04 Dhjetor 2020

Ministria e Arsimit ndërhyn në autonominë e Universitetit te Prishtinës

Prishtinë, 20 nëntor - Organizatat nënshkruese të kësaj letre e konsiderojnë të papranueshëm vendimin e njëanshëm të Ministrit të Arsimit dhe Shkencës (MASh) për rritjen e numrit të studentëve për 50 veta në Fakultetin e Mjekësisë.

Për më tepër, vendimi është marrë pa asnjë konsultim me Universitetin e Prishtinës (UP), Këshillin Shtetëror të Cilësisë (KShC) dhe Fakultetin e Mjekësisë.

Kjo ndërhyrje e Ministrit të MASh në autonominë e UP-së është e jashtëligjshme dhe konsiderojmë se ka për qëllim kapjen e institucioneve publike arsimore nga politika.

Autonomia e Universitetit përcaktohet në Nenin 10 të Statutit, i cili ëshë miratuar nga Kuvendi  Republikës: “Universiteti gëzon autonominë dhe lirinë e mësimdhënies akademike, të kërkimeve shkencore si dhe të krijimtarisë artistike brenda veprimtarisë së tij. Mjediset e Universitetit gëzojnë të drejtën e paprekshmërisë, përveç rasteve të përcaktuara ndryshe me ligje të veçanta.”

Për çështjet akademike të Universitetit mund të vendosë vetëm Senati i UP-së, sipas ligjeve dhe rregullave të përcaktuara nga Kuvendi i Republikës. Kurse dëshirat e ministrave, të cilët përmes veprimeve populiste mundohen të fitojnë simpati popullore, duhet të mbesin vetëm dëshira.

Po ashtu, kjo ndërhyrje prek edhe pavarësinë e Agjencisë së Kosovës për Akreditim (AKA) e cila përcakton kuotat e regjistrimit të studentëve në programe sipas vlerësimeve të ekspertëve ndërkombëtarë.

Kjo ndërhyrje do të jetë shkak i mjaftueshëm që në procesin e rianëtarësimit të AKA-së në Asociacionin Evropian ENQA, nga ku është përjashtuar pikërisht për shkak të cënimit të pavarësisë institucionale, të penalizohet përsëri në mungesë të integritetit institucional.

Me këtë rast iu bëjmë thirrje organeve të hetuesisë që të hetojnë nëse kjo është sabotazhë e qëllimshme ndaj AKA-së, me qëllim mospranimin të saj në ENQA, në mënyrë që kolegjet private të afërta me zyrtarë të partisë që drejtojnë me MASh të përfitojnë.  

''Ne i bëjmë thirrje Komisionit Parlamentar për Arsim, Rektorit të UP-së, z. Naser Sahiti, Këshillit Drejtues dhe  Senatit të UP-së; Drejtorit të AKA-së, Naim Gashi dhe anëtarëve të KShC-së, që të mos e pranojnë këtë vendim dhe të mbrojnë integritetin e institucioneve dhe proceseve që i drejtojnë.''

 Të gjitha këto institucione duhet të ushtrojnë padi ndaj MASh pasi vendimi përbën shkelje të një sërë ligjesh dhe dokumentesh të aprovuara nga Kuvendi i Republikës.

Si organizata të shoqërisë civile u bëjmë thirrje ambasadave të vendeve që ndihmojnë arsimin në Kosovë, që të bëjnë gjithçka që është e mundur që të mos lejojnë një ndërhyrje të tillë, e cila do të jetë me pasoja katastrofale për arsimin e lartë në Kosovë.
'
Përkrahja publike e pavarësisë institucionale të AKA-së dhe UP-së nga faktori ndërkombëtar do të ndihmonte në parandalimin e ndërhyrjeve të tilla në të ardhmen.
 
Organizatat nënshkruese:

Admovere
BIRN KOSOVA
CPC - Qendra për Kurajo Politike
FIQ – Forumi për iniciativë qytetare
GLPS – Group for Legal and Political Studies
KFOS – Kosovo Foundation for Open Society
KYC - Keshilli Rinor Kosovar
OJQ ETEA
OJQ INTEGRA
ORCA – Organizata për rritjen e cilësisë në arsim
S'bunker
TOKA - Organizata Kosovare per Talent dhe Arsim
YIHR – Youth Initiative for Human Rights

Kalendari

Ngjarjet e datës 4 Dhjetor 2020 - Mbahet seanca fillestare për rastin e vrasjes së politikanit serb Oliver Ivanoviq pranë Gjykatës Themelore në Prishtinë, departamenti Special - krimet e rënda me c'rast avokati mbrojtës do te jep deklaratë për mediet pas seancës. (Gjykata Themelore në Prishtinë, ora 9:30)

- Guvernatori i Bankës Qendrore të Republikës së Kosovës, Fehmi Mehmeti do të mbaj një takim virtual me presidentin e Gjykatës Ndërkombëtare të Arbitrazhit Alexis Mourre dhe Drejtoreshën e Komisionit të Arbitrazhit për Evropë, Laetitia de Montalivet. (Takim virtual, ora 10:00)

