09 Mars 2021

Ministri Mustafa përkrah avancimin e politikave për menaxhim me pyjet

Prishtinë, 28 tetor - Ministri i Bujqësisë, Pylltarisë dhe Zhvillimit Rural, Besian Mustafa, mori pjesë në eventin virtual të fillimit të projektit “Përkrahje për fuqizimin e menaxhimit të qëndrueshëm dhe shumëqëllimor të pyjeve për të përmirësuar jetesën në vendet rurale dhe adresimin e ndryshimeve klimatike në Kosovë”.

Në fjalën e tij, ministri Mustafa tha se, ky program do ta forcojë edhe më shumë administrimin e pyjeve.

“Jemi duke punuar drejt rimëkëmbjes së plotë të sektorit të pylltarisë dhe mbetemi të përkushtuar në ngritjen e pyjeve tona në kapacitetin, funksionalitetin dhe produktivitetin e tyre të plotë”, tha ministri Mustafa.

Tutje, ministri i MBPZhR-së shtoi se, ky projekt është tejet i rëndësishëm, duke pas parasysh që Republika e Kosovës, si pjesë të agjendës për aderim në Bashkimin Evropian, po vazhdon t’i përafrojë dhe harmonizojë edhe ligjet për pyjet.

“Si një vend i ri, me vullnet të madh, vazhdimisht po punojmë në një strategji dhe plan të ardhshëm për bujqësinë, pylltarinë dhe zhvillimin rural”, tha ministri Mustafa.

Ministri i MBPZhR-së, tutje shtoi se si Ministri, vazhdimisht po luftohet me zinxhirët e tregut informal të pyjeve dhe po pengohet prerja ilegale, jo vetëm për hir të ekonomisë së Kosovës, por edhe për të mbrojtur dhe ruajtur pyjet, asetin kryesor në menaxhimin e ndryshimit klimatik.

Në event morën pjesë edhe Ambasadorja e Suedisë në Kosovë, Karin Hernmarck, koordinatorja për Zhvillim të Agjencive të Kombeve të Bashkuara, Ulrika Richardson, shefi i Seksionit të Bashkëpunimit të BE-së me Kosovën, Luigi Brusa, si dhe udhëheqësi regjional i Organizatës për Ushqim dhe Agrikulturë (FAO), Raimund Jehle.

Ky projekt është bashkë organizim mes Organizatës për Ushqim dhe Agrikulturë (FAO) dhe Ambasadës së Suedisë në Kosovë dhe është i përkrahur nga zyra e Bashkimit Evropian dhe Ministria e Bujqësisë, Pylltarisë dhe Zhvillimit Rural.


-- 

Kalendari

Ngjarjet e datës 9 Mars 2021 - Institucioni i Avokatit të Popullit organizon një tryezë diskutimi në lidhje me publikimin e dy raporteve me rekomandime në të cilën do të merr pjesë edhe Presidentja Vjosa Osmani. (Hotel International Prishtina në Veternik, ora 9:30)

- Oda e Mjekëve ndan mirënjohje përkujtimore për mjekët që janë ndarë nga jeta gjatë vitit 2020 dhe  institucionet shëndetësore mbështetëse të rajonit të Prishtinës, për kontributin e dhënë në luftën kundër pandemisë. (Qendra e Telemjekësisë në QKUK, ora 10:00)

- Programi për Drejtësi Komerciale në bashkëpunim me Innovation Centre Kosovo, organizojnë diskutim rreth ngritjes të vetëdijes për bizneset fillestare të sapo themeluara dhe sipërmarrësit e rinj me fokus në drejtësinë komerciale, pjesa e sistemit të drejtësisë që siguron çasjen e bizneseve në drejtësi. (Innovation Centre Kosovo -https://www.facebook.com/ickosovo, ora 10:00)

- Mbahet ceremonia e zbarkimit të kontingjentit të Forcës së Sigurisë të Kosovës në misionin e parë paqësorë jashtë vendit në të cilën do të merr pjesë Presidentja Vjosa Osmani dhe Kryeministri në detyrë, Avdullah Hoti. (Salla e sporteve në kazermën ''Adem Jashari'', ora 10:45)   

- Partia Liberale Egjiptiane dorëzon ankesë në Gjykatën Supreme për anulimin edhe të pesë vendvotimeve tjera. (Gjykata Supreme e Kosovës, ora 11:00)