08 Dhjetor 2021

MBPZHR do të mbjell 1 milion fidanë për pyllëzim këtë vit

Prishtinë, 19 nëntor - Ministri i Bujqësisë, Pylltarisë dhe Zhvillimit Rural, Faton Peci i shoqëruar nga Ambasadorja e Suedisë në Kosovë, Karin Hernmarck, përfaqësuesit e “Ekipit të Gjelbër” nga Ambasada Amerikane, si dhe anëtarët e Shoqatës KUSA (Kosova United States Alumnis), kanë vizituar sot fshatin Ponesh të Komunës së Gjilanit, ku kanë parë nga afër aktivitetet e pyllëzimeve vjeshtore që janë duke u realizuar në këtë zonë.

Në kuadër të projektit të pyllëzimeve, që implementohet nga Agjencia Pyjore e Kosovës dhe MBPZhR-ja, do të mbillen 1 milion fidanë në gjithë territorin e Republikës së Kosovës.

Me këtë rast, Ministri Faton Peci theksoi se pyjet janë potencial i madh për zhvillim ekonomik dhe duke pasur parasysh këtë pyjet janë përfshirë si një nga prioritetet nacionale dhe janë paraparë një varg masash që do të ndërmerren.

“Duke marrë për bazë rëndësinë shumëdimensionale të pyjeve, që nga marrja e mandati tim kam ndërmarrë veprime konkrete që të ngrisim kontributin e sektorit pyjor në ekonominë kombëtare, nëpërmjet ofrimit të kornizës institucionale, dhe rregullativave mbështetëse."

"Në kuadër të këtij angazhimi gjatë këtij viti ne kemi finalizuar Strategjinë për Pyje 2021 - 2030, kemi themeluar Task Forcën Ndër-Institucionale për Pyje, si dhe po avancojmë legjislacionin përkatës respektivisht Ligjin për Pyje i cili është në proces të finalizimit”, ka thënë ministri Peci.  

Ndryshe, sipërfaqja pyjore në Kosovë mbulon diku rreth 44 për qind të territorit dhe këto resurse natyrore me vlera të shumta sociale dhe ekonomike, janë pasuri kombëtare që kanë potencial të madh për të kontribuar në zhvillimin e qëndrueshëm ekonomik të vendit tonë.

 

Kalendari

Ngjarjet e datës 8 dhjetor 2021

- Komisioni për të Drejtat dhe Interesat e Komuniteteve dhe Kthim shqyrton Projektligjin për tregtinë me produkte të naftës dhe karburante të ripërtërishme, dërgimin e Forcës së Sigurisë së Kosovës jashtë vendit, etj. (Ndërtesa e Kuvendit, salla N225, ora 10:00)

- Ambasada Franceze, Aleanca Franceze e Prishtinës dhe Espace Campus France, në bashkëpunim me Universitetin e Prishtinës dhe Universitetin AAB organizojnë hapjen e Panairit Universitar Francez në Kosovë i cili do tu mundësoj studentëve kosovarë të zbulojnë programet akademike të ofruara nga 30 universitete dhe 16 webinare nga Franca. (Universitetin AAB, ora 10:00)

- Ministri i  MMPHI Liburn Aliu raporton para Komisionit për Mbikëqyrjen e Financave Publike lidhur me raportin e auditimit të përformancës "Mbledhja, trajtimi dhe asgjësimi i mbeturinave komerciale”. (Ndërtesa e Kuvendit, salla N10, ora 10:00)  

- VentureUP në partneritet me Sustainability Leadership Kosova dhe financuar nga UNDP organizon ditën e garës finale e eko-startup-eve të Programit Green Hub. (Amfiteatri i objektit të Administratës Qendrore të Universitetit të Prishtinës, ora 10:00)

- Komisioni për Çështje të Sigurisë dhe Mbrojtjes shqyrtimin raportin me propozim-amendamente për Projektligjin për ndryshimin dhe plotësimin e Ligjit për Deminim Humanitar. (Ndërtesa e Kuvendit, salla N302, ora 11:00)

- Mbahet mbledhja e Kryesisë së Kuvendit të Republikës së Kosovës. (Ndërtesa e Kuvendit, salla C 301, ora 12:00)

- Të rinjte e iniciatives “Hajde në shkollë” organizojnë forum teatrin që ka për qëllim vetëdijësimin dhe parandalimin e braktisjes së shkollimit në mesin e të rinjve në komunën e Klinës. (Shtëpia e kulturës “Jehona e Dukagjinit” në Klinë, ora 14:00)

- Kosovo 2.0 dhe Fondacioni 17  organizojnë diskutimin lidhur me mobilizimin e komunitetit për ruajtjen dhe rikthimin e hapësirave të përbashkëta publike, me fokus në historinë e tri kinemave që i shpëtuan privatizimit. (Kino Armata, ora 17:00)

- OJQ “Zëri i Romëve, Ashkalive dhe Egjiptianëve” organizojnë diskutimin "Le të flasim" i cili synon të sjellë vëmendjen dhe ndërgjegjësimin tek audienca në lidhje me diskriminimin racor, martesat e hershme, gjuhën e urrejtjes në institucionet publike dhe rrugën e edukimit mbi dy dekada. (Kino Armata, ora 19:00)