17 Korrik 2019

Presidenti Thaçi dekoron edhe 50 personalitete në Shqipëri

Tiranë, 14 qershor - Presidenti i Republikës së Kosovës, Hashim Thaçi i cili prej se është president ka ndarë me qindra dekorata sot në 20 vjetorin e çlirimit të Kosovës, sot në Tiranë i ka dekoruar rreth 50 personalitete që kanë kontribuar për lirinë e Kosovës.

Presidenti Thaçi ka thënë se kontributi i shtetit shqiptar, i gjithë qytetarëve të Shqipërisë për lirinë e Kosovës, ka qenë shumë i madh.

“I filluam këto ditë të kremtimit të 20 vjetorit të lirisë së Kosovës së bashku me miqtë ndërkombëtarë, me mesazhet e presidentit Clinton, mesazhet e zyrtarëve të Shteteve të Bashkuara të Amerikës për progresin e arritur në Kosovë, për storien e suksesit të përbashkët vendor dhe ndërkombëtar, si dhe për garancën për të vazhduar tutje me progres, me zhvillim, me vlera euroatlantike dhe me Kosovën si vend të pavarur dhe sovran, si kontribuuese e jashtëzakonshme për paqen dhe stabilitetin në tërë Ballkanin Perëndimor, me vizion të qartë për të qenë në të ardhmen e afërt pjesë e NATO-s, Bashkimit Evropian, OKB-së dhe në raporte gjithmonë speciale me Shtetet e Bashkuara të Amerikës”, u shpreh presidenti Thaçi.

Edhe nga Tirana, presidenti Thaçi shprehu sërish mirënjohje të lartë për Shtetet e Bashkuara të Amerikës, për NATO-n dhe gjithë partnerët tjerë që kanë ndihmuar për lirinë dhe pavarësinë e Kosovës.

“Një gjë është e qartë, pa rolin e Ushtrisë Çlirimtare të Kosovës, pa rezistencën e armatosur të luftëtarëve të lirisë, të vajzave dhe djemve të Kosovës, që ndikuan të mobilizohet populli i Kosovës, të bashkohet si kurrë ndonjëherë në histori, nuk do ta kishim këtë liri dhe nuk do ta kishim as intervenimin e NATO-s. Ju e dini, ne kemi zhvilluar shpesh kryengritje, por kryengritjet tona kanë qenë lokale dhe pa ndonjë vizion të qartë politik dhe pa mbështetje të partnerëve. Kësaj radhe, UÇK-ja bashkoi popullin e Kosovës, UÇK-ja bashkoi të gjithë shqiptarët kudo që jetojnë, qoftë në Shqipëri, qoftë në Maqedoni, qoftë në Preshevë, qoftë në Mal të Zi, qoftë në diasporë. Të jeni të sigurt se kur kombi shqiptar u bashkua rreth luftës së Ushtrisë Çlirimtare të Kosovës dhe popullit të Kosovës për liri, atëherë edhe ndërkombëtarët u vunë në lëvizje dhe këtu kemi dëshmitarë të këtyre angazhimeve, përfaqësuesit më të denjë të këtij angazhimi kombëtar për liri, për pavarësi të Kosovës. Prandaj, u shpreh mirënjohje secili prej juve personalisht për rolin e jashtëzakonshëm edhe diplomatik, edhe politik, edhe ushtarak, edhe të gjithë segmenteve që ndikuan që bota të na përkrahë edhe më tepër”, shtoi presidenti Thaçi.

Kreu i shtetit ka thënë se duhet të jemi mirënjohës ndaj botës që na ndihmoi, por edhe të kemi një vlerësim për atë që ndodhi, sepse arritëm për herë të parë që ta vëmë në lëvizje NATO-n, dhe kjo nuk do të ndodhte pa kontributin dhe rolin dinjitoz të Shqipërisë.

“Prandaj, pa rolin e Shqipërisë, Kosova nuk do të ishte as e lirë, nuk do të ishte as e pavarur. Sikurse, pa mbështetjen e Shqipërisë, rrugëtimi ynë për NATO dhe Bashkim Evropian edhe tani do jetë shumë më i vështirë. Prandaj, ishim bashkë në periudhat më të rënda për kombin tonë, për lirinë dhe pavarësinë e Kosovës dhe jam i bindur që do të kemi rrugëtim të përbashkët edhe për NATO, edhe për Bashkim Evropian, me mbështetje të plotë të Shqipërisë”, ka thënë presidenti Thaçi.

Presidenti i vendit, Hashim Thaçi, në fund ka shprehur mirënjohje dhe falënderim për çdo familje shqiptare në Republikën e Shqipërisë.

