Prishtinë, 8 prill - Zëvendëskryeministri dhe Ministri i Drejtësisë, Prof. Dr. Hajredin Kuçi, sot ka marrë pjesë në shënimin e Ditës Ndërkombëtarë të Romëve, e organizuar nga Zyra për Çështje të Komuniteteve dhe Zyra e Kryeministrit.

Zëvendëskryeministri Kuçi tha se, sa herë flitet për komunitetin Rom dhe të drejtat e tyre shpesh të cunguara, duhet të flitet në kontekst ndërkombëtar dhe jo vetëm vendor. Sipas tij, në Kosovë Romët nuk gëzojnë kushtet ideale për jetën e tyre, ashtu si një pjesë tjetër e popullatës, por që ato janë duke shkuar drejtë përmirësimit dita-ditës.

“Duhet thënë se të rralla janë vendet të cilat kanë Strategji në nivel Qeveritar për t’u përkujdesur për realizimin deri në 100% të të drejtave të komunitetit Rom. Kosova tashmë e ka këtë."

"Madje, duhet rikujtuar që diskutimi për implementimin e kësaj strategjie është ngritur në dy nivele akoma më të larta se ai qeveritar: është diskutuar për implementimin e saj edhe në Dialogun për Liberalizimin e Vizave dhe në Dialogun e Strukturuar për Sundim të Ligjit”, tha Kuçi.

Zëvendëskryeministri tha se, në këtë ditë dua të rikthej vëmendjen e komunitetit Rom tek arsimi, edukimi dhe ngritja intelektuale e pjesëtarëve të tyre, duke shtuar se në Kosovë ka shumë hapësirë për pjesëtarët e komunitetit Rom të arsimohen, edukohen e emancipohen në shumë dimensione të mundshme shoqërore, por pa rrezikuar ato që në komunitetin e tyre njihen si vlera të përbashkëta, traditë dhe kulturë.

Në fund, Zëvendëskryeministri tha se Qeveria e Republikës së Kosovës po punon çdo ditë që të garantohet niveli më i lartë i respektimit të të drejtave të njeriut. Ai shtoi se kjo nuk është vetëm deklarative, por janë krijuar edhe shumë mekanizma për të siguruar që kjo të zbatohet edhe në praktikë.