22 Tetor 2018

Kosova do t’i forcojë lidhjet ekonomike me Baden Wurttemberg-un

Prishtinë, 15 maj - “Partneriteti Kosovë - Gjermani prej dy dekadash është dëshmi e orientimit të Kosovës, drejt familjes evropiane”, kështu tha Kryeministri i Republikës së Kosovës Ramush Haradinaj, pasi priti në takim një delegacion nga shteti i Baden Wurttemberg, i kryesuar nga Gisela Erler – Këshilltare shtetërore.

Kryeministri Haradinaj tha se partneriteti me shtetin gjerman është strategjik dhe nuk ka asnjë argument apo pengesë që mund të na ndajë. Kjo është një e vërtetë historike dhe një e vërtetë që do ta ndërtojë të ardhmen tonë.

“Që nga viti 1999 Gjermania ka qenë prezentë në Kosovë, duke e ndihmuar vendin tonë nëpër të gjitha fazat e shtet ndërtimit. Tani kjo prezencë, e nisur nga ajo ushtarake që ka siguruar paqen, po shndërrohet në partneritet ekonomik."

"Ne kemi themeluar “Parkun Inovativ Trajnues” në Prizren, që do të jetë qendër ekonomike, edukuese dhe trajnuese, projekt i përbashkët me Gjermaninë”, tha Kryeministri Haradinaj, duke kërkuar nga delegacioni mbështetjen e Kosovës në fushat e ndryshme, veçmas në fushën e edukimit dhe në fushën e bujqësisë.

Kryesuesja e delegacionit gjerman, Gisela Erler falënderoi Kryeministrin Haradinaj për pritjen derisa tregoi që arsyeja e vizitës është thellimi i bashkëpunimit në mes të Kosovës dhe  Baden – Wurttemberg, veçmas në fushën e arsimit, me theks të veçantë programeve profesionale të edukimit dhe zhvillimin e bujqësisë.

“Ne jemi shumë të lumtur dhe tejet të interesuar si shtet, ta mbështesim Kosovën në rrugën e saj evropiane. Ajo që kemi parë në Kosovë është tejet mbresëlënëse. Dëshirojmë që këtë energji, ta konkretizojmë me projekte të tjera”, tha Erler kryesuese e delegacionit gjerman.

Kryeministri Haradinaj e njoftoi delegacionin me të gjitha të arriturat në Kosovë, me progresin në luftimin e korrupsionit dhe sundimin e ligjit, përmbushjen e kritereve për liberalizimin e vizave, progresin ekonomik dhe të arriturat e tjera në vend.

“Kosova ka bazën e përshtatshme ligjore të të bërit biznes, ka resurset humane dhe Ne mbështesim projektet gjermane në fushën e arsimit, teknologjisë, energjisë dhe bujqësisë ”, tha Kryeministri Haradinaj.

Pjesë e takimit ishte edhe zëvendës ambasadori gjerman në Kosovë, Jan Axel Voss, Blerim Canaj dhe Besnik Miftaraj nga Konsullata e Kosovës në Baden – Wurttemberg.

 

Kalendari

Ngjarjet e datës 23 tetor 2018 - Presidenti i Republikës së Kosovës, Hashim Thaçi, pret në takim deputetin e Parlamentit të Gjermanisë, Peter Beyer. (Kabineti i Presidentit, ora 9:00 - vetëm pamje)

- Ministri i Mbrojtjes të Malit të Zi, Predrag Boshkoviç viziton Ministrinë për Forcën e Sigurisë të Kosovës. (Ministria për Forcën e Sigurisë të Kosovës në Prishtinë, ora 9:25)

- Misioni i OSBE-së organizon punëtori për gazetarët me titull mediat në gjykatore në Gjykatat Themelore. (Gjykata Themelore në Prizren, ora 9:30)

