03 Dhjetor 2020

ORCA: Rritet transparenca në Universitetet Publike

Prishtinë, 30 tetor - Organizata për Rritjen e Cilësisë në Arsim (ORCA) sot ka publikuar raportin “Transparenca dhe llogaridhënia në universitetet publike të Kosovës: (Mos)informimi i publikut”, përmes të cilit për herë të katërt është bërë matja e transparencës formale të shtatë universiteteve publike në vendin tonë.

Sipas matjeve tona, universitetet publike janë përmirësuar në publikimin e dokumenteve dhe informatave rreth funksionimit të tyre.

Universiteti i Prishtinës është universiteti më transparent, nga 24 dokumente sa i kishte në shkurt të vitit 2019, pas katër matjesh periodike dhe kritikave publike për mungesën e tyre, tani i ka të publikuara të gjitha dhe është bërë institucioni më transparent i arsimit të lartë në Republikën e Kosovës.

Ndërkaq, Universiteti i Ferizajt, që ende ka numrin më të vogël të publikimit të dokumenteve dhe informatave publike, ka arritur ta dyfishojë numrin e publikimeve, nga 8 sa i kishte në shkurt të vitit 2019, në 16 në tetor të vitit 2020.

Përmirësim të theksuar ka edhe Universiteti i Gjakovës, i cili në shkurt të vitit 2019 kishte 15, ndërsa tash ka 25 dokumente dhe informata që janë të nevojshme për transparencë institucionale.

Edhe 4 universitetet tjera, i Prizrenit, i Pejës, i Gjilanit dhe i Mitrovicës kanë shënuar përmirësime dhe kjo shënon rritjen e transparencës në nivel nacional të universiteteve publike.

Që nga hera e parë kur është bërë publikimi i raportit të këtij hulumtimi, të gjitha universitetet kanë shënuar përmirësime dhe mund të themi që transparenca është në rritje.

ORCA mbetet e shqetësuar me mospublikimin e buxheteve nga ana e universiteteve publike. Aktualisht informata rreth shpenzimit të buxhetit i kanë të publikuara katër universitete: i Prishtinës, i Pejës, i Mitrovicës dhe i Gjakovës. Ndërsa nuk i kanë të publikuara ai i Prizrenit, i Gjilanit dhe i Ferizajt.

Pavarësisht se ka informata të publikuara nga katër universitete, problemi qëndron tek fakti se buxhetet e publikuara nuk i kanë të gjitha detajet e nevojshme dhe informatat janë gjysmake apo të përgjithshme.

ORCA do të vazhdojë me matjet e transparencës së universiteteve publike për arsye se publikimi i këtyre të dhënave është më se i rëndësishëm.
 

Kalendari

Ngjarjet e datës 3 Dhjetor 2020

- Me rastin e Ditës Ndërkombëtare të Personave me Aftësi të Kufizuara, Handikos mban konferencën lansuese të Raportit vlerësues mbi qasshmërinë e fëmijëve me aftësi të kufizuara në ndërtesat shkollore të nivelit fillor dhe të mesëm të ulët në Kosovë. (Qendra e Resurseve të Handikos në Veternik, ora 9:30)

- Gjykata Themelore në Ferizaj mban seancën kundër të pandehurit Ibrahim Mustafa Keqpërdorimi i pozitës apo autoritetit zyrtar. (Gjykata Themelore në Ferizaj, ora 9:30)

- Kuvendi i Kosovës mban seancë te veçantë në të cilën do të mbahet debat parlamentar për gjendjen e të drejtave të personave me aftësi të kufizuara në Republikën e Kosovës. (Kuvendi i Kosovës, ora 10:00)

-  Komisioni për Integrim Evropian shqyrton Projektligjin për rimëkëmbjen ekonomike – COVID-19, me amendamentet e Komisionit funksional nga aspekti i përputhshmërisë me legjislacionin e BE-së. (Ndërtesa e Kuvendit, salla N302, ora 10:00)

-  Komisioni për të Drejtat dhe Interesat e Komuniteteve dhe Kthim shqyrton Projektligjin për Rimëkëmbjen Ekonomike - COVID-19, me raport amendamente të Komisionit funksional për Buxhet dhe Transfere. (Ndërtesa e Kuvendit, salla N303 Koha: 10:00  

- Për nder të Ditës Ndërkombëtarë për Personat me Nevoja të Veçanta, ushtruesja e detyres Presidentja, dr.Vjosa Osmani bashkërisht me ambasadorin Britanik, Nicholas Abbott dhe ministrin e Arsimit, Ramë Likaj  nënshkruajnë panon e zotimit për gjithëpërfshirje. Oborri i Kuvendit të Republikës së Kosovës (hyrja nga sheshi, ora 11:30)

- OJQ EC Ma Ndryshe organizon aktivitetet ndërgjegjësuese që ka qëllim të përcjell porosinë vetëdijësuese për eliminimin e pengesave që janë krijuar për shkak të mungesës së gjithëpërfshirjes. (Parku i Qytet në Prizren, ora 11:00 - Keji përballë xhamisë së “Sinan Pashës”, ora 12:00 - Marash, ora 13:00)