Washington, 4 tetor - Qeveria amerikane ka urdhëruar 15 diplomatë kubanë të largohen nga ambasada e Washingtonit brenda shtatë ditëve.

Kjo masë vjen pasi vetë ShBA-ja tërhoqi mbi gjysmën e stafit të vet nga ambasada e Havanës javën e kaluar, pasi dyshon për sulme me ultra tinguj ndaj disa prej anëtarëve të stafit të ambasadës.

Sekretari i Shtetit Rex Tillerson tha se SHBA po punojnë për "të siguruar barazinë" midis Shteteve të Bashkuara dhe Kubës duke dëbuar 15 nga diplomatët e saj.

Tillerson mori në mbrojtje vendimin e tij për të urdhëruar Havanën të tërheqë diplomatët. Ai tha se vendimi merret “pasi Kuba dështoi të ndërmarrë hapat e duhura për të mbrojtur diplomatët amerikanë".

Ai iu referua sulmeve të pashpjegueshme në Havanë që kanë dëmtuar së paku 22 punonjës të qeverisë amerikane dhe pjesëtarët e tyre të familjes.

Tillerson tha se SHBA po i mbajnë marrëdhëniet diplomatike dhe do të bashkëpunojë me Kubën ndërsa hetimi vazhdon. Por ai tha se vendimi i tij për të tërhequr 60 për qind të diplomatëve të SHBA nga ambasada në Havanë do të mbetet në fuqi derisa Kuba të garantojë sigurinë e diplomatëve amerikanë.

Ai tha se masa është e nevojshme për të "minimizuar numrin e diplomatëve të ekspozuar ndaj rrezikut".