.      Violeta Arifi – Krasniqi;

6.      Xhevdet Neziraj;

7.      Halim Muçolli;

8.      Avni Ajdini.

Kryeministri tha se në këtë rast janë përfillur të gjitha kriteret ligjore e të tjera që janë të nevojshme për propozimin.

“Ky do të jetë bordi i fundit i AKP-së, i Agjencisë Kosovare të Privatizimit, në mënyrë që të hapim një etapë zhvillimore në Republikën e Kosovës, drejt Fondit Sovran, Agjencisë e Bankës Zhvillimore. Në këtë mënyrë tjetërsimet abuzive që janë bërë në të kaluarën, duke përfshirë aty edhe vdekjen enigmatike të ish-kreut të AKP-së, të jenë një periudhë që e tejkalon Kosova e pavarur, si shtet demokratik e që synon progres ekonomik për të gjithë pa përjashtuar asnjeri”, tha kryeministri Kurti.

Pas aprovimit, ky propozim vendim bashkë me biografitë e kandidatëve të propozuar i procedohen Kuvendit të Republikës së Kosovës për shqyrtim dhe për miratim.

 

Kalendari

Ngjarjet e datës 22 Shtator 2021

- Ministri i Shëndetësisë, Arben Vitia, raporton në Komisionin për Shëndetësi dhe Mirëqenie Sociale për menaxhimin e situatës me Covid-19. (Ndërtesa e Kuvendit, salla N302, ora 10:00)

- Ministria e Mjedisit, Planifikimit Hapësinor dhe Infrastrukturës në bashkë organizim me Komunën e Prishtinës, Policinë e Kosovës, OJQ-të shënojnë “Ditën Ndërkombëtare pa Makina”. (Para ndërtesës së Qeverisë, ora 10:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit shqyrton formon grupin punues për Projektligjin për Gjykatën Komerciale, shqyrton raportet e Komisioneve të përhershme  për Projektligjin për ndryshimin dhe plotësimin e Ligjit për përgjegjësinë disiplinore të gjyqtarëve dhe prokurorëve, etj,. (Ndërtesa e Kuvendit, salla N204, ora 10:00)

- Kryetari i Kuvendit të Republikës së Kosovës, Glauk Konjufca, pret në takim kryetaren e Kuvendit të Shqipërisë, Lindita Nikolla. (Kabineti i kryetarit, ora 10:00)

- Mbahet takimi i 203-të i Këshillit Prokurorial të Kosovës. (Përmes formës online, ora 10:00)

- Komisioni për Mbikëqyrjen e Financave Publike shqyrton rekomandimet e dala nga raporti i auditimit të performancës “Parandalimi dhe reagimi i situatave emergjente: Vërshimet”, etj. (Ndërtesa e Kuvendit, salla N10, ora 12:00)

- Komisioni për Buxhet, Punë dhe Transfere shqyrton Raportin vjetor financiar të Agjencisë Kosovare të Privatizimit, raportin vjetor Financiar i Agjencisë Kosovare për Krahasim dhe Verifikim të Pronëssi dhe Raportin vjetor Financiar i Institucionit të Avokatit të Popullit. (Ndërtesa e Kuvendit, salla C203, ora 13:00)

- Komisioni për Mbikëqyrjen e Agjencisë së Kosovës për Inteligjencë bën rishikimin e Planit të punës së Komisionit për sesionin vjeshtor. (Ndërtesa e Kuvendit, salla N302, ora 13:00)

- Instituti Kosovar për Kërkim dhe Zhvillim i Politikave dhe Qendra Kosovare për Studime të Sigurisë në bashkëpunim me Programi i Universitetit Columbia për Ndërtimin e Paqes dhe të Drejtat e Njeriut organizojnë një konferencë me temë 'Sfidat e Kosovës që vijnë Rusia dhe Kina' me Holden Triplett Agjenti Special i FBI -së dhe Drejtor për Kundërzbulimin në Këshillin e Sigurisë Kombëtare, ret. (https://zoom.us/j/98242813908?pwd=cFBiZGdMV3pRTTV3RDJBbTE5UEtVQT09, ora 16:00)