03 Tetor 2022

Rriten deri në 216 për qind subvencionet në bujqësi

Prishtinë, 9 mars - Ministria e Bujqësisë, Pylltarisë dhe Zhvillimit Rural, përmes Programit të Pagesave Direkte/Subvencioneve siguron rritje deri në 216 për qind.

Kjo është bërë e ditur sot në konferencën e përbashkët të Ministrit të Bujqësisë, Pylltarisë dhe Zhvillimi Rural, Faton Peci dhe Kryeministrit të Qeverisë së Kosovës, Albin Kurti, të cilët kanë shpalosur në detaje politikat bujqësore që parashohin rritjen e subvencioneve në kuadër të Programit të Pagesave Direkte për vitin 2022.

Kryeministri Albin Kurti, ka treguar se Qeveria e Kosovës ka paraparë një buxhet prej afro 50 milionë euro për subvencione në sektorin e bujqësisë këtë vit, si dhe në kuadër të politikave bujqësore ai ka theksuar se e kanë rritur përkrahjen financiare për këtë sektor.

“Kemi bërë të ditur se programet e subvencionimit do të shpallen në këtë muaj  dhe nuk do kemi vonesa, por përkrahje rekorde për bujqit. Deri më tani, asnjë qeveri nuk i ka përkrahur bujqit dhe në kuadër të politikave bujqësore këtë vit ne po e shtojmë këtë përkrahje dhe buxheti për masat mbështetëse përmes Programit të Pagesave Direkte këtë vit arrin në afro 50 milionë euro nga 31 milion sa ishte planifikuar me buxhet."

"Në kuadër të përkrahjes, ne sot duke mbajtur zotimin e dhënë para qytetarëve, do subvencionojmë naftën për bujqit në vlerë prej 5 milionë euro, si dhe krahas kësaj ata do të subvencionohen edhe për plehërim pranveror në vlerë prej 8 milionë euro”, ka thënë Kryeministri Kurti.

Në anën tjetër, Ministri i Bujqësisë, Pylltarisë dhe Zhvillimit Rural, Faton Peci ka treguar se kanë adresuar politika të duhura bujqësore për t’iu kundërpërgjigjur rritjes së çmimeve përmes rritjes së mbështetjes për shumicën e kulturave të parapara në këtë program.

“Duke marrë parasysh nevojën e sigurisë ushqimore si siguri kombëtare dhe vështirësitë me të cilat po përballen bujqit dhe fermerët tanë, ndikimin e zhvillimeve në botë edhe në sektorin e bujqësisë, rritjen e çmimeve të inputeve bujqësore, farërave, naftës e të ngjashme, nuk kemi qëndruar duarkryq. Në kuadër të këtij programi, kemi vendosur që mbështetjen financiare ta rrisim për shumicën e kulturave."

"Po ashtu, për herë të parë që nga paslufta, fermerëve dhe bujqve tanë do t’iu subvencionohet nafta në vlerë prej rreth 5 milionë euro duke iu subvencionuar vlerën prej 0.36 cent për çdo litër naftë të përllogaritur me hektarët e poseduar të tokës së punuar”, ka treguar Ministri Peci, duke shtuar se njëherit do të subvencionohen inputet bujqësore për plehërim pranveror për grurin 150 euro për hektarë ndërsa për misrin, fasulen dhe pataten me 100 euro për hectare, me një vlerë totale prej 8 milionë euro.

Ndryshe, në kuadër të Programit të Pagesave Direkte për vitin 2022, kultura e grurit do të subvencionohet me 474 euro për hektarë apo 216 për qind më shumë se vitin e kaluar, misri për 119 për qind më shumë, patatja dhe fasulja për 118%, perimet në fushë të hapur për 85 për qind, perimet në serra për 100 për qind, viçat për majmëri për 150 për qind, si dhe shumica  e kulturave tjera bujqësore që mbështeten përmes këtij programi kanë rritje të përkrahjes përmes subvencioneve.

Po ashtu, në kuadër të masave mbështetëse të këtij programi, do të subvencionohet 75% e vlerës së Primit të Sigurimit për disa kultura bujqësore.

Kalendari

Ngjarjet e datës 4 tetor 2022

- Komisioni për Punë të Jashtme dhe Diasporë takohet me delegacionin e administratës së Parlamentit të Republikës së Austrisë. (Ndërtesa e Kuvendit, salla C203, ora 8:30)

- Misioni i Organizatës për Siguri dhe Bashkëpunim në Evropë organizon ceremoninë zyrtare të nënshkrimit të Memorandumit të Mirëkuptimit ndërmjet komunave të rajonit, Prishtinës, Obiliqit, Lipjanit, Podujevës dhe Fushë Kosovës dhe Qendrës për Mbrojtjen e Grave dhe Fëmijëve në Prishtinë. (Hotel Amazona, ora 10:00)

- Instituti Demokratik i Kosovës organizon tryezën e diskutimit gjatë të cilës do të shpalosën të gjeturat nga analiza e procedurave të prokurimit publik lidhur me shpenzimet publike të realizuara nga Ministria e Shëndetësisë dhe Shërbimi Spitalor Klinik Universitar gjatë periudhës 2020 – 2022. (Restorant Boho, ora 10:00)  

- Komisioni për Mbikëqyrjen e Financave Publike shqyrton raportin e Auditorit të Përgjithshëm për Raportn Vjetor Financiar të Buxhetit të Republikës së Kosovës për vitin 2021. (Ndërtesa e Kuvendit, salla N302, ora 11:00)

- Në kuadër të aktiviteteve kulturore artistike brenda institucioneve korrektuese, nesër në Qendrën Korrektuese për Femra në Lipjan, do të shfaqet Filmi “ Sffaragette”. (Qendra Korrektuese për Femra Lipjan, ora 11:00)

- Me rastin e 4 Tetorit, “Ditës Botërore për Mbrojtjen e Kafshëve”,  Ministria e Mjedisit, Planifikimit Hapësinor dhe Infrastrukturës në bashkë organizim me Agjencia e Ushqimit dhe Veterinarisë, OJQ-në Fondacioni për Mbrojtjen e të Drejtave të Kafshëve si dhe Fondacioni për mbrojtjen e kafshëve Vier Pfoten Kosova do të shënojmë këtë ditë në Pyllin e Arinjve Prishtina. (Fshati Mramor, afër liqenit të Badovcit, ora 11:00)
 
- Qendra Kryesore e Mjekësisë Familjare në Rahovec, përgjatë gjithë muajit tetor, si muaji i ndërgjegjësimit për kancerin e gjirit, çdo ditë pune ofron shërbimin e mamografisë falas për të gjithë. (Rahovec, ora 11:00)

- Ministri i Financave, Punës dhe Transfereve, Hekuran Murati së bashku me Ministren e Financave dhe Ekonomisë të Shqipërisë, Delina Ibrahimaj, Drejtorin e Përgjithshëm të Doganave të Kosovës Agron Llugaliu dhe Doganës së Shqipërisë Genti Gazheli do të inspektojnë punët në hapësirat e përbashkëta të Portit të Durrësit. (Porti i Durrësit, ora 12:00)

- Komisioni për Ekonomi, Industri, Ndërmarrësi dhe Tregti shqyrton në parim i Projektligjit për Sigurinë e përgjithshme të produkteve si dhe formon grupin e punës për mbikëqyrjen e zbatimit të Ligjit për komunikimet elektronike. (Ndërtesa e Kuvendit, salla N10, ora 12:00)