17 Shkurt 2019

Thaçi: E ardhmja e miqësisë sonë me Amerikën është e sigurt

Washington, 8 shkurt - Presidenti i Republikës së Kosovës, Hashim Thaçi, mori mbrëmë pjesë në pritjen e organizuar nga Ambasada e Republikës së Kosovës në Uashington, për ndër të dhjetëvjetorit të pavarësisë së Kosovës.

Në këtë mbrëmje ishin të ftuar shumë përfaqësues të shtetit amerikan, personalitete të jetës politike dhe kulturore.

Kreu i shtetit, derisa shprehu falënderimin ambasadores Çitaku, për organizimin e kësaj ngjarjeje, falënderoi edhe të pranishmit e tjerë, që siç tha ai janë  këtu për të festuar një ditë shumë të veçantë për njerëzit e Kosovës.

Para shumë diplomatëve, presidenti Thaçi ka kujtuar ditën e shpalljes së pavarësie së Kosovës, duke e përshkruar si emocionuese.

 “Unë u bëra Kryeministër disa muaj më parë dhe nuk flija gjithë natën, sepse po përgatitesha ta lexoja Deklaratën e Pavarësisë së Republikës së Kosovës. Isha gati të deklaroja atdheun tim si të lirë, demokratik dhe të pavarur. Ajo ditë nuk ishte një ditë e zakonshme”, theksoi presidenti Thaçi.

Ai tha se si kurrë më parë, njerëzit në të gjithë vendin dhe shumë të tjerë që vinin nga e gjithë bota, mbushën rrugët dhe sheshet e ngushta të qytetit, duke shtuar tutje se shumica e tyre ishin të lumtur për kapitullin e ri dhe fillimin e ri, por shumë ishin të trishtuar, duke kujtuar sakrificën që dhamë për pavarësinë.

Sipas tij, mijëra njerëz vdiqën, dhjetëra mijëra gra që ishin përdhunuar, njerëz të panumërt humbën gjithçka për lirinë dhe pavarësinë tonë.

“Duke shkuar në ndërtesën e Kuvendit, po mendoja gjithashtu për babanë dhe nënën time, dhe shumë gjenerata të tjera që kishin jetuar nën aparteid, pa shkollim në gjuhën e tyre, pa tri elementet të cilat amerikanët i kishin cilësuar si më të rëndësishmet në Deklaratën Amerikane të Pavarësisë: lirinë, jetën dhe lumturinë”, theksoi ai.

Duke e cilësuar këtë moment si më të lumturin dhe më të rëndësishmin në jetën e tij, kreu i vendit tha, “Ishte momenti më i lumtur dhe më i rëndësishëm i jetës sime. Ishte momenti më i lumtur për popullin tim dhe ishte një moment i veçantë për të gjithë miqtë e Kosovës. Ishte një udhëtim i vështirë dhe i gjatë”, vijoi presidenti Thaçi.

Ai ka kujtuar ushtarët amerikanë që dhanë jetën për lirinë dhe pavarësinë e Kosovës, si dhe për paqen në Ballkan, miqtë e Kosovës këtu në Amerikë, të cilët besuan në ne. Sipas tij, ata ofruan dritë në errësirë dhe ata ofruan ngushëllim në kohë trishtimi.

“Njerëz si kongresmeni Engel, senatori Dole, kongresmeni Lantos - shumë, shumë të tjerë që besuan në ne. Kur erdhi puna tek Kosova nuk kishte rëndësi nëse ishit demokrat apo republikan, dhe - jam i lumtur të shoh – që nuk ka rëndësi as tani” theksoi ai.

Presidenti Thaçi tha se Kosova është i vetmi vend ku bulevardi i presidentit Klinton kryqëzohet me bulevardin e presidentit Bush, duke shprehur po kështu edhe falënderimin për diasporën.

“Diaspora jonë në Amerikë mësoi diçka të rëndësishme - duhet të punoni për të realizuar ëndrrat dhe ata kanë punuar shumë, kanë dhënë gjithçka për të realizuar ëndrrën e pavarësisë së Kosovës” tha presidenti Thaçi.

Kreu i vendit, ndër tjera tha se kurrë nuk do ta harrojmë natyrën e drejtë të luftës sonë, qëllimin e pastër të luftës sonë dhe rezultatin e bekuar të përpjekjeve tona. Në ditë të veçanta si kjo ne rikujtojmë të kaluarën, por dua të them një gjë për të ardhmen: “Unë jam i bindur tani, më shumë se sa isha i bindur kur lexova Deklaratën e Pavarësisë dhjetë vjet më parë - se e ardhmja e Kosovës dhe e ardhmja e miqësisë sonë me Amerikën është e sigurt”, vijoi presidenti.

Duke shtuar tutje se ne do të mbetemi një partner i besuar i bashkësisë ndërkombëtare, dhe në veçanti të Shteteve të Bashkuara.

“Kosova është një vend me popullsinë më të re në Evropë dhe synimi jonë për t’u bërë anëtar i BE-së, NATO-s dhe OKB-së do të arrihet”, theksoi ai.

I pari i vendit tha se jam krenar që jam President i shtetit më pro amerikan në botë, duke shtuar tutje se “Bota është një vend më i mirë sot për shkak të pavarësisë së Kosovës dhjetë vjet më parë”, tha në fund presidenti Thaçi.

