19 Janar 2018

Komuna e Gjilanit nuk lejon strukturat paralele të Serbisë

Gjilan, 19 qershor - Ka më shumë se dy vite që një asamblisti serb në Kuvendin e Gjilanit, Srgjan Mitroviq, nuk i lejohet prezenca në sallën e kuvendit. Gjitha partitë në Kuvend kanë votuar largimin e tij nga seancat, për faktin që ai ka pranuar një pozitë nga Serbia për të udhëhequr një strukturë paralele në Gjilan i quajtur ‘kryetar i qarkut për Anamoravë’.

Bekim Salihu, analist i Institutit GAP, që bën edhe monitorimin e punës së komunave, shprehet se Kuvendi i Komunës i ka kërkuar atij dorëzimin e një deklarate me shkrim ku distancohet nga strukturat paralele dhe vendos t’i përfaqësoj serbët nëpërmjet institucioneve të Kosovës. Sipas tij, Mitroviq ka shkuar në çdo seancë, por nga çdo seancë është përjashtuar.

\"Nga komuniteti serb ka qindra raste të tilla, kur ata në të njëjtën kohë punojnë në institucionet e Kosovës dhe paralelisht janë pjesë e strukturave paralele\", shprehet Salihu.

Sipas tij, katër kryetar komunash të Kosovës që kanë dal kryetar nga zgjedhjet e Kosovës, pas këtyre zgjedhjeve janë emëruar nga Serbia edhe kryetar të strukturave paralele, dhe asnjë masë ndëshkuese nuk është ndërmarrë nga Qeveria e Kosovës.

Sipas Salihut, praktika e Gjilanit do të duhej të ndiqej në të gjitha rastet.

\"Kuvendi Komunal i Gjilanit ka miratuar një vendim për përjashtimin e Mitroviqit nga seancat, në mes tjerash aty thuhet se Kuvendi Komunal i Gjilanit nuk po e përzë Mitroviqin, por strukturat paralele. Mitroviq mund të kthehet, por pa struktura paralele\", ka thënë Salihu.

Kalendari

Ngjarjet e datës 19 Janar 2018

- Komisionit për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi takohet me Koalicionin e OJQ-së për Integritet dhe Transparencë në Universitet. (Ndërtesa e Kuvendit, salla S-II, ora 10:00)

- Ministri i Zhvillimit Ekonomik, Valdrin Lluka do të mbajë konferencë për media, me ç’rast do të publikohen kontratat komerciale të nënshkruara nga Qeveria e Kosovës dhe investitori ContourGlobal për projektin e TC Kosova e Re. (Mjediset e MZHE-së, ora 10:00)

- Mbahet mbledhje e Komisionit për Mbikëqyrjen e Financave Publike në të cilën do të inicohet procedura për Auditimin e raporteve financiare të Subjekteve Politike, për vitin 2017, etj. (Ndërtesa e Kuvendit, salla  sallën N 303, ora 10:00)

- Mbahet seanca e Kuvendit të Komunës së Gjilanit. (Salla e mbledhjeve të Kuvendit të Komunës së Gjilanit, ora 10:00)

- Mbahet mbledhja e Komisionit për Bujqësi, Pylltari, Zhvillim Rural, Mjedis e Planifikim Hapësinor në të cilën do të shqyrtohet raporti për gjendjen e mjedisit, i ftuar kryeshefi i Agjencisë për mbrojtjen e mjedisit. (Ndërtesa e Kuvendit, salla N 302, ora 10:30

- Ministri i Drejtësisë, Abelard Tahiri,  do të vizitojë Burgun e Hapur në Smrekonicë. (Fshati Smrekonicë, magjistrala Prishtinë - Mitrovicë, ora 11:00)

- Mbahet mbledhja e Komisionit për të Drejtat, Interesat e Komuniteteve dhe për Kthim në të cilën do të shqyrtohet Projektligji për Tatimin në Pronën e Paluejtshme, me raport amandamente të Komisionit funksional për Buxhet dhe Finanaca. (Ndërtesa e Kuvendit, salla N 303, ora 12:00)

- Kryetari i Komunës së Gjilanit, Lutfi Haziri, do të takoj zëvendësministrin e Diasporës, Xhavit Zariqi. (Zyra e kryetarit të Komunës së Gjilanit, ora 13:00)

 

- Kryeministri Ramush Haradinaj vizitë pune në Komunën e Junikut. (Ndërtesa e Komunës, ora 13:30)

- Nën organizimin e kryetarit të Komunës së Gjilanit, Lutfi Haziri, organizohet tryezë shkencore kushtuar figurës së Skënderbeut në 500-vjetorin e vdekjes, në të cilën pos kryetarit Lutfi Haziri, do të marrin pjesë edhe historianë e njohës së figurës së heroit. (Shkolla “Don Bosko”, në Gjilan, ora 14:00)

 

- Kryeministri Ramush Haradinaj vizitë pune në Komunën e Deçanit. (Ndërtesa e Komunës, ora 15:00)