05 Dhjetor 2022

Arrestohen 21 persona në aksionin e dytë për rastin “Subvencionet”

Prishtinë, 30 qershor - Policia e Kosovës ka vënë në pranga 21 zyrtarë sot në vazhdimin e aksionit që ka të bëjë me subvencionet në fushën e bujqësisë.

Aksioni që nisi në orët e hershme të mëngjesit përfundoi me arrestimin e 14 zyrtarëve të Agjencisë për Zhvillimin e Bujqësisë dhe 7 zyrtarëve në disa komuna të Kosovës.

Në një konferencë për media, prokurori i rastit, Rafet Halimi, tha se aksioni është zhvilluar në 5 komuna të Kosovës, përkatësisht në Prishtinë, Podujevë, Pejë, Gjilan dhe Istog.

Sipas prokurorit, të arrestuarit dyshohen për disa vepra penale dhe shumica prej tyre janë inspektorë.

“Janë arrestuar 21 të pandehur për shkak të dyshimit të bazuar se kanë kryer veprat penale: marrje ryshfet, dhënie ryshfeti, ushtrim ndikimi, keqpërdorim të detyrës zyrtare, legalizim i përmbajtjes së rremë dhe mashtrim me subvencione”, tha ai.

Sipas Prokurorisë, operacioni i sotëm është vazhdim i aksionit të datës 24 shkurt dhe 25 shkurt gjatë së cilit ishin arrestuar 12 të pandehur.

Prokurori Halimi nuk është përgjigjur në pyetjen se kur priten të ngrihen aktakuzat ndaj të pandehurve të arrestuar në aksionin e parë duke thënë se aksioni do të vazhdojë akoma.

Megjithëse ka thënë se pritet ekspertizë financiare, sipas prokurorit dëmi material në këtë çështje mund të llogaritet mbi 1 milion euro.

Përfaqësuesi i Policisë së Kosovës në konferencë për media i ka falenderuar qytetarët për informacionet e ofruara që i kanë ndihmuar zhvillimit të aksionit dhe u kanë bërë thirrje personave të prekur nga skema e dyshuar e mashtrimeve që të raportojnë rastet në Polici.

Arrestimet e datës 24 dhe 25 shkurt ishin bërë po ashtu nën dyshimet për keqpërdorim të subvencioneve, marrjes së ryshfetit dhe keqpërdorim të detyrës zyrtare.

Gjatë bastisjes në shtëpitë e personave të arrestuar ishin sekuestruar rreth 400 mijë euro.

Kalendari

Ngjarjet e datës 5 dhjetor 2022 - Kryetari i Kryeqytetit, Përparim Rama, do të nënshkruajë marrëveshjen me partneritet publiko privat për ndërtimin e tri shkollave të reja dhe ofrimin e shërbimeve të mirëmbajtjes dhe operimit në Komunën e Prishtinës. (Ndërtesa e Vjetër e Komunës së Prishtinës, ora 9:00)

- Instituti i Kosovës për Drejtësi, Grupi për Studime Juridike dhe Politike, Lëvizja Fol, Iniciativa për Progres, Çohu dhe Colombus organizojnë tryezë të rrumbullakët, ku do të diskutohet lidhur me “Reforma në Drejtësi”. (Hotel Sirius, ora 10:00)

- Ministrja e Drejtësisë, Albulena Haxhiu do të bëjë lansimin e Protokollit Shtetëror për Trajtimin e Rasteve të Dhunës. (Hotel Emerald, ora 11:00)

- Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022 interviston Njazi Thaçin, Luigj Imerin, Perparim Kabashin, Nagip Krasniqin, Faruk Hajrizin, Rrezarta Pllanën, Hysen Fazliun, Musa Misinin, Skender Hazirin, Ali Hamitin, Izet Rushitin dhe Krenar Bujupin. (Ndërtesa e Kuvendit, salla N204, ora 11:00)

- Presidentja e Republikës së Kosovës, Vjosa Osmani Sadriu pret në takim Ndihmës Administratoren e USAID-it, Erin E. McKee. (Kabineti i Presidentes,ora 12:00)

- Ministria e Kulturës, Rinisë dhe Sportit në bashkëpunim me UNICEF-it dhe UN Volunteers shënojnë Ditën Ndërkombëtare të Vullnetarizmit. (Kino Armata, sheshi “Zahir Pajaziti”, ora 13:00)

- Instituti i Kosovës për Drejtësi organizon tryezë të rrumbullakët, ku do të prezantohet raporti me titull “Parashkrimi i Korrupsionit”, i cili është rezultat i monitorimit sistematik që IKD i bënë sistemit Gjyqësor dhe atij Prokurorial të Republikës së Kosovës. (Hotel Sirius, ora 13:00)

- Zëvendësministri i Drejtësisë, Blerim Sallahu, do të hapë ekspozitën e të burgosurve rreth rasteve të Dhunës në Familje. (Hollin e Ministrisë së Drejtësisë, ish objekti Rilindja, ora 13:00)

- Këshilli Rinor Kosovar në bashkëpunim me Kuvendin e të Rinjëve të Ferizajt dhe Komunën e Ferizajt do të mbajë panelin e diskutimit dhe aktivitetin ‘Dita e Vullnetarizmit’ me qëllim të promovimit dhe diskutimit rreth punës vullnetare, nevojave të vullnetarëve dhe aktiviteti i tyre në këtë komunë. (Salla e Kuvendit Komunal në Ferizaj, ora 14:00)

- Lëvizja FOL në kuadër të  “Javës Kundër Korrupsion 2022” mban konferencë për media me ç’rast do të bëjë publikimin e raportit "Masat disiplinore kundër nëpunësit civil për korrupsion dhe shkelje etike". (Hotel Sirius, ora 15:15)

- Kryeministri i Kosovës, Albin Kurti pret në takim Ndihmës Administratoren e USAID-it, Erin E. McKee. (Zyra e Kryeministrit të Republikës së Kosovës, ora 15:45)            


- Komisioni Qendror i Zgjedhjeve mban mbledhjen e radhës. (Objekti i KQZ-së, ora 16:30)