22 Tetor 2021

Rusia përgjegjëse për vrasjen e Litvinenkos

Hagë, 21 shtator - Në një vendim të Gjykatës Evropiane të Drejtave të Njeriut të publikuar të martën thuhet se Rusia është përgjegjëse për vrasjen e një ish-oficeri të KGB-së në Londër në vitin 2006.

Alexander Litvinenko vdiq tre javë pas helmimit me një substancë radioaktive (polonium-210) e cila i ishte hedhur në çaj. Britania ka fajësuar prej kohësh Moskën lidhur me sulmin, i cili i çoi marrëdhëniet mes dy vendeve në nivelin më të ulët që pas Luftës së Ftohtë.

Po Rusia ka mohuar vazhdimisht përfshirjen në vdekjen e kritikut të Kremlinit që vdiq në moshën 43-vjeçare.

Një hetim i autoriteteve britanike doli në përfundimin në vitin 2016 se me gjasë Presidenti rus Vladimir Putin kishte miratuar një operacion zbulimi me synimin për të vrarë zotin Litvinenko.

Hetimi zbuloi gjithashtu se vrasja ishte kryer nga ish-truproja i KGB-së Andrei Lugovoy dhe një tjetër shtetas rus, Dmitry Kovtun dhe se me gjasë operacioni ishte drejtuar nga Shërbimi Federal rus i Sigurisë (FSB).

Pesë vjet më vonë edhe Gjykata Evropiane e Drejtave të Njeriut u pajtua me gjetjet e këtij hetimi.

Gjykata konstatoi se vrasja u krye nga zoti Lugovoy dhe zoti Kovtun. Por të dy këta të fundit kanë mohuar përfshirjen në këtë ngjarje.

Të martën, zoti Lugovoy i tha agjencisë së lajmeve Reuters se vendimi ishte “i motivuar politikisht” dhe “një budallallëk i madh”.

Në vendimin e Gjykatës Evropiane të Drejtave të Njeriut thuhet gjithashtu se shteti rus ishte fajtor për vrasjen e ish-oficerit të KGB-së.

Kalendari

Ngjarjet e datës 22 Tetor 2021

- Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione takohet me shoqaten e Familjeve të Heronjve dhe Dëshmorëve të Kombit për zgjidhjen e statusit të veprimtarëve invalidëve të plagosur para luftës çlirimtare në Kosovë. (Ndërtesa e Kuvendit, salla N10, ora 10:00)

- Shoqata për Teknologji të Informacionit dhe Komunikimit të Kosovës - STIKK organizon edicionin e 10-të të festivalit të teknologjisë “KosICT”. (Ambientet e “ITP Park” në Prizren, ora 10:00)

- Instituti Demokratik i Kosovës organizon konferencën “Ndikimi i dialogut me Serbinë në politikën e jashtme të Kosovës”. (Hotel Emerald, ora 10:30)

-  Komisioni Ad hoc për përzgjedhjen e kandidatëve për anëtar të Bordit të RTK-së shqyrton listën e kandidatëve të propozuar për anëtarë të Bordit të RTK-së. (Ndërtesa e Kuvendit, salla C203, ora 11:00)

- Ministria e Mbrojtjës organizon ceremoninë e betimit të rekrutëve të rijnë. (Kazerma e FSK-së “Skënderbeu” në Ferizaj, ora 11:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit miraton listën e ngushtë të kandidatëve për Drejtor të Agjencisë Kundër Korrupsionit. (Ndërtesa e Kuvendit, salla N204, ora 14:00)

- Nën patronatin e Presidentes së Republikës së Kosovës, Vjosa Osmani- Sadriu, organizohet premiera e filmit "Zgjoi". (Cineplexx -Albi Mall, ora 18:00)

- Mbahet edicioni i trtë i festivalit Lahuta, Okarina Polifionia. (Ambientet e Qendrës për zhvillimin e kultures tradicionale në Prishtinë, Rruga Xheladin Hana nr. 98, ora 18:30)