- Mbahet mbledhja e Komisionit për Punë të Brendshme, Siguri dhe Mbikëqyrjen e Forcës së Sigurisë së Kosovës në të cilën do të behët formimi i grupeve punuese për Projektligjin për Ministrinë e Mbrojtjes, Projektligjin për Forcën e Sigurisë së Kosovës dhe Projektligjin për Shërbimin në Forcën e Sigurisë së Kosovës. (Ndërtesa e Kuvendit, salla N204, ora 10:00)

- Presidenti i Republikës së Kosovës, Hashim Thaçi pret në takim zëvendës-ndihmës sekretarin e shtetit amerikan, Matthew Palmer.  (Kabineti i Presidentit, ora 10:00 - vetëm pamje)

- Me rastin e vizitës së zotit Peter Beyer, deputet në Bundestag, në Kosovë, Ambasada Gjermane organizon një takim me gazetarë. (Ambasada Gjermane, ora 10:00)

- Policia e Kosovës organizon hapjen e  fushatës së titulluar “Dhuna nuk arsyetohet”.  (Sheshi ”Zahir Pajaziti”, ora 10:00)

 - Mbahet mbledhja e Komisionit për Mbikëqyrjen e Agjencisë së Kosovës për Inteligjencë në të cilën do të behët shqyrtimi i propozimit për mbështetjen e punës së AKI-së. (Ndërtesa e Kuvendit, salla N 10, ora 10:00)

- Grupi për Studime Juridike dhe Politike organizon panelin e diskutimit me temë “Performanca e sistemit gjyqësor dhe prokurorial sipas këndvështrimit dhe vlerësimit të qytetarëve". (Hotel Swiss Diamond, ora 10:30)

- Kryeministri i Republikës së Kosovës pret në takim zëvendës ndihmës Sekretarin e Shtetit Amerikan, Matthew Palmer. (Ndërtesa e Qeverisë, ora 10:45)

- Ministri për Forcën e Sigurisë të Kosovës, Rrustem Berisha dhe Ministri i Mbrojtjes të Malit të Zi, Predrag Boshkoviç mbajnë konferencë për media. (Ndërtesa e Ministrisë se FSK-së, ora 10:50)

- Mbahet mbledhja e Komisionit për Zhvillim Ekonomik, Infrastrukturë, Tregti, Industri dhe Zhvillim Rajonal në të cilën do të behët shqyrtimi i Propozim - vendimit të Qeverisë për kandidatet për kryesues të Bordit të ZRRE-së. (Ndërtesa e Kuvendit, salla N 303, ora 11:00)

- Instituti Demokratik i Kosovës mban konferencën për media në të cilën do të paraqiten rekomandimet e KDI-së, lidhur me të drejtat e punëtorëve në sektorin privat dhe rreziqet me të cilat përballen në vendin e punës. (Zyrat e KDI-së, ora 11:00)

- Presidenti i Republikës së Kosovës, Hashim Thaçi, pret në takim Ministrin e Mbrojtjes të Malit të Zi,  Predrag Bošković. (Kabineti i Presidentit, ora 11:20 - vetëm pamje)  

- Qendra për Paqe dhe Tolerancë në përkrahje nga OSBE dhe në bashkëpunim me Komunën e Vitisë dhe me shkollat e mesme në këtë komunë organizon aktivitetin e pastrimit të Parkut të Qytetit në Viti. (Parku i Qytetit në Viti, ora 13:00)

 - Mbahet mbledhja e Komisionit për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit në të cilën do të behët shqyrtimi i kërkesave të Këshillit Gjyqësor të Kosovës dhe Këshillit Prokurorial të Kosovës lidhur me Projektligjin për Pagat dhe Zyrtarët Publik. (Ndërtesa e Kuvendit, salla N204, ora 13:00)

- Kryeministri Ramush Haradinaj merr pjesë në mbledhjen e Qeverisë së Republikës së Kosovës. (Ndërtesa e Qeverisë, ora 14:00)

- Mbahet ceremonia e diplomimit të gjeneratës së parë të Shkollës së Lartë Profesionale - Cacttus Education. (Hotel Sirius, ora 15:00)