“U shpreh mirënjohje dhe falënderim çdo familjeje shqiptare që hapi derën, hapi zemrën për shqiptarët nga Kosova, të cilët u detyruan të zhvendosen nga spastrimi etnik i Sllobodan Millosheviqit, kur kryente gjenocid në Kosovë. Dëshiroj të falënderoj secilin prej jush që e thatë të vërtetën kudo që kishit mundësitë, nga përgjegjësitë institucionale që kishit, qoftë në institucione, qoftë në media apo në diplomaci. Ishit së bashku me neve në Rambuje, ishit së bashku më ne gjatë bombardimeve të NATO-s, ishit së bashku me ne në mbështetje edhe operative për luftëtarët e lirisë së Kosovës”, ka thënë ai.

“Faleminderit, Shqipëri. Faleminderit popullit të Shqipërisë për kontributin e dhënë për lirinë dhe pavarësinë e Kosovës!”, përfundoi presidenti Thaçi.

Kalendari

Ngjarjet e datës 17 korrik 2019 - Koalicioni i OJQ–ve për Mbrojtjen e Fëmijëve në Kosovë organizon konferencë të jashtëzakonshme për media lidhur me rastin e fundit i vdekjes së fëmijës në rrethana të dyshimta në Fushë Kosovë. (Hotel Sirius, ora 10:00)

- Lansohet Plani i Integritetit të Ministrisë së Mbrojtjes të Republikës së Kosovës. (Ndërtesa e Ministrisë se Mbrojtjes, ora 10:00)

- Me rastin e shënimit të “Epopesë së Korrikut 1998’’ në Rahovec, Komuna e Rahovecit do të bëj homazhe dhe ndërim për të rënet. (Rahovec, ora 10:00)

- Kryetari i Gjykatës Themelore të Gjilanit, Ramiz Azizi do të mbajë konferencë për media. (Objekti i Gjykatës Themelore në Gjilan, Kati i III, Salla 306, ora 10:30)

- Komisioni për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi mban dëgjim publik lidhur me mbikëqyrjen e zbatimit të Ligjit për Trashëgiminë Kulturore. (Ndërtesa e Kuvendit, salla C 203, ora 11:00)

- Policia e Kosovës do të mbajë një konferencë për media, ku do prezantohet raporti gjashtëmujor  janar-qershor 2019 duke u fokusuar edhe në aktivitetet më të rëndësishme të policisë gjatë kësaj periudhe. (Stacioni policor Qendra në Prishtinë, ora 11:00)

- Kryeministri Ramush Haradinaj pret në takim Azgan Haklaj, president i Unionit Artistik të Kombit Shqiptar. (Ndërtesa e Qeverisë, ora 11:00)

- Ministria e Tregtisë dhe Industrisë organizon panairin “Gratë në Biznes dhe artizanate tradicionale” në të cilin do të marrin pjesë rreth 32 biznese dhe shoqata të grave ndërmarrëse nga komunitete të ndryshme të Kosovës. (Sheshi “Para Teatrit” në Gjilan, ora 11:00)      
 
- Ministria e Infrastrukturës dhe Transportit në bashkëpunim me Policinë e Kosovës lanson fushatën vetëdijësuese “10 Rregullat e Arta të Sigurisë Rrugore. (Pika kufitare e Merdares, ora 11:00)

- Partia Socialdemokrate mban konferencë për media. (Zyrët qendrore të PSD-së në lagjen Arbëria, ora 11:30)

- Komuna e Rahovecit organizon akadmi përkujtimore me rastin e 21 vjetorit shënimit të “17 korrikut - Epopesë së Rahovec’’. (Shtëpia e Kulturës 'Mentor Zyberaj" në Rahovec, ora 12:00)

- Agjencia Kosovare e Privatizimit mban ceremoninë e hapjes së ofertave të shitjeve përmes Likuidimit nr.48. (Hoteli Grand, ora 12:30)

- Mbledhja e komisionit për Shëndetësi, Punë dhe Mirëqenie Sociale në të cilën do të behët shqyrtimi i Projektligjit për Inspektoratin e Punës. (Ndërtesa e Kuvendit, salla N 303, ora 13:00)

- Komuna e Rahovecit organizon dëgjim publik për përgatitjen e buxhetit për vitit 2020 më banorët e fshatit Hoçë e Madhe. (Shtëpia e Kulturës në fshatin Hoçë e Madhe, ora 14:00)

- Kryeministri Ramush Haradinaj zhvillonë një vizitë pune në Komunën e Malishevës. (Malishevë, ora 15:00)

- Komuna e Rahovecit organizon dëgjim publik për përgatitjen e buxhetit për vitit 2020 më banorët e lagjeve III- dhe IV të qytetit të Rahovecit. (Shkolla fillore “Isa Boletini” në Rahovec, ora 19:00)