- Kryetari i Komunës së Prizrenit, Mytaher Haskuka dhe drejtoresha e Drejtorisë së Kulturës, Rinisë dhe Sportit, Emilja Redzepi, do të bëjnë nënshkrimin e kontratave me përfituesit e thirrjes për përkrahjen e OJQ-ve dhe individëve në fushën e kulturës, rinisë dhe sportit. (Shtëpia e Bardhë në Prizren, ora 10:00)

- Qendra për Këshillim, Shërbime Sociale, dhe Hulumtime organizon aktivitetin “Tuneli i Fundit” në përkujtim të grave të vrara si pasojë e dhunës në familje në pesë vitet e fundit në Kosovë, dita e dytë. (Përballë ndërtesës së Kuvendit të Kosovës, ora 10:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit shqyrton shkresën e Artan Qerkinit përfaqësues i Malcolm Simmons, ish kryetar i Asamblesë së Gjyqtarëve të EULEX-it, “Përgjigje në ftesën për të dëshmuar para Komisionit për Legjislacion” si dhe njoftohet me shkresën e Përfaqësuesit Special të Bashkimit Evropian, Tomas Szunyong, për emërimin e Karin Hernmark Ahliny, Ambasador i Suedisë, anëtar i Bordit  Mbikëqyrës  të Agjencisë Kosovare për Verifikim dhe Krahasim të Pronës. (Ndërtesa e Kuvendit, salla N506, ora 10:15)

- Komisioni Hetimor Parlamentar mbi procesin e licencimit, operimit, mbikëqyrjes dhe aplikimit për lejet e hidrocentraleve në Republikën e Kosovës interviston Ministrin e Ministrisë së Infrastrukturës Arban Abrashin. (Ndërtesa e Kuvendit, salla N204, ora 11:00)

- Mbahet seanca e jashtëzakonshme e Kuvendit te Kosovës në të cilën do të behët shqyrtimi i dytë i Projektligjit për Rimëkëmbjen Ekonomike - COVID-19. (Ndërtesa e Kuvendit, ora 11:00)

- Organizata Etea dhe Aleanca Franceze në Prishtinë me mbështetjen e Ambasadës Franceze do të mbajnë takimin e parë të huazimit të librave. (Tek objekti i Aleancës Franceze, ora 11:00)

- Autoriteti Kosovar i Konkurrencës (AKK) mban konferencë për medie lidhur me një hetim ndaj ndërmarrjeve që operojnë në tregun e energjisë elektrike. (Ish-objekti i Bankës së Lubjanës, ora 11:15)

- Kryetari i Delegacionit të Kosovës, Ibrahim Makolli dhe ai i delegacionit të Serbisë Veljko Odalovic do të mbajnë konferencë për media lidhur me varrezën masive në Kizhevak të Serbisë. (Lokacioni i varrezës masive në Kizhevak  të Serbisë, ora 12:00)

- Shpallet aktgjykimi ndaj të akuzuarit N. M., i cili akuzohet nga Prokuroria Themelore e Gjilanit, për veprën penale “vrasje e rëndë” pasi qe në  fshatin Berivojcë, komuna e Kamenicës, i pandehuri dyshohet që pas mosmarrëveshjeve familjare, me një mjet të fortë - shufër metalike, godet bashkëshorten e tij në kokë dhe pjesë të tjera të trupit, me ç’rast të ndjerës i ka shkaktuar plagë të cilat kanë qenë vdekjeprurëse. (Gjykata Themelore Gjilan, ora 13:00)

- Komisioni Hetimor Parlamentar mbi procesin e licencimit, operimit, mbikëqyrjes dhe aplikimit për lejet e hidrocentraleve në Republikën e Kosovës interviston drejtoren e Insitutit Hidrometeorologjik të Kosovës Letafete Latifi. (Ndërtesa e Kuvendit, salla N204, ora 13:00)

- Komisioni Hetimor Parlamentar lidhur me procesin e privatizimit në Kosovë plotëson listën e dëshmitarëve. (Ndërtesa e Kuvendit, salla N10, ora 13:00)

- Qendra për Raste Gjyqësore Strategjike mban konferencë për media me rastin e dorëzimit të padisë për konflikt administrativ kundër vendimeve të Ministrisë së Ekonomisë dhe Ambientit dhe Zyrës së Rregullatorit për Energji”. (Para Pallatit të Drejtësisë, ndërtesa A, ora 14:00)

- Ministrja e Punëve të Jashtme dhe Diasporës e Republikës së Kosovës, Meliza Haradinaj-Stublla pret në takim ministrin në detyrë për Evropën dhe Punët e Jashtme i Republikës së Shqipërisë, Gent Cakaj ku pjesë e takimit do të jenë edhe përfaqësuesit e shqiptarëve të Luginës së Preshevës. (Objekti i MPJD-së, ora 14:00)