10 Gusht 2020

Do të ulet Barra Administrative për të rritur punësimin dhe investimet

Prishtinë, 14 korrik - Zëvendëskryeministri i parë i Republikës së Kosovës, ka biseduar sot me Drejtorin e Zyrës së GIZ-it në Kosovë, z. David Oberhuber, Shefen e Zyrës për Bashkëpunim për Zhvillim nga Ambasada Gjermane, znj. Anja Becky dhe udhëheqësin e ekipit të projektit të Qeverisjes Financiare, Kadri Sternberg.

Në këtë rast, ku është biseduar për Programin për Zvogëlimin e Barrës Administrative dhe legjislacionet të tjera të cilat Qeveria po i përkrah me qëllim që të kontribuoj në zhvillimin e një kornizë adekuate të politikave, bashkëbiseduesit u dakorduan që të bëhet ulja e barrës administrative, e cila do të ndikoj direkt në rritje ekonomike dhe do të krijoj mundësi për rritjen e investimeve.

Zëvendëskryeministri Tahiri, vuri theksin se Barrierat administrative janë si zinxhirë që e mbajnë ekonominë tonë poshtë. “Ne duhet t’iu japim bizneseve tona shanse të rriten në mënyrë që ata të investojnë dhe të punësojnë sa më shumë njerëz. Kësisoj ulja e barrës administrative me 30% do të na japë rritje ekonomike midis 1.6% dhe 3.6% të PBB-së”, tha zëvendëskryeministri Tahiri.

Po ashtu, zëvendëskryeministri Tahiri tha se ne duhet thyer zinxhirët, në mënyrë që të zhbllokojmë këtë rritje, duke eliminuar të gjitha procedurat e panevojshme, thjeshtuar ato që i duhen shoqërisë sonë dhe investuar në shërbime digjitale. Në këtë frymë, siç tha ai, politika për zvogëlimin e Barrës Administrative do të bëhet pjesë e pandashme e vendimmarrjes së Qeverisë. 

Në frymën e bashkëpunimit dhe partneritetit strategjik, u pajtuan të përqendrojnë përpjekjet në Ligjin për Qeverinë, Ligjin për Pagat dhe planifikimin e politikave qendrore dhe lokale.

Zëvendëskryeministri Tahiri, falënderoi Zyrën e GIZ-it në Kosovë dhe Ambasadën Gjermane për përkrahjen dhe udhëzimet e tyre të vazhdueshme për Qeverinë e Republikës së Kosovës dhe proceset e reformës në Kosovë. 

Kalendari

Ngjarjet e datës 11 Gusht 2020

- Ministri i Infrastrukturës, Arban Abrashi, do t’i vizitojë punimet në hekurudhën e Kosovës, linjën 10, në stacionin hekurudhor në Miradi. (Miradi, ora 10:00 - nisja për medie nga parkingu i Ministrisë së Infrastrukturës, ora 9:30)

-  Komisioni për Mbikëqyrjen e Financave Publike shqyrton Raportin e Auditimit për Ministrinë e Diasporës dhe Investimeve Strategjike, për vitin e përfunduar më 31 dhjetor 2019. (Salla e seancave plenare, ora 10:00)

- Ministrja e Kulturës, Rinisë dhe Sportit, Vlora Dumoshi, do të vizitojë Komunën e Malishevës ku do te takohet me kryetarin Ragip Begaj. (Objekti i Komunës, ora 10:00)

- Ministri i Drejtësisë, Selim Selimi raporton para Komisionit për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit diskuton lidhur me programin legjislativ për vitin 2020 respektivisht të Projektligjeve të Ministrisë së Drejtësisë si dhe për gjendjen në Institucionet Korrektuese në Republikën e Kosovës për shkak të Pandemisë me Covid-19. (Salla e seancave plenare, ora 13:00)

- Zëvendëskryeministri Besnik Tahiri viziton Fondin e Kursimeve Pensionale të Kosovës për të diskutuar rreth rimëkëmbjes ekonomike. (Ndërtesa e TRUST-it, Rruga "Agim Ramadani", ora 11:00)

- Instituti Demokratik i Kosovës organizon konferencën për media ku do të shpalosen gjetjet nga analiza e burimit të problemeve në mos zbatimin e rekomandimeve të Auditorit të Përgjithshëm nga komunat. (Zyrat e KDI-së, ora 11:00)

-  Komisioni për të Drejtat e Njeriut, Barazi Gjinore, për Persona të Pagjetur dhe Peticione shqyrton raportin e panelit përzgjedhës për shqyrtimin e aplikacioneve, intervistim dhe listën e ngushtë të kandidatëve për Avokat të Popullit. (Ndërtesa e Kuvendit, salla N302, ora 13:00)

-  Komisioni Hetimor Parlamentar në lidhje me menaxhimin e pandemisë së virusit COVID-I9 nga ana e Qeverisë së Republikës së Kosovës dëgon dëshmitë e dëshmitarëve. (Ndërtesa e Kuvendit, salla N10, ora 14:30)

- Organizata ETEA dhe Biblioteka “Hivzi Sulejmani” organizojn takim me shkrimtarin dhe kryetarin e Akademisë së Shkencave dhe Arteve, Mehmet Kraja. (Qendra për Edukim dhe Kulturë “Libart” në objektin e bibliotekës “Hivzi Sulejmani” në lagjen “Dardania”, ora 18:00)  .