24 Maj 2019

SHBA vendosin sanksione të reja ndaj Iranit

Washington, 10 maj - Një vit pasi Shtetet e Bashkuara u tërhoqën nga marrëveshja bërthamore e vitit 2015, Washingtoni vendosi sanksione të reja ndaj industrisë iraniane të metalit, ndërsa tensionet mes dy vendeve vazhdojnë të shkallëzohen.

Në Teheran të mërkurën, presidenti iranian Hassan Rouhani tha se vendi i tij do të pezullonte respektimin e disa kufizimeve të vendosura ndaj Iranit që janë pjesë e marrëveshjes bërthamore. Korrespondentja e Zërit të Amerikës Cindy Saine njofton nga Departamenti i Shtetit.

Vetëm disa orë pasi Presidenti iranian njoftoi se nuk do të respektonte më disa pjesë të marrëveshjes bërthamore, Presidenti Donald Trump njoftoi sanksione të reja ndaj eksporteve të produkteve iraniane të hekurit, çelikut, aluminit dhe bakrit. Shkallëzimi i tensioneve vjen ndërkohë që një grup i luftanijeve amerikane po dislokohet në Lindjen e Mesme pasi zyrtarët amerikanë cituan një "kërcënim të besueshëm" nga Irani.

Duke folur në Londër, Sekretari i Shtetit Mike Pompeo nuk i dha shumë rëndësi njoftimit iranian, duke thënë se ai ishte i paqartë.

"Ne do të duhet të presim dhe të shohim se çfarë veprime do të ndërmarrë Irani. Ata kanë bërë një numër deklaratash kërcënuese për të tërhequr vëmendjen e botës. Mbetet të shohim çfarë veprime konkrete do të ndërmarrin. Shtetet e Bashkuara do t’i vëzhgojnë veprimet e tyre".

Sekretari i Jashtëm britanik Jeremy Hunt e quajti marrëveshjen bërthamore një arritje të rëndësishme dhe i bëri thirrje Teheranit që të mos e shkelë atë.

"U bëjmë thirrje iranianëve të mendohen mirë para se të heqin dorë nga marrëveshja. Shkelja e marrëveshjes nuk është në interesin e askujt, sigurisht as në interesin e tyre, sepse në momentin kur ata bëhen fuqi bërthamore, edhe fqinjët e tyre do të bëjnë të njejtën gjë".

Zyrtarët amerikanë thonë se udhëheqësit e Iranit janë të izoluar financiarisht dhe në një pozicion shumë më të dobët që kur Shtetet e Bashkuara u tërhoqën nga marrëveshja bërthamore një vit më parë. Përfaqësuesi special për Iranin Brian Hook tha se Shtetet e Bashkuara shpresojnë të negociojnë një marrëveshje të re me Iranin, nëse udhëheqësit e tij zgjedhin një kurs të ri.

"Nëse klerikët në Teheran vendosin, ashtu siç po kërkon populli iranian, të veprojnë sipas rregullave, të respektojnë sovranitetin e fqinjëve të tyre dhe të respektojnë detyrimet dhe angazhimet ndërkombëtare, Shtetet e Bashkuara do të jenë të gatshme për t'u angazhuar", thotë Brian Hook, Përfaqësues Special i SHBA-ve për Iranin.

Rusia fajësoi Shtetet e Bashkuara për vendosjen e Iranit në një situatë të vështirë dhe i bëri thirrje nënshkruesve evropianë të marrëveshjes bërthamore që të përmbushin detyrimet e tyre.

Kalendari

Ngjarjet e datës 24 maj 2019 - Nisin punimet për rregullimin e rrugës kryesoret të qytetit të Deçanit Rrugës së  Qendrës konkretisht rrugës 'Luan Haradinaj' dhe 'Dëshmoret e Kombit'. (Në afërsi të pikës së karburantit Agonisi Gas në Carrabreg, ora 10:00)

- Mbahet mbledhja e komisionit për Mbikëqyrjen e Financave Publike në të cilën do të behët shqyrtimi i Raportit të Auditimit për raportet financiare dhe atyre të deklarimit financiar të subjekteve politike për vitin 2017. (Ndërtesa e Kuvendit, salla N 302, ora 10:00)

- Kryeministri Ramush Haradinaj merr pjesë në ceremoninë e fillimit të punimeve të rrugës së qytetit të Deçanit. (Sheshi i qytetit në Deçan, ora 10:00)

- Drejtori i Zyrës për Rritje Ekonomike i USAID-it në Kosovë, Brian Martalus, do të mbajë një fjalim në hapjen e Konferencës Ekonomike të Diasporës Shqiptare nga Evropa - B2B. (Hotel Emerald, ora 10:00)

- “Let’s Do It” mban aksion pastrimi në disa fshatra të Hasit, me moton “Për një Has të pastër”. (Fshati Gjonaj tek Ura e Drinit të Bardhë, ora 10:00)

- Drejtoresha e misionit të USAID-it Lisa Magno do të flasë me rastin e prezantimit të gjashtë video udhëzuesve për e-prokurim. (Hoteli Swiss Diamond, ora 10:00)

- Mbledhja e komisionit Ad-hoc për përmirësimin dhe forcimin e procesit zgjedhor në të cilën do të behët shqyrtimi i kërkesës së Grupit për Studime Juridike dhe Politike për pjesëmarrje në Grupin Këshillëdhënës. (Ndërtesa e Kuvendit, salla N 303, ora 10:00)

- Kryeministri Ramush Haradinaj me rastin e përvjetorit të rënies së 16 dëshmorëve të Batalionit Gardist “Shkëlzen Haradinaj” bën homazhe në Kompleksin Memorial “Dëshmorët e Kombit” në Gllogjan. (Kompleksi Memorial “Dëshmorët e Kombit” në Gllogjan, ora 11:00)

- Programi i Kombeve të Bashkuara për Zhvillim, Ministria e Punëve të Brendshme dhe Policia e Kosovës do të shënojnë së bashku Ditën Ndërkombëtare të Grave për Paqe dhe Çarmatim me një konferencë shtypi. (Ambientet e UNDP-së, ora 11:00)

- Kryeministri Ramush Haradinaj me rastin e përvjetorit të rënies së 16 dëshmorëve të Batalionit Gardist “Shkëlzen Haradinaj” bën homazhe në Fshatin Kodrali. (Fshati Kodrali, ora 11:30)

- Presidenti i Republikës së Kosovës, Hashim Thaçi, merr pjesë në Akademinë Përkujtimore për heroin Abdullah Tahiri. (Teatri Kombëtar i Kosovës, ora 12:00)

- Prokuroria Themelore e Pejës organizon konferencën për media ku temë diskutimi do jetë ngritja e dhjetëra aktakuzave për rastin e njohur në opinionin publik si “veteranët e rrejshëm”. (Objekti i Prokurorisë Themelore të Pejës, rruga “Hasan Cermaxhija”. ora 12:00)

- 44 nxënës nga klasa 7 deri në klasën 9, nga të gjitha regjionet e Kosovës do të takohen për të garuar në finalen e garës së tretë vjetore të gërmëzimit.  (Biblioteka kombëtare, ora 13:15)

- Ministria e Kulturës, Rinisë dhe Sportit organizon ceremoninë e ndarjes  së çmimeve “Nikete Dardani”. (Kabineti i Ministrit të Kulturës, ora 13:30)

- Organizuar nga Ministria e Diaspores dhe Investimeve Strategjike dhe Rrjeti i Bizneseve të Diasporës Shqiptare mbahet konferenca ekonomike e diasporës shqiptare nga Evropa më B2B. (Hotel Emerald, ora 20:00)

- Kryeministri Ramush Haradinaj merr pjesë në Konferencën Ekonomike të Diasporës Shqiptare nga Evropa, organizuar nga Ministria e Diasporës dhe Investimeve Strategjike dhe Rrjeti i Bizneseve të Diasporës Shqiptare. (Hotel Emerald, ora 20:00)