12 Nëntor 2018

Pastrohet një nga deponitë më të mëdha në Gjakovë

Gjakovë, 27 tetor - Në kuadër të Fushatës “Ta Pastrojmë Kosovën” sot është pastruar një nga deponitë më të mëdha ilegale në Komunën e Gjakovës në lagjen “Carrapatok”, nga ku u larguan dhjetëra thasë me mbeturina dhe rreth 20 kamionë mbetje interte.

Aksionit të sotëm iu bashkuan mbi 150 vullnetarë, kryeministri i Kosovës Ramush Haradinaj, deputetë, zyrtarë qeveritarë e komunalë, si dhe vullnetarë nga Organizata IFK.

Kryeministri i Kosovës, Ramush Haradinaj ka thënë se duhet angazhim maksimal që të largohet bërlloku që është hedhur qe 20 vite dhe të mos hidhet më.

Ai tha se Kosova po mburret me tema të tjera, siç është ushtria e liberalizimi i vizave, derisa në anën tjetër ende nuk është arritur vetëdijesimi i qytetarëve për ruajtjen e mjedisit të pastër.

Tutje, ai u bëri thirrje qytetarëve që të denoncojnë ndotësit e mjedisit, derisa paralajmëroi ndëshkime për ta.

“Ka veç një kohë që “Ta Pastrojmë Kosovën” i ka shpallur luftë bërllokut. Më vjen mirë që sot jemi në Gjakovë, në një vend që veçse ka vlerësim pozitiv në angazhimin për ambientin. Falënderoj të gjithë ata që sot po angazhohen për pastrim, duke filluar nga vullnetarët e deputetët, si dhe kryetari i Komunës."

"Dëshiroj të them dy fjalë: Kam qenë në Mal të Zi më ka lënë përshtypje gjithkund nuk e kam pa asnjë letër edhe ne duam të hyjmë në garë me fqinjët për një Kosovë të pastër. Duam të pastrojmë këtë që e kemi hedh qe 20 vjet edhe e dyta nuk do ta hedhim më. Qytetarët duhet ta dinë se do të ketë ndëshkim për ata që hedhin bërllok. Kemi hyrë në periudhën më kritike për një Kosovë të pastër, por edhe me mbajt të pastër."

"Do të kërkojmë angazhim nga policia, inspektorët e të gjithë për ruajtjen e mjedisit. Kërkojmë edhe nga qytetarët që të denoncojnë hedhjen e bërllokut. Ndëshkimet dhe dënimet kanë me qenë reale nuk ka me u lejuar me vazhduar se kemi ardhur deri këtu. Tash ne po mburremi me do tema të tjera, mburremi se po bëjmë ushtri, mburremi se po hyjmë në Interpol, e lypim liberalizimin e vizave a në fakt shikoni si e hedhim bërllokun”, ka thënë kryeministri Haradinaj.

Në anën tjetër, drejtori ekzekutiv i “Ta Pastrojmë Kosovën”, Luan Hasanaj bëri të ditur se në kuadër të Fushatës, deri më sot janë pastruar 322 deponi ilegale, nga ku janë larguar mbi 7 mijë ton mbeturina.

Ai bëri të ditur se aksioneve që u realizuan në kuadër të Fushatës “Ta Pastrojmë Kosovën” deri më sot iu bashkuan mbi 150 mijë vullnetarë, ndërsa ato do të vazhdojnë deri më 15 dhjetor. 

 “Deri më sot janë larguar 322 deponi ilegale të mbeturinave në Kosovë. Janë mbi 150 mijë qytetarë, vullnetarë që kanë marrë pjesë në aksionet për pastrimin e Kosovës. Pra, i bie që gjysma e deponive të mëdha në Kosovë tashmë janë larguar dhe me këtë dinamikë po vazhdojmë çdo ditë, në të gjitha komunat."

"Dua ta falënderoj kryetarin e Komunës së Gjakovës për angazhimin model që ka bërë deri më sot në komunë, ku ka pasur çdo ditë thuajse aksione. Mendoj se si komunë duhet të merret model nga komunat tjera që të vazhdojnë kështu dhe ta ruajmë Kosovën e pastër."

"Ashtu siç tha edhe kryeministri, prona publike duhet të trajtohet si pronë e përbashkët e të gjithëve, më së shumti prej neve qytetarëve. Sot jemi në mes të një lagjeje, që nuk po duket e varfër. Nuk e dimë pse e kanë shndërruar këtë hapësirë në deponi mbeturinash. Uroj që mos kthehemi më këtu për të larguar bërllok, por për ndonjë aktivitet të përbashkët që na hynë në punë të gjithëve”, ka thënë Hasanaj.

Aksioni i sotëm për largimin e mbeturinave nga deponia në lagjen “Carrapatok” u ndihmua edhe nga Kompania “Qabrati” dhe shpk “Mulaj”, të cilat larguan bërllokun me makineritë e tyre.

“Ta Pastrojmë Kosovën” ju njofton aksioni i nisur sot në këtë lokacion, do të vazhdojë edhe nesër nga kompanitë me makineri, deri në largimin e të gjitha mbetjeve.

Po ashtu, ju bëjmë të ditur se aktivitetet në kuadër të Fushatës “Ta Pastrojmë Kosovën” po vazhdojnë çdo ditë, në të gjitha komunat e Kosovës për eliminimin e deponive ilegale të mbeturinave.
 

Kalendari

Ngjarjet e datës 12 nëntor 2018 - Ministri i Punës, Skender Reqica, Ministri i MASHT-it, Shyqiri Bytyçi, Ministri i Shëndetësisë, Uran Ismaili dhe Ministri i Kulturës Rinisë dhe Sportit, Kujtim Gashi raportojn para Komisionit për të Drejtat e Njeriut, Barazi Gjinore, për Persona të Pagjetur dhe Peticione lidhur me zbatimin e Strategjisë Nacionale për të Drejtat e Personave me Aftësi të Kufizuar në Republikën e Kosovës 2013 - 2023. (Ndërtesa e Kuvendit, salla C 203, ora 10:00)

- Qendra e Inovacionit  dhe Oda Ekonomike Amerikane shënojn Javën Globale e Ndërmarrësisë. (Salla plenare e Kuvendit të Kosovës, ora 10:00)

- Kryetari i Kuvendit të Republikës së Kosovës, Kadri Veseli dhe Kryeministri Ramush Haradinaj merr pjesë në hapjen e Javës Globale të Ndërmarrësisë. (Kuvendi i Kosovës, ora 10:00)

- Grupi për Studime Juridike dhe Politike mban konferencën për media në të cilën prezanton një propozim për “Minimumin e një Platforme për Dialogun e Fazës Finale në mes të Kosovës dhe Serbisë” (Grupi për Studime Juridike dhe Politike, përballë Kino ABC, mbi Maxi Market, ora 11:00)

- Qendra e Lëvizjes në Prishtinë mban konferencë për media. (Sheshi "Adem Jashari", ora 12:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit takohet me Kryeministrin, Ramush Haradinaj, Ministrin e Drejtësisë, Abelard Tahiri dhe Ministren e Integrimeve Evropiane znj. Dhurata Hoxha lidhur me bashkërendimin e veprimeve lidhur me pakon legjislative dhe procesin e liberalizimit të vizave. (Ndërtesa e Kuvendit, salla  C-203, ora 13:00 - mediat mund të marrin pamje vetëm në fillim të takimit)

- Komisionin hetimor parlamentar në lidhje me ndriçimin e rastit të dëbimit të gjashtë shtetasve turq interviston ish-Drejtorin e Përgjithshëm të Policisë së Kosovës, Shpend Maxhuni. (Ndërtesa e Kuvendit, salla N 10, ora 13:00)

- Në kuadër të Fushatës “Ta Pastrojmë Kosovën” do të zhvillohet aksion pastrimi në Prishtinë. (Përreth hapësirave të Shkollës “Model”, ora 13:30)

- Ministri i MPMS-së, Skender Reçica, bën lansimin në konsultime publike të Koncept Dokumentit për Rregullimin dhe Menaxhimin e Fushës së Pensioneve dhe Beneficioneve, të hartuara nga MPMS. (Salla e konferencave në MPMS, ora 14:00)

- Kryetari i LDK-së Isa Mustafa, mban mbledhje me kryetarët e degëve të LDK-së. (Hotel Sirius, ora 16:00  - konferencë për medie, 17:30)