14 Dhjetor 2018

Caritasi Zviceran mbështet kultivimin e mjedrës dhe forcimin e fermerëve

Prishtinë, 14 dhjetor - Sot në prezencën e 100 pjesëmarrësve është mbajtur konferenca e dytë nacionale e mjedrës në Kosovë.

Qëllimi i konferencës ka qenë prezantimi dhe analiza e zhvillimit të sektorit të mjedrës në Kosovë, e cila është organizuar nga shoqata nacionale e mjedrës “Mjedra e Kosovës” e mbështetur dhe financuar nga Caritasi Zviceran.

Të pranishëm kanë qenë përfaqësuesit e ministrisë së bujqësisë, akterët kryesor në sektorin e mjedrës, organizatat ndërkombëtare, fermerët, kompanitë e grumbullimit dhe përpunimit të mjedrës, hulumtuesit dhe ekspertët e kësaj fushe.

Kreshnik Basha, shefi i zyrës së Caritasit Zviceran në Kosovë theksoi se “Caritasi Zviceran është prezent në sektorin e mjedrës nga viti 2009 duke mbështetur vazhdimisht kultivimin e mjedrës dhe forcimin e fermerëve individual si dhe zhvillimin e standardeve të prodhimtarisë integrale dhe organike të mjedrës në Kosovë”.

Konferenca është shfrytëzuar edhe për prezantimin e hulumtimeve, zhvillimeve, studimeve dhe standardeve të prodhimtarisë në këtë sektor.

Të gjeturat nga studimi i tregut dhe konkurrencës janë prezantuar nga znj. Ivana Dulic Markovic, eksperte e hulumtimit për zhvillimet bujqësore dhe konkurrencën. Krahasimi I tregut global, regjional dhe lokal si dhe zhvillimet e tyre janë analizuar.

Në kuadër të kësaj është publikuar dhe shpërndarë raporti i studimit të tregut të frutave manore në Kosovë si dhe libri për prodhimtarinë e integruar të mjedrës, dredhëzës dhe manaferrës.

Ky libër është financuar nga Caritasi Zvicëran dhe dedikohet në radhë të parë fermerëve, këshilltarëve, agronomëve, studentëve dhe ekspertëve që studiojnë botën bimore me aspekt të veçantë në kultivimin e bimëve dhe mbrojtjen e tyre nga dëmtuesit e ndryshëm.

Prezantuesit tjerë ishin nga organizatat e ndryshme si Z. Sami Uka dhe Z. Kujtim Lepaja nga shoqata nacionale e mjedrës “Mjedra e Kosovës”, Z. Ismet Osmani nga kooperativa bujqësore “Red Gold”, Z. Jeton Svirca nga “Herta Fruits”, Z. Bekri Xhemaili nga instituti bujqësor i Kosovës, Z. Marko Jagodic nga IPKO, dhe Mark Wood nga programi AGRO i USAID-it.

Në fund të konferencës pjesëmarrësit janë ndarë në dy grupe studimore duke dhënë rekomandime në fushën e zhvillimit të tregut dhe marketingut si dhe në fushën e këshillimeve bujqësore. 
.

Kalendari

Ngjarjet e datës 14 dhjetor 2018

- Mbahet seanca plenare e Kuvendit të Republikës së Kosovës në të cilën do të behët shqyrtimi i dytë i Projektligjit për Ministrinë e Mbrojtjes, shqyrtimi i dytë i Projektligjit për Forcën e Sigurisë së Kosovës dhe shqyrtimi i dytë i Projektligjit për shërbim në Forcën e Sigurisë së Kosovës. (Kuvendi i Kosovës, ora 10:00)  

- Në kuadër të “Javës Kundër Korrupsionit 2018” mbahet turneu kundër Korrupsion “Kosova Open 2018”. (Kino “Armata”,  ora 10:00)

- Misioni i Organizatës për Siguri dhe Bashkëpunim në Evropë në bashkëpunim me Asociacionin e Gazetarëve të Kosovës organizojnë tryezën "Roli i medias dhe shoqërisë civile në luftimin e korrupsionit". (Swiss Diamond Hotel, ora 10:00)

- Në kuadër të “Javës Kundër Korrupsionit 2018” mbahet tryeza me temë "Lufta Kundër Korrupsionit në Ballkan. (Hotel Sirius, ora 10:00)

- Në kuadër të Javës Kundër Korrupsion, Demokraci Plus organizon debatin publik në lidhje me gjetjet e monitorimit të prokurimit publik në Komunën e Prishtinës. (Hotel Sirius, ora 11:00)

- Let's Do It organizon aksion pastrimi në Plemetin të Obiliqt në kuadër të Fushatës "Ta Pastrojmë Kosovën". (Plemetin, ora 11:00)

- Aleanca Kosovare e Bizneseve dhe Qendra Tregtare "Plus Center “ organizon hapjen e ekspozimit dhe promovimit të prodhimeve vendore në kuadër të “Javëve të Biznesit Kosovar 2018” me moto: Unë Konsumoj Produkte Vendore, Po JU?. (Objekti i Qendrës Tregtare "Plus Center“ ne Ferizaj, ora 12:00)

- Koalicioni i OJQ-ve “Java Kundër Korrupsionit 2018” do të mbajë ngjarjen përmbyllëse të “Javës Kundër Korrupsionit 2018”, ku do të jenë prezent Ambasadorët e Shteteve Anëtare të QUINT, BE dhe Koalicioni i OJQ-ve. (Përpara Teatrit Kombëtar, ora 15:00)

- Fondi për të Drejten Humanitare organizon ligjëratën publike “Sot, 20 vite më parë: Rasti Panda”. (Qendra e Dokumentimit në bibliotekën Hivzi Sulejmani, rruga “Sadik Bekteshi” nr 16, ora 16:30)

- Federata Kosovare e Atletikës organizon manifestimin sportiv të atletikës "Laureatët e vitit – Gala Athletics2018”. (Miracle Beni Dona, Zona Industriale, ora 18:30)

- Shfaqet drama jokonvencionale e Mark Ravenhill lidhur me dy vëllezër identikë të cilët ritakohen pasi që janë rritur ndarazi më Gjermaninë lindore dhe perëndimore. (Ambienti i fondacionit “Shtatëmbëdhjetë”, rruga e Muzeu Etnologjik, ora 20:00)