04 Dhjetor 2020

Kosova dhe Sllovenia avansojnë bashkëpunimin në bujqësi

Prishtinë, 10 maj - Ministria e Bujqësisë, Pylltarisë dhe Zhvillimit Rural e Republikës së Kosovës dhe Ministria e Bujqësisë, Pylltarisë dhe Ushqimit e Republikës së Sllovenisë, sot nënshkruan një Memorandum Mirëkuptimi për mbështetjen e pjesëmarrësve në bashkëpunimin ekonomik, shkencor dhe teknik në fushën e bujqësisë, pylltarisë dhe industrisë për përpunimin e ushqimit.

Ministri i MBPZHR-së, Blerand Stavileci, shprehu bindjen se ky memorandum, përveçse që shumëfishon aktivitetet bilaterale, nëpërmjet implementimit dhe shkëmbimit të informatave dhe ekspertëve, fuqizon dhe ngritë edhe kapacitetet e strukturave institucionale.

“Në frymën e bashkëpunimit të mirë, duke pasur parasysh rolin e rëndësishëm të bujqësisë, pylltarisë dhe industrisë së agro-përpunimit në ekonominë e dy vendeve tona, si dhe dëshirën tonë për t’i përkrahur investimet dhe për t’i mbështetur edhe më tej pjesëmarrësit e bashkëpunimit ekonomik, shkencor dhe teknik në fushën të cilën e mbulojmë, ne sot po e nënshkruajmë edhe një Memorandum Mirëkuptimi, i cili përveçse që shumëfishon aktivitetet tona bilaterale, nëpërmjet implementimit dhe shkëmbimit të informatave dhe ekspertëve, fuqizon dhe ngritë edhe kapacitetet e strukturave tona institucionale”, tha ministri Stavileci.

Organizimi i ngjarjeve të ndryshme, simpoziumeve, seminareve, ekspozitave dhe panaireve në fushën e bujqësisë dhe industrisë së ushqimit, shtoi ministri Stavileci, si dhe bashkëpunimi në fushat tjera me interes reciprok, promovimi i së cilave parashihet edhe në Memorandumin e Mirëkuptimit, do të ndikojë në përmirësimin e komunikimit dhe integrimin e interesave të përbashkëta ndërmjet gjithë prodhuesve dhe konsumatorëve të vendeve tona.

 “Në kuadër të angazhimeve tona institucionale, ne synojmë të rrisim vëllimin e këmbimit tregtar të produkteve bujqësore dhe blegtorale, siç e dini, produktet e Sllovenisë janë prezente në tregun tonë dhe angazhimet tona dhe të komunitetit të biznesit, janë që t’i zgjerojmë kapacitetet dhe t’i shfrytëzojmë potencialet eksportuese edhe në aksin tjetër Kosovë-Slloveni”.

Ndërsa, Dejan Židan, ministër i MBPU-së së Sllovenisë, tha se bazamenti për të arritur marrëveshje efikase është krijuar nga raportet tona shumë të mira ndërinstitucionale dhe bashkëpunimi efikas ndërmjet vendeve tona, fillon që nga këtu. “Ne tani biseduam edhe sesi të përmirësojmë këmbimin e mallrave ndërmjet dy vendeve tona dhe sesi t’u krijojmë kushtet e duhura investitorëve slloven që të investojnë në vendit tuaj dhe unë i premtova ministrit Stavileci, që investimet e tilla do të kenë mbështetjen maksimale të ministrisë që unë drejtojë”.

"Jam i vetëdijshëm që shitblerja nuk është në nivelin e kënaqshëm dhe kemi deficite tregtare", shtoi ministri Židan, por do të ndërmarrim edhe hapa të tjerë konkret për interesin e dy vendeve tona.

“Ne, në kuadër të kompetencave që kemi si shtete, do të mundohemi që t’i identifikojmë përparësitë krahasuese të vendeve tona dhe t’i orientojmë ato në mënyrë të drejtë, për përmbushjen e interesave tona reciproke”, përfundoi z. Židan.

Ministri i MBPZHR-së, Blerand Stavileci dhe homologu i tij slloven, Dejan Židan, dje dhe sot kanë vizituar edhe kompaninë “Buçaj”, e cila është një prej kompanive që importon më së shumti prodhime sllovene, kompaninë “AgroVisioni”, e cila merret me kultivimin dhe eksportimin e dredhëzës dhe prodhimeve tjera bujqësore, si dhe e kanë vizituar edhe Agjencionin e Veterinës dhe Ushqimit.
 

