12 Gusht 2022

Fushata e korrje-shirjeve në Gjilan do të fillojë më 10 korrik

Gjilan, 4 korrik - Komuna e Gjilanit do të fillojë me fushatën e korrje-shirjeve më 10 korrik 2022.

Lajmi u bë i ditur pas takimit që pati me kombajnerët dhe fermerët kryetari i Komunës, Alban Hyseni, nënkryetarja Leonora Morina Bunjaku e drejtori i Bujqësisë, Bajram Isufi.

Kryetari Hyseni, nëpërmjet prezencës online, ka siguruar fermerët për rritjen e mbështetjes së vazhdueshme për ta me të gjitha kapacitetet komunale.

“Njëra prej zotimeve tona ka qenë që të bëjmë një databaze të të dhënave. Këtë databazë tashmë e kemi siguruar, e kemi hartuar një liste dhe i kemi të dhënat e kontaktet e secilit prej jush. Ajo çfarë neve na duhet tash është që databazën ta plotësojmë edhe me informacione tjera, siç është nevoja e mjeteve të punës”, ka thënë kryetari Hyseni.

Nënkryetarja e Komunës, Leonora Morina Bunjaku, ka thënë se duke e marrë parasysh faktin se fermerët kohëve të fundit janë ballafaquar me stuhi dhe me breshër, subvencionimet nuk do të mungojnë, si nga ana e Ministrisë së Bujqësisë e po ashtu edhe e Drejtorisë së Bujqësisë në Gjilan.

Kurse, drejtori për Bujqësi në Gjilan, Bajram Isufi, ka konfirmuar se është gjithçka gati për të filluar me fushatën e korrje-shirjeve, më 10 korrik, teksa bëri të ditur se kombajnerët kanë shprehur pakënaqësi lidhur me çmimin që është vendosur për ta nga Ministria e Bujqësisë, duke shfaqur shpresën që në ditët në vijim do të dakordohen për një çmim më të arsyeshëm.

“Si Komision komunal do ta mbikëqyrim dhe do t’i monitorojmë korrje-shirjet, do të jemi pranë fermerëve dhe kombajnerëve. Shpresoj që ky vit të jetë më i mirë dhe të ketë më shumë bereqet”, ka thënë Isufi.

 

Kalendari

Ngjarjet e datës 12 gusht 2022

 - Kryeministri i Republikës së Kosovës, Albin Kurti, bashkë me ministrin e Financave, Punës dhe Transfereve, Hekuran Murati, vizitojnë Doganën e Kosovës. (Drejtoria e Doganës, ora 8:30)

- Kuvendi nëpërmjet Grupit të Deputetëve të Rinj shënon Ditën Ndërkombëtare të Rinisë. (Salla plenare, ora 10:00)

- Komuna e Rahovecit organizon takimet B2B në kuadër të aktiviteteve të Muajit të Mërgimtarëve. (Restaurant Ura e Shenjtë, ora 10:00)

- Nisma e të Rinjve për të Drejtat e Njeriut – Kosovë ((YIHR KS) shënon Ditën Ndërkombëtare të Rinisë me një aksion rrugor me slloganin “Kur bohet mirë?!” (Sheshi “Nënë Tereza”, ora 12:00)

- Avokati i familjes Dehari, Tomë Gashi, mban konferencë për medie në lidhje me rastin e vdekjes së aktivistit të VV-së, Astrit Dehari. (Zyrat e Tomë Gashit, mbi Kino ABC, ora 12:00)

- Kryeministri i Republikës së Kosovës, Albin Kurti, bashkë me ministrin e Financave, Punës dhe Transfereve, Hekuran Murati, vizitojnë kompaninë “Rroni Fer” Sh.P.K. (Magjistralja Gjakovë-Prizren_kilometri i dytë, Objekti i ish-ndërmarrjes “Metaliku”, Gjakovë, ora 14:30)

- Qendra për Këshillim, Shërbime Sociale dhe Hulumtime organizon Festivalin e Rinisë për nder të Ditës së Rinisë. (Lagjja Taukbashqe, ora 18:00)

- Mbahet edicioni i parë i festivalit “MAL FEST”, i cili synon të jetë tradicional dhe objektiv e ka rininë dhe mërgatën e Komunës së Malishevës. Festivali organizohet nga Komuna e Malishevës në bashkëpunim me  organizatën “Values for Better Future”.(parku i qytetit në Malishevë, ora 19:00)

- Në kuadër të Akademisë Verore ‘’Arbën Xhaferi"  mbahet panel diskutimi me deputetët e rinjë të Kuvendit të Kosovës lidhur me rolin dhe rëndesin e të rinjëve në politikë. (Akademia për Siguri Publike të Kosovës, ora 19:30)