17 Shkurt 2019

Qeveria amerikane po shkon sërish drejt mbylljes

Washington, 9 shkurt - Qeveria amerikane po shkon sërish drejt mbylljes në mesnatë. Nëse ligjvënësit në Kongres nuk arrijnë të gjejnë një marrëveshje për çështjen e emigracionit dhe të miratojnë një buxhet, qeveria federale do të fillojë sërish mbylljen e saj të pjesshme.

Udhëheqësit e Senatit arritën dje një marrëveshje dypartiake, sipas të cilës qeveria federale do të financohet për dy vitet e ardhshme, duke lënë megjithatë pa zgjidhje çështjen e nxehtë të emigracionit.

“Askush nuk thotë që është e përsosur, por punuam shumë që të gjenim pikat e përbashkëta për t’i shërbyer popullit amerikan. Mbi të gjitha, kjo marrëveshje dypartiake do të heqë shkurtimet buxhetore që kanë dëmtuar forcat tona të armatosura dhe kanë rrezikuar sigurinë tonë kombëtare”, deklaroi Senatori Mitch McConnell, udhëheqës i shumicës në Senat.

Gjetja e pikave të përbashkëta në Dhomën e Përfaqësuesve mund të jetë më e vështirë. Udhëheqësja e pakicës demokrate, Nancy Pelosi, mbajti dje një fjalim prej 8 orësh në shenjë proteste. Ajo gjithashtu njoftoi se nuk do të mbështesë marrëveshjen për buxhetin nëse kreu republikan i Dhomës të Përfaqësuesve nuk zotohet të fusë për votim çështjen e ‘ëndërrimtarëve’, emigrantëve pa dokumenta të sjellë në SHBA kur ishin fëmijë.

“Nuk ka asgjë partiake apo politike të mbrosh ‘ëndërrimtarët’. Nëse do sillej për votim një projektligj për ta, do të miratohej njëzëri. Falenderoj ata kolegë republikanë që kanë folur me kurajo për këtë çështje. Megjithatë, fati i ‘ëndërrimtarëve’ mbetet pezull me një re frike dhe pasigurie mbi kokat e tyre. Burracakëria morale e republikanëve duhet të marrë fund”, deklaroi ligjvënësja Nancy Pelosi, udhëheqëse e demokratëve në Dhomën e Përfaqësuesve.

Nuk është e qartë nëse një marrëveshje dypartiake për buxhetin mund të mbërrijë në kohë brenda ditës së sotme në Dhomën e Përfaqësuesve, për të mbajtur në funksionim qeverinë federale.

Presidenti Trump ka sinjalizuar se e mbështet marrëveshjen e arritur në Senat, e cila parashikon rritje të shpenzimeve për mbrojtjen, vetëm një ditë pasi u duk se po mundohej të bindte ligjvënësit të lejonin mbylljen e qeverisë federale.

Demokratët bllokuan muajin e kaluar një projektligj financimi, duke shkaktuar një mbyllje tre-ditore të qeverisë federale, kryesisht për shkak të afrimit të datës së skadimit të programit DACA të administratës Obama, për emigrantët pa dokumenta të sjellë në SHBA në moshë të mitur.

Kalendari

Ngjarjet e datës 17 shkurt 2019 - Qeveria e Kosovës mban mbledhje festive për nder të 11-vjetorit të Pavarësisë. (Ndërtesa e Qeverisë, ora 8:00)

- Ngritja solemne e Flamurit të Republikës së Kosovës për nder të 11-vjetorit të Pavarësisë në të cilën marrin pjesë presidenti Hashim Thaçi, kreu i Kuvendit, Kadri Veseli dhe kryeministri Ramush Haradinaj. (Hapësira mes ndërtesës së Kuvendit dhe Qeverisë, ora 8:30) 

- Presidenti Thaçi, kryeparlamentari Veseli dhe kryeministri Haradinaj vendosin kurora lulesh te shtatorja e ish-presidentit Ibrahim Rugova. (Sheshi “Ibrahim Rugova”, para Kuvendit, ora 8:45) 

- Presidenti Thaçi, kryeparlamentari Veseli dhe kryeministri Haradinaj vendosin kurora lulesh në Kompleksin Memorial “Adem Jashari” në Prekaz. (Prekaz, ora 9:40)