Kalendari

Ngjarjet e datës 17 shkurt 2019 - Qeveria e Kosovës mban mbledhje festive për nder të 11-vjetorit të Pavarësisë. (Ndërtesa e Qeverisë, ora 8:00)

- Ngritja solemne e Flamurit të Republikës së Kosovës për nder të 11-vjetorit të Pavarësisë në të cilën marrin pjesë presidenti Hashim Thaçi, kreu i Kuvendit, Kadri Veseli dhe kryeministri Ramush Haradinaj. (Hapësira mes ndërtesës së Kuvendit dhe Qeverisë, ora 8:30) 

- Presidenti Thaçi, kryeparlamentari Veseli dhe kryeministri Haradinaj vendosin kurora lulesh te shtatorja e ish-presidentit Ibrahim Rugova. (Sheshi “Ibrahim Rugova”, para Kuvendit, ora 8:45) 

- Presidenti Thaçi, kryeparlamentari Veseli dhe kryeministri Haradinaj vendosin kurora lulesh në Kompleksin Memorial “Adem Jashari” në Prekaz. (Prekaz, ora 9:40)

- Në 11 vjetorin e shpalljes së pavarësisë të Kosovës, anëtarë të kryesisë së LDK-së bashkë më struktura të saj, bëjnë homazhe te varri i Presidentit Historik të Kosovës, Dr. Ibrahim Rugova. (Velani, ora 10:00)

- Komuna e Gjilanit organizon homazhe  te varrezat e dëshmorëve. (Gjilan, ora 10:00)

- Federata e Ping-Pongut e Kosovës (FPPK) organizon turneun “Dita e Pavarësisë”.  (ShMU “Tefik Çanga”, Ferizaj, ora 10:00)

- “Star Kids” do të performojnë në sheshin “Skënderbeu” për nder të Pavarësisë. (Sheshi “Skënderbeu” në Prishtinë, ora 10:00)

- Kuvendi i Kosovës mban seancë solemne për nder të 11-vjetorit të Pavarësisë. (Kuvendi i Kosovës, ora 10:45) 

- Komuna e Gjilanit organizon akademi solemne dhe program artistik nga Shkolla e Muzikës në Gjilan. (Teatri i Qytetit, ora 11:00)

- Trupat e Forcës së Sigurisë së Kosovë parakalojnë me rastin e 11-vjetorit të Pavarësisë së Kosovës. (Prej Sheshit “Nënë Tereza” deri te Sheshi “Ibrahim Rugova”, ora 12:20)

- Me rastin e 11-vjetorit të Pavarësisë së Kosovës organizohet koktej për të gjithë të ftuarit në Parakalimin e Trupave të FSK-së. (Hotel “Swiss Diamond”, ora 13:00)

- Dega e Lidhjes Demokratike të Kosovë në Gjilan bën përurimin e bustit të ish-presidentit Ibrahim Rugova (Gjilan, ora 13:00)

- Përfaqësues të organizatave studentore organizojnë një “protestë artistike” në lidhje me vonesën e liberalizimit për qytetarët e Kosovës. (Sheshi “Zahir Pajaziti”, ora 13:00) 

- Komuna e Vushtrrisë organizon manifestimin qendror për shënimin e 11-vjetorit të Pavarësisë. (Kalaja e Qytetit, Vushtrri, ora 13:00)

- Kryeministri Ramush Haradinaj pret në takim deputetët nga Mbretëria e Bashkuar, John Grogan dhe Martin Vickers. (Ndërtesa e Qeverisë, ora 14:00)

- Shoqata e Gastronomëve të Prishtinës, në bashkëpunim me Qeverinë e Kosovës, organizon një event simbolik për Pavarësi. (Sheshi “Skënderbeu”, ora 14:00) 

- Kryetari i Kuvendit të Kosovës, Kadri Veseli, dhe ministri i Kulturë, Rinisë dhe Sportit, Kujtim Gashi, përurojnë Palestrën Sportive në Shtime. (Shtime, ora 15:00)

- Kryeministri Ramush Haradinaj pret në takim delegacionin 17-anëtarësh nga Shtetet  e Bashkuara të Amerikës, të kryesuar nga Senatori James Inhofe. (Ndërtesa e Qeverisë, ora 15:00) 

- Komuna e Lipjanit organizon koncert festiv për 11-Vjetorin e Pavarësisë. (Qendra e Kulturës “Tahir Sinani”, Lipjan, ora 15:00)

- Ansambli Kombëtar i Këngëve dhe Valleve “Shota” mban koncert festiv për Pavarësi. (Sheshi “Zahir Pajaziti”, Prishtinë, 18:00)

- Për 11-vjetorin e Pavarësisë së Kosovës bëhet ndezja e organizuar e fishekzjarrëve. (Sheshi “Zahir Pajaziti”, Prishtinë, ora 18:30)

- Me rastin e 11-vjetorit të Pavarësisë së Kosovës organizohet pritja shtetërore nën përkujdesjen kryeministrit Ramush Haradinaj. (Hotel “Venus”, magjistralja Prishtinë-Ferizaj, ora 19:30)

- Mbahet koncerti festiv për nder të 11-vjetorit të Pavarësisë së Kosovës. (Sheshi “Zahir Pajaziti”, Prishtinë, ora 20:00)