13 Prill 2021

Ekonomia globale parashikohet të rritet 6 për qind

Washington, 7 prill - Shpërndarja e vaksinave kundër koronavirusit dhe ndihmat masive qeveritare do të përshpejtojnë rritjen e ekonomisë globale në një nivel rekord këtë vit, një ripërtëritje e fuqishme nga recesioni i shkaktuar nga pandemia, parashikon Fondi Monetar Ndërkombëtar.

Agjencia huadhënëse, në të cilën marrin pjesë 190 vende të botës, tha të martën se pret që ekonomia botërore të rritet 6% gjatë vitit 2021, 5.5% që ishte parashikuar në janar. Kjo do të ishte rritja më e madhe e ekonomisë globale e shënuar nga FMN-ja që nga viti 1980.

FMN-ja parashikon që gjatë vitit 2022, rritja ekonomike ndërkombëtare do të jetë më e vogël 4.4%, por gjithsesi më e lartë nga parashikimi me 4.2% që u bë në muajin janar.

“Sa vjen e bëhet më e dukshme mënyra e daljes nga kjo krizë shëndetësore dhe ekonomike,” u tha gazetarëve kryekonomistja e FMN-së, Gita Gopinath.

Sipa vlerësimeve të fundit të ekonomistëve të Fondit Monetar Ndërkombëtar, ekonomia globale u tkurr 3.3% gjatë vitit 2020, pas recesionit shkatërrues që erdhi si rezultat i shpërthimit të pandemisë së koronavirusit në fillim të vitit të kaluar.

Kjo ishte shifra më e ulët vjetore në të dhënat e FMN-së, megjithëse jo aq e rëndë sa rënia prej 3.5% që agjencia kishte përllogaritur tre muaj më parë.

Parashikuesit thonë se pa ndihmën prej 16 trilionë dollarë të qeverive në shkallë botërore, që ndihmuan kompanitë dhe konsumatorët gjatë mbylljeve si rezultat i pandemisë, rënia ekonomike e vitit të kaluar mund të kishte qenë tre herë më e rëndë.

Ekonomia amerikane, më e madhja në botë, tani parashikohet të rritet 6.4% gjatë këtij viti, rritja më e shpejtë që nga viti 1984. Gjatë vitit 2022 ekonomia amerikane parashikohet të ketë një rritje 3.5%/.

Rritja e ekonomisë amerikane po mbështetet nga paketa e ndihmës së Presidentit Joe Biden me një vlerë prej 1.9 trilionë dollarë. Po ashtu përshpejtimi i vaksinimit po bën që shumë amerikanë të kthehen në jetën e tyre të përditshme.

Kina, me ekonominë e dytë më të madhe në botë, e cila vendosi rregulla të rrepta izolimi kundër koronavirusit një vit më parë dhe ishte e para që filloi rimëkëmbjen ekonomike, do të ketë një rritje 8.4% këtë vit dhe 5.6% gjatë vitit 2022, parashikon Fondi Monetar Ndërkombëtar.

FMN-ja prashikon që 19 vendet që përdorin monedhën euro të kenë një rritje të përbashkët ekonomike 4.4% këtë vit dhe 3.8% gjatë vitit 2022. Japonia pritet të ketë një rritje 3.5% këtë vit dhe 2.5% vitin që vjen.

Zonja Gopinath paralajmëroi se rimëkëmbja ekonomike ka gjasa të mos jetë e barabartë. Ripërtëritja pritet të jetë e ngadaltë në vendet e varfëra që nuk mund të përballojnë një stimul masiv qeveritar dhe për vendet që varen nga turizmi.

Dëmi ekonomik nga kriza shëndetësore po “përmbys arritjet në uljen e varfërisë” duke rritur numrin e të varfërve ekstremë me 95 milionë vitin e kaluar, krahasuar me parashikimet para goditjes së pandemisë.

Ajo gjithashtu parashikoi se “shumë prej vendeve të humbura të punës ka gjasa që të mos hapen më”. Kjo për shkak të prirjeve të nxitura nga pandemia, si përshembull shtimi i automatizimit dhe zgjerimi i tregtisë dixhitale, përmes internetit.

Një rimëkëmbje e shpejtë ekonomike në Shtetet e Bashkuara do të bënte që normat e interesit të rriten “në mënyra të papritura”, duke tronditur tregjet financiare dhe tërhequr investimet nga tregjet në zhvillim me borxhe të larta.

Sipas vlerësimit të FMN-së, ripërtëritja e ekonomisë globale do të humbasë gradualisht ritmin dhe do të kthehet tek nivelet para pandemisë, me rritje rreth 3%. Vendet përsëri do të përballen me pengesat që u ndeshën para pandemisë, përfshirë krahun e punës që po plaket në shumicën e vendeve të pasura dhe në Kinë.

Kalendari

Ngjarjet e datës 13 Prill 2021

- Mbahet mbledhja e Komisionit për Ekonomi, Industri, Ndërmarrësi dhe Tregti në të cilën do të behët konstituimi i Komisionit. (Ndërtesa e Kuvendit, salla N303, ora 10:00)

- Mbahet seanca gjyqësore kundër të pandehurit Basri Maksuti për vepren penale 'Falsifikimi i rezultateve të votimit'. (Gjykata Themelore në Ferizaj, ora 10:00)

- Mbahet mbledhja e Komisionit për Qeverisje Lokale, Zhvillim Rajonal dhe Media në të cilën do të behët konstituimi i Komisionit. (Ndërtesa e Kuvendit, salla N204, ora 10:00)

- Konstituohet Komisioni për Punë të Jashtme dhe Diasporë. (Ndërtesa e Kuvendit, salla N302, ora 10:00)

- Rolling Film Festivali i cili organizohet nga OJQ Roma Versitas Kosovo dhe Romawood mban konferencën për media. (Kino Armata, ora 11:00)

- Mbahet mbledhja konstituive e komisionit për Integrim Evropian. (Ndërtesa e Kuvendit, salla N10, ora 11:00)

- Mbahet mbledhja konstituive e komisionit për Shëndetësi. (Ndërtesa e Kuvendit, salla N302, ora 11:00)

- Fondi i Sfidave të Kosovës organizon eventin online për shpalljen e thirrjes së parë për shprehje interesi, në mbështetje të projekteve të trajnimit bashkëpunues. (Platforma Zoom, ora 11:00)

- Akademia Diplomatike e Ministrisë së Punëve të Jashtme dhe Diasporës dhe Ambasada e Republikës së Francës në Republikën e Kosovës, nënshkruajnë Memorandum Mirëkuptimi. (Ministria e Punëve të Jashtme dhe Diasporës, ora 11:30)

- Mbahet mbledhja konstituive e komisionit për Bujqësi, Pylltari, zhvillim Rural, Mjedis dhe Infrastrukturë. (Ndërtesa e Kuvendit, salla N303, ora 13:00)

- Partia Liberale Egjiptiane do të dorëzojë ankesë në Gjykatën Kushtetuese lidhur me te drejtën e tyre të mohuar nga PZAP-ja dhe Gjykata Supreme në lidhje orkestrimin e votave nga ana e “Romani Iniciativa” në vendbanime me shumicë të komunitetit Serb në zgjedhjet e parakohshme të 14 Shkurtit. (Gjykata Kushtetuese, ora 13:00)

- Mbahet mbledhja konstituive e komisionit për Arsim, Shkencë, Teknologji, Inovacion, KulturÑ‘, Rini dhe Sport. (Ndërtesa e Kuvendit, salla N302, ora 13:00)

- Aleanca Kosovare e Bizneseve mban konferencën për media lidhur me një studim hulumtues për qytetarët kosovar që vizituan Shqipërin dhe Malin e Zi, si pasojë e kufizimit dhe mbylljes në Kosovë e që këto patën pasoja ekonomike dhe financiare për vendin tonë. (Zyret e AKB-së, ora 13:30)