- Në 11 vjetorin e shpalljes së pavarësisë të Kosovës, anëtarë të kryesisë së LDK-së bashkë më struktura të saj, bëjnë homazhe te varri i Presidentit Historik të Kosovës, Dr. Ibrahim Rugova. (Velani, ora 10:00)

- Komuna e Gjilanit organizon homazhe  te varrezat e dëshmorëve. (Gjilan, ora 10:00)

- Federata e Ping-Pongut e Kosovës (FPPK) organizon turneun “Dita e Pavarësisë”.  (ShMU “Tefik Çanga”, Ferizaj, ora 10:00)

- “Star Kids” do të performojnë në sheshin “Skënderbeu” për nder të Pavarësisë. (Sheshi “Skënderbeu” në Prishtinë, ora 10:00)

- Kuvendi i Kosovës mban seancë solemne për nder të 11-vjetorit të Pavarësisë. (Kuvendi i Kosovës, ora 10:45) 

- Komuna e Gjilanit organizon akademi solemne dhe program artistik nga Shkolla e Muzikës në Gjilan. (Teatri i Qytetit, ora 11:00)

- Trupat e Forcës së Sigurisë së Kosovë parakalojnë me rastin e 11-vjetorit të Pavarësisë së Kosovës. (Prej Sheshit “Nënë Tereza” deri te Sheshi “Ibrahim Rugova”, ora 12:20)

- Me rastin e 11-vjetorit të Pavarësisë së Kosovës organizohet koktej për të gjithë të ftuarit në Parakalimin e Trupave të FSK-së. (Hotel “Swiss Diamond”, ora 13:00)

- Dega e Lidhjes Demokratike të Kosovë në Gjilan bën përurimin e bustit të ish-presidentit Ibrahim Rugova (Gjilan, ora 13:00)

- Përfaqësues të organizatave studentore organizojnë një “protestë artistike” në lidhje me vonesën e liberalizimit për qytetarët e Kosovës. (Sheshi “Zahir Pajaziti”, ora 13:00) 

- Komuna e Vushtrrisë organizon manifestimin qendror për shënimin e 11-vjetorit të Pavarësisë. (Kalaja e Qytetit, Vushtrri, ora 13:00)

- Kryeministri Ramush Haradinaj pret në takim deputetët nga Mbretëria e Bashkuar, John Grogan dhe Martin Vickers. (Ndërtesa e Qeverisë, ora 14:00)

- Shoqata e Gastronomëve të Prishtinës, në bashkëpunim me Qeverinë e Kosovës, organizon një event simbolik për Pavarësi. (Sheshi “Skënderbeu”, ora 14:00) 

- Kryetari i Kuvendit të Kosovës, Kadri Veseli, dhe ministri i Kulturë, Rinisë dhe Sportit, Kujtim Gashi, përurojnë Palestrën Sportive në Shtime. (Shtime, ora 15:00)

- Kryeministri Ramush Haradinaj pret në takim delegacionin 17-anëtarësh nga Shtetet  e Bashkuara të Amerikës, të kryesuar nga Senatori James Inhofe. (Ndërtesa e Qeverisë, ora 15:00) 

- Komuna e Lipjanit organizon koncert festiv për 11-Vjetorin e Pavarësisë. (Qendra e Kulturës “Tahir Sinani”, Lipjan, ora 15:00)

- Ansambli Kombëtar i Këngëve dhe Valleve “Shota” mban koncert festiv për Pavarësi. (Sheshi “Zahir Pajaziti”, Prishtinë, 18:00)

- Për 11-vjetorin e Pavarësisë së Kosovës bëhet ndezja e organizuar e fishekzjarrëve. (Sheshi “Zahir Pajaziti”, Prishtinë, ora 18:30)

- Me rastin e 11-vjetorit të Pavarësisë së Kosovës organizohet pritja shtetërore nën përkujdesjen kryeministrit Ramush Haradinaj. (Hotel “Venus”, magjistralja Prishtinë-Ferizaj, ora 19:30)

- Mbahet koncerti festiv për nder të 11-vjetorit të Pavarësisë së Kosovës. (Sheshi “Zahir Pajaziti”, Prishtinë, ora 20:00)