02 Dhjetor 2020

Ministria e bujqësisë 3 milion euro për mbjelljet vjeshtore

Prishtinë, 12 tetor - Ministria e Bujqësisë, Pylltarisë dhe Zhvillimit Rural, ka ndarë 3 milionë euro për subvencionimin e të mbjellave vjeshtore të grurit. Me qëllim të uljes së kostos prodhuese dhe stimulimit të fermerëve për rritjen e sipërfaqes së tokave të punuara, masa subvencionuese, krahas vitit të kaluar është rritur përreth 50 për qind dhe tanimë kanë përfunduar edhe përgatitjet për realizimin e këtij projekti.

Kriteret që fermerët duhet t’i përmbushin janë përcaktuar në bashkëpunim me drejtoritë komunale për bujqësi dhe zhvillim rural, me shoqatat e prodhuesve të drithërave, si dhe me Federatën Sindikale të Bujqve të Kosovës.

MBPZHR në pajtueshmëri me palët të cilat kanë kontribuar është përcaktuar në këto kritere: fermeri të jetë banor i përhershëm i Republikës së Kosovës, aplikacionet të tërhiqen nga zyret rajonale të MBPZHR-së, të posedohet fleta për sipërfaqen e tokës bujqësore të punueshme, sipërfaqet e pranueshme me mbjellje janë minimum 2 hektarë, si dhe ngastrat e marrura me qira të tokës bujqësore për mbjellje të jenë minimum 1 hektar i pandarë dhe të dokumentohen përmes kontratës së lidhur ndërmjet palëve.

Dokumentacioni i nevojshëm për aplikim është kopja e letërnjoftimit, kopja e kartelës së xhirollogarisë bankare valide, fleta poseduese mbi pronën, si dhe aplikacioni i plotësuar.
Njësia e Pagesave, e cila vepron në kuadër të MBPZHR-së, do të menaxhojë me pranimin e aplikacioneve dhe me kontrollin e ngastrave të mbjellura. Në rast të gjetjes së shkeljeve gjatë procedurës së kontrollimit, duke u bazuar në nenin 18 të Udhëzimit Administrativ nr. 04/2010, do të aplikohen edhe masa ndëshkimore.

Me qëllim që të kemi prodhimtari më të lartë dhe më të qëndrueshme të drithërave të bardha, me theks të veçantë të grurit, MBPZHR i rekomandon fermerët që për çdo paqartësi lidhur me procesin e mbjelljes, t’i drejtohen zyreve rajonale dhe shërbimeve këshillimore që veprojnë në kuadër të saj.
 

Kalendari

Ngjarjet e datës 2 Dhjetor 2020

- Sindikata e Infermierëve të Kosovës do të zhvilloj një takim me Minsitrin e Shëndetësisë, Armend Zemaj lidhur me kërkesat për rritje të pagesës së ndërrimeve të natës për infermier, pagesë të orëve shtesë dhe punës gjatë vikendeve si dhe për pagesë të rrezikshmerisë në punë. (Ndërtesa e Ministrisë, ora 8:30)

-  Komisioni Hetimor Parlamentar lidhur me procesin e privatizimit në Kosovë cakton datat e intervistave për dëshmitarë. (Ndërtesa e Kuvendit, salla N303, ora 9:00)

- Kryetari i Komunës së Prizrenit, Mytaher Haskuka dhe drejtoresha e Drejtorisë Komunale e Arsimit, Xhemile Thaçi - Vezgishi, do të marrin pjesë në përurimin e fillimit të punimeve për ndërtimin e aneksit të objektit shkollor “Naim Frashëri” në fshatin Vlashnje. (Vlashnje, ora 10:00 - Nisja nga Shtëpia e Bardhë, ora 9:30)

- Gjykata Kushtetuese e Republikës së Kosovës do të mbajë seancë dëgjimore publike në të cilën do të shqyrtohet kërkesa KO95/20, që për objekt të shqyrtimit ka: “Vlerësimin e kushtetutshmërisë së Vendimit të Kuvendit të Republikës së Kosovës Nr.  07/V-15, të miratuar më 3 qershor 2020, përkitazi me zgjedhjen e Qeverisë së Kosovës”. (http://gjk-ks.org/live-streaming/, ora 10:00)

- Lëvizja FOL organizon diskutim online ku do të publikohet raporti “Dështimet e Kuvendit në Funksionalizimin e Agjencisë për Informim dhe Privatësi”. (Diskutimi mbahet online përmes platformës ZOOM, ora 10:00)

- Komisioni për Buxhet dhe Transfere shqyrton raportin vjetor financiar i Këshillit Gjyqësor të Kosovës, Këshillit Prokurorial të Kosovës, Komisionit Qendror të Zgjedhjeve dhe Komisionit për Ndihmë Shtetërore si dhe Raportit të Ndihmës Shtetërore. (Ndërtesa e Kuvendit, salla C203, ora 10:00)

- Me rastin e 76 vjetorit të lindjes së ish-Presidentit Historik të Kosovës Dr. Ibrahim Rugova, kryesia e LDK-së bën homazhe te varri i tij. (Velani, ora 10:30)

- Organizata për Rritjen e Cilësisë në Arsim publikon raportin "Integriteti akademik, publikimi shkencor dhe justifikimi i titujve akademikë në Universitetin e Gjakovës". (Zyra e ORCA-s afër Librarisë Buzuku, ora 11:00)

- Kryeministri Avdullah Hoti merr pjesë në ceremoninë e inaugurimit të Kompleksit Memorial ‘’Dr. Ibrahim Rugova’’. (Istog, ora 12:00)

- Baleti Kombëtar i Kosovës mban konferencë për media me rastin e Premierës së shfaqjes “Sisters”. (Teatri Kombëtar i Kosovës, ora 13:00)

- Partia Demokratike e Kosovës mban konferencë për media në të cilen do të flasë shefi i Grupit Parlamentar, njëkohësisht, anëtari i Kryesisë, Bedri Hamza. (Zyret e Selisë Qendrore, ora 13:30)  

-  Komisioni Hetimor Parlamentar në lidhje me menaxhimin e pandemisë së virusit COVID-I9 nga ana e Qeverisë së Republikës së Kosovës interviston drejtoreshën e Barnatores Qëndrore në SHSKUK-së, Gezime Pllana. (Ndertesa e Kuvendit, salla N303, ora 14:00)

- Mbahet ceremonia e nënshkrimit të marrëveshjeve të bashkëfinancimit në lidhje me “Thirrjen publike për subvencionim të NMVM-ve me pronësi të grave ndërmarrëse”, ku prezent do të jetë edhe ministri Vesel Krasniqi. (objekti i MTI-së, ora 14:00)

- Me rastin e fushatës "16 ditë aktivizëm për dhunën ndaj gruas", në bashkëpunim me UNDP-në do të bëhet ndriçimi i Shtëpisë së Bardhë ku do të jetë i pranishëm edhe kryetari i Komunës, Mytaher Haskuka dhe përfaqësuesja e Përhershme e UNDP-së në Kosovë, Maria Suokko. (Shtëpia e Bardhë në Pirzren, ora 16:00)