Napoli, 27 shtator - Sipas asaj që shkruan Corriere Dello Sport në edicionin online të saj, mbrojtësi i krahut të majtë të Kombëtares shqiptare, Elseid Hysaj dhe De Laurentis kanë gjetur gjuhën e përbashkët për kontratën e re.

Bëhet fjalë për një kontratë që blindon Hysajn me skuadrën napolitane. Corriere shkruan se mbrëmjen e së hënës palët kanë gjetur gjuhën e përbashkët për zgjatjen e kontratës me pesë vite të tjera, me opsionin e rinovimit plus një.

Klauzola e largimit të mbrojtësit “Kuqezi” është përcaktuar në 50 milionë euro, një shifër marramendëse për një mbrojtës e që praktikisht blindon shkodranin.

Sa i takon pagës së futbollistit, Corriere thotë se kontrata e re përcakton një shifër që varion nga 1.6 deri në 2.3 milionë euro në sezon, në varësi të rendimentit të lojtarit në fushë.

Zyrtarizimi pritet të bëhet brenda të enjtes.