Kalendari

Ngjarjet e datës 4 Dhjetor 2020 - Mbahet seanca fillestare për rastin e vrasjes së politikanit serb Oliver Ivanoviq pranë Gjykatës Themelore në Prishtinë, departamenti Special - krimet e rënda me c'rast avokati mbrojtës do te jep deklaratë për mediet pas seancës. (Gjykata Themelore në Prishtinë, ora 9:30)

- Guvernatori i Bankës Qendrore të Republikës së Kosovës, Fehmi Mehmeti do të mbaj një takim virtual me presidentin e Gjykatës Ndërkombëtare të Arbitrazhit Alexis Mourre dhe Drejtoreshën e Komisionit të Arbitrazhit për Evropë, Laetitia de Montalivet. (Takim virtual, ora 10:00)

- Kryetari i Komunës së Prizrenit, Mytaher Haskuka dhe drejtoresha e Drejtorisë së Kulturës, Rinisë dhe Sportit, Emilja Redzepi, do të bëjnë nënshkrimin e kontratave me përfituesit e thirrjes për përkrahjen e OJQ-ve dhe individëve në fushën e kulturës, rinisë dhe sportit. (Shtëpia e Bardhë në Prizren, ora 10:00)

- Qendra për Këshillim, Shërbime Sociale, dhe Hulumtime organizon aktivitetin “Tuneli i Fundit” në përkujtim të grave të vrara si pasojë e dhunës në familje në pesë vitet e fundit në Kosovë, dita e dytë. (Përballë ndërtesës së Kuvendit të Kosovës, ora 10:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit shqyrton shkresën e Artan Qerkinit përfaqësues i Malcolm Simmons, ish kryetar i Asamblesë së Gjyqtarëve të EULEX-it, “Përgjigje në ftesën për të dëshmuar para Komisionit për Legjislacion” si dhe njoftohet me shkresën e Përfaqësuesit Special të Bashkimit Evropian, Tomas Szunyong, për emërimin e Karin Hernmark Ahliny, Ambasador i Suedisë, anëtar i Bordit  Mbikëqyrës  të Agjencisë Kosovare për Verifikim dhe Krahasim të Pronës. (Ndërtesa e Kuvendit, salla N506, ora 10:15)

- Komisioni Hetimor Parlamentar mbi procesin e licencimit, operimit, mbikëqyrjes dhe aplikimit për lejet e hidrocentraleve në Republikën e Kosovës interviston Ministrin e Ministrisë së Infrastrukturës Arban Abrashin. (Ndërtesa e Kuvendit, salla N204, ora 11:00)

- Mbahet seanca e jashtëzakonshme e Kuvendit te Kosovës në të cilën do të behët shqyrtimi i dytë i Projektligjit për Rimëkëmbjen Ekonomike - COVID-19. (Ndërtesa e Kuvendit, ora 11:00)

- Organizata Etea dhe Aleanca Franceze në Prishtinë me mbështetjen e Ambasadës Franceze do të mbajnë takimin e parë të huazimit të librave. (Tek objekti i Aleancës Franceze, ora 11:00)

- Autoriteti Kosovar i Konkurrencës (AKK) mban konferencë për medie lidhur me një hetim ndaj ndërmarrjeve që operojnë në tregun e energjisë elektrike. (Ish-objekti i Bankës së Lubjanës, ora 11:15)

- Kryetari i Delegacionit të Kosovës, Ibrahim Makolli dhe ai i delegacionit të Serbisë Veljko Odalovic do të mbajnë konferencë për media lidhur me varrezën masive në Kizhevak të Serbisë. (Lokacioni i varrezës masive në Kizhevak  të Serbisë, ora 12:00)

- Shpallet aktgjykimi ndaj të akuzuarit N. M., i cili akuzohet nga Prokuroria Themelore e Gjilanit, për veprën penale “vrasje e rëndë” pasi qe në  fshatin Berivojcë, komuna e Kamenicës, i pandehuri dyshohet që pas mosmarrëveshjeve familjare, me një mjet të fortë - shufër metalike, godet bashkëshorten e tij në kokë dhe pjesë të tjera të trupit, me ç’rast të ndjerës i ka shkaktuar plagë të cilat kanë qenë vdekjeprurëse. (Gjykata Themelore Gjilan, ora 13:00)

- Komisioni Hetimor Parlamentar mbi procesin e licencimit, operimit, mbikëqyrjes dhe aplikimit për lejet e hidrocentraleve në Republikën e Kosovës interviston drejtoren e Insitutit Hidrometeorologjik të Kosovës Letafete Latifi. (Ndërtesa e Kuvendit, salla N204, ora 13:00)

- Komisioni Hetimor Parlamentar lidhur me procesin e privatizimit në Kosovë plotëson listën e dëshmitarëve. (Ndërtesa e Kuvendit, salla N10, ora 13:00)

- Qendra për Raste Gjyqësore Strategjike mban konferencë për media me rastin e dorëzimit të padisë për konflikt administrativ kundër vendimeve të Ministrisë së Ekonomisë dhe Ambientit dhe Zyrës së Rregullatorit për Energji”. (Para Pallatit të Drejtësisë, ndërtesa A, ora 14:00)

- Ministrja e Punëve të Jashtme dhe Diasporës e Republikës së Kosovës, Meliza Haradinaj-Stublla pret në takim ministrin në detyrë për Evropën dhe Punët e Jashtme i Republikës së Shqipërisë, Gent Cakaj ku pjesë e takimit do të jenë edhe përfaqësuesit e shqiptarëve të Luginës së Preshevës. (Objekti i MPJD-së, ora 14:00)