08 Dhjetor 2021

Asambletë e Fëmijëve kërkojnë sigurimin e teksteve shkollore për të gjithë nxënësit

Prishtinë, 21 tetor -  Grupi i fëmijëve “ROR” dhe Asambletë Komunale të Fëmijëve shprehin shqetësimin në lidhje me mungesën e teksteve shkollore në disa shkolla të Kosovës.

"Pavarësisht që procesi mësimor ka filluar para pothuajse një muaji, ne si zë përfaqësues i fëmijëve të Kosovës, vazhdimisht jemi duke pranuar informata, kërkesa dhe ankesa të nxënësve dhe prindërve lidhur me mungesën e teksteve shkollore për nxënësit e arsimit parauniversitar (të nivelit fillor dhe të mesëm të ulët)", thekson ROR.  

Mungesa e teksteve shkollore dhe vonesat në shpërndarje të tyre sipas ROR paraqesin shkelje të detyrimeve pozitive të shtetit për mbrojtjen e të drejtës për edukim; tregojnë moskoordinim të zinxhirit të institucioneve arsimore dhe shkaktojnë pasoja të shumëfishta te nxënësit.

Ministria e Arsimit dhe Drejtoritë Komunale të Arsimit kanë obligime ligjore që të sigurojnë dhe të shpërndajnë tekstet mësimore brenda afateve të përcaktuara me Ligj dhe udhëzuesit administrativ.

Rrjedhimisht, ROR konsideron se dështimi i tyre për t’u ofruar nxënësve tekstet shkollore në fillim të vitit shkollor nuk paraqet vetëm shkelje ligjore, por edhe shkelje të detyrimit të shtetit që fëmijëve t’u sigurojë të drejtën në arsim falas.

"Nuk mund të ketë justifikime, shfajësime apo fajësime nga cilido institucion për një proces rutinë dhe të afatizuar nga ligji."

"Duke marrë parasysh situatën me pandeminë dhe mënyrën e jashtëzakonshme të realizimit të procesit mësimor, sigurimi i teksteve shkollore është barra e fundit për të cilën nxënësit do duhej të brengoseshin", nenvizon ROR.

Në një situatë të tillë, mungesa e tyre shton edhe më tepër ankthin dhe stresin tek fëmijët dhe rritë barrën financiare të familjeve për t’i pajisur fëmijët me tekstet e nevojshme.

ROR vlerëson se me vonesën e shpërndarjes, klasët në mungesë të teksteve janë të detyruara që mësimin ta shtyejnë apo ta zhvillojnë në mënyrë sipërfaqësore pa tekste, çka u pamundëson nxënësve përgatitjet e nevojshme; ta realizojnë në mënyrë diskriminuese për nxënësit që kanë libra dhe ata që nuk kanë ose janë detyruar t’i blejnë vetë.

Të gjitha opsionet janë kundër fëmijës dhe insitucionet duhet të kenë pasur parasysh paraprakisht pasojat te fëmijët nga mosveprimet apo veprimet joefikase.  

Grupi ROR dhe Asambletë Komunale të Fëmijëve të Kosovës edhe një herë u bëjnë thirrje urgjente të gjitha institucioneve arsimore kompetente për sigurimin dhe shpërndarjen e teksteve shkollore që sa më shpejtë dhe pa vonesa të sigurohen tekstet mësimore për fëmijët.

"Ne shprehim gatishmërinë që të bashkëpunojmë në çfarëdo aspekti që kërkohet. Poashtu, kërkojmë nga institucionet që urgjentisht të rishikojnë udhëzimet administrative lidhur me pajisjen dhe ruajtjen e teksteve shkollore, e bashkë me fëmijët të gjejnë një zgjidhje kreative për kthimin e teksteve shkollore paraprake nga nxënësit, si problem i identifikuar dhe i pazgjidhur për tash shumë vite", deklaron në fund ROR.   

Kalendari

Ngjarjet e datës 8 dhjetor 2021

- Komisioni për të Drejtat dhe Interesat e Komuniteteve dhe Kthim shqyrton Projektligjin për tregtinë me produkte të naftës dhe karburante të ripërtërishme, dërgimin e Forcës së Sigurisë së Kosovës jashtë vendit, etj. (Ndërtesa e Kuvendit, salla N225, ora 10:00)

- Ambasada Franceze, Aleanca Franceze e Prishtinës dhe Espace Campus France, në bashkëpunim me Universitetin e Prishtinës dhe Universitetin AAB organizojnë hapjen e Panairit Universitar Francez në Kosovë i cili do tu mundësoj studentëve kosovarë të zbulojnë programet akademike të ofruara nga 30 universitete dhe 16 webinare nga Franca. (Universitetin AAB, ora 10:00)

- Ministri i  MMPHI Liburn Aliu raporton para Komisionit për Mbikëqyrjen e Financave Publike lidhur me raportin e auditimit të përformancës "Mbledhja, trajtimi dhe asgjësimi i mbeturinave komerciale”. (Ndërtesa e Kuvendit, salla N10, ora 10:00)  

- VentureUP në partneritet me Sustainability Leadership Kosova dhe financuar nga UNDP organizon ditën e garës finale e eko-startup-eve të Programit Green Hub. (Amfiteatri i objektit të Administratës Qendrore të Universitetit të Prishtinës, ora 10:00)

- Komisioni për Çështje të Sigurisë dhe Mbrojtjes shqyrtimin raportin me propozim-amendamente për Projektligjin për ndryshimin dhe plotësimin e Ligjit për Deminim Humanitar. (Ndërtesa e Kuvendit, salla N302, ora 11:00)

- Mbahet mbledhja e Kryesisë së Kuvendit të Republikës së Kosovës. (Ndërtesa e Kuvendit, salla C 301, ora 12:00)

- Të rinjte e iniciatives “Hajde në shkollë” organizojnë forum teatrin që ka për qëllim vetëdijësimin dhe parandalimin e braktisjes së shkollimit në mesin e të rinjve në komunën e Klinës. (Shtëpia e kulturës “Jehona e Dukagjinit” në Klinë, ora 14:00)

- Kosovo 2.0 dhe Fondacioni 17  organizojnë diskutimin lidhur me mobilizimin e komunitetit për ruajtjen dhe rikthimin e hapësirave të përbashkëta publike, me fokus në historinë e tri kinemave që i shpëtuan privatizimit. (Kino Armata, ora 17:00)

- OJQ “Zëri i Romëve, Ashkalive dhe Egjiptianëve” organizojnë diskutimin "Le të flasim" i cili synon të sjellë vëmendjen dhe ndërgjegjësimin tek audienca në lidhje me diskriminimin racor, martesat e hershme, gjuhën e urrejtjes në institucionet publike dhe rrugën e edukimit mbi dy dekada. (Kino Armata, ora